MAKISA 5

1KANINGA muntu umoumwe, dina dienci ene, Anania, yi Safila mukasanci, akakwodisa kidi, 2yi akadiximbila kicini kia diso, (mukasanci lolo akabucika bwalo), yi akacwala kimo kicini, akakiteka ku makasa a batumibwi. 3Mo Pita akatôya ene, Anania, kukai Satana amakwolubisa mucima ebe bixedimbila Mwoxixi a babala, yi bixediximbila kicini kia diso dia kidi ? 4Pakadi kikiasala, kakiakadi kiebe ? pakadi lolo kiamakwodixibwa kakiakadi bwalo bwebe mikyebe ? Kukai wapwela bwalo bobu lukanyi mu mucima ěbe ? Kwadimbila bantu, kate Ncembi. 5Anania lolo, biakakwombwayi meyi aa, akapona paxi yi akakica, yi bowa bungi bwakaponena bungi bwa bantu bakakwombwa nako. 6Yi mapulwa akakwombuluka, akamudinga mbuxa, akamwombulula kunci yi akamuncika.

7Kunyuma, pakadi ola isatu yamadika, pakabwela mukasanci, akadi kasolubukwa bwalo bwakapona. 8Yi Pita akamukulumuna ene, Ungwambili ndo nwakakwodisa kidi ku diso diaku dedi ? Yei akatôya ene, Ya, kadedi. 9Pita lolo akamwambila ene, Kukai nwamakwetabusañana ndo kwelekyesa Mwoxixi a Fumu ? Mona, makasa a bantu bapuncika bayebe adi ku mbelo, yi banakucwala kunci. 10Yei lolo akapona mangwoso ku makasa anci, yi akakica. Yi pakabwela mapulwa munda, bakamusañana afufwa yi bakamwombulula kunci, bakamuncika ku lubalu lwa bayenci.

11Yi bowa bungi bwakaponena kikokye bungi bwaklo, yi bantu boso bakakwombwa bintu bebi. 12Ku makaci a batumibwi lolo kwakakwencebwa bilayixilu bingi yi bikamakama kudi bantu ; yi bakadi bungi bwabo yi lukanyi lumolumwe ku mbalanda a Solomono. 13Mo ku bwalo bwa banga bantu, kakwakadi muntu umoumwe a kusangila yinabo bwalo bwa bowa, kate bantu bakabatumbisa ; 14yi betabuxi bakadika kubodeyebwa bungi kudi Fumu, yi babalumi yi babakaxi ; 15biakabatusabo bena masama munda mwa ncila, yi bakabateka pa ntangi yi pa malelo, bixeponena munga abo isanga mudingidingi ă Pita, paxedikayi papa. 16Yi kimbukuma kabidi kiakasangila kia mu mala adi pepe yi Yelusaleme, bamacwala bena masama yi bantu bamafinibwa kudi bidimu bia mbindu ; yi bakapandixibwa bungi bwabo.

17Kaninga bokanda bunene bwakakwemana yi bantu boso bakadi yinanci kabadi ba butonga bwa baSaduki, yi bakakwolubixibwa bisusu, 18bakakwata batumibwi yi bakababwesa mu ncibo a lukanu. 19Kaninga mwangele a Fumu akadipula mbelo ya ncibo a lukanu ku butuku, akabaxiya kunci ene, 20Nuyi emana, nutôyeli bantu munda mwa tempelo meyi moso a môyo ou. 21Pakakwombwabo, bakabwela mu tempelo ku butwatuku pexe, yi bakakweyesa. Yi bokanda bunene bwakalwa yi bantu bakadi yinanci, yi bakabikila kikokye yi bungi bwa bwabukulu bwa bana ba Isalele, yi bakatuma ku ncibo a lukanu, ene, bacwadibwi. 22Mo pakalwa tupalai, bakadi kabasobasañana mu nabo a lukanu, yi bakapiñana, yi bakatôya 23ene, Twapusañana ncibo a lukanu muncibika nkô nkô nkô, yi banami bamakwemana ku mbelo ; kaninga bitwapudipula, katusosafiana muntu munda. 24Pakakwombwabo meyi aa, bokanda, yi kapitene ka tempelo, yi makanda manene bakadi yi nkanyi ibidi ku bwalo bwabo, muxelunda bwalo bobu. 25Yi muntu akalwa bambila ene, Mona, babalumi banwakateka mu ncibo a lukanu badi mu tempelo, bamakwemana yi badi mu kweyesa bantu. 26Yi kapitene ka tempelo kakaya yi tupalai, yi akabacwala kutena yi ngulu, bwalo bwakacinabo bantu, ximbi baxekwelebwa mabwe. 27Yi pakadi bamabacwala, bakabateka ku mpaia a kikokye yi bokanda bunene bwakabapangusa lolo 28ene, Twakanupangukila yi ngulu ene, kanweyexi mu dina dedi ; yi mona, nwamakwolubisa Yelusaleme yi kweyesa kwenu, nwencenca ndo kutuponexela bwalo bwa maxi a muntu you.

29Kaninga Pita yi batumibwi bakapingasa ene, Kudi yi nkwami kwedeya Ncembi, kumom bantu. 30Ncembi a batetecu akabisa Yisu, unwakaxipa nonu, nwakamukopeka ku muci. 31Yei, Ncembi akamubandisa yi kianca kienci kia kidyo, mwembu yi mupandixi, ndo kupa bena Isalele kwela kwa lwombixi yi kulekyelebwa kwa mabi. 32Coco lolo badi batôbôdi ba malo aa, yi Mwoxixi kabidi a babala, amapela Ncembi bantu bamwedeya. 33Kaninga bobo, pakakwombwabo, bakakadibwa ku micima yi bakakwelañana nkanyi ndo kubaxipa.

34Kaninga muntu umoumwe, muFalixi, dina dienci ene, Ngamaliele, mweyexi a bwadi akanemekyebwa kudi bungi bwa bantu, akakwemana ku kikokye, yi akatôya ene, babatusi babalumi kakondo. 35Yi akabatôyela ene, Bantu ba Isalele, nudimuki ku bwalo bwa bantu baba, ku mucwe ă bintu binutanakyeba kwenca. 36Buxi bwa matuku aa noku bwakakwombuluka Teudasa, amaditôyela mikyenci ene, udi muntu munene ; kibumbu kia bantu bakasangañana yinanci lwedi lwa nkama inai ; mikyenci akaxipibwa, yi bantu boso bakamwedeya bakacakanixibwa, bakancimina nya. 37Kunyuma kwanci kwakakwombuluka Yudaxi muna Ngalili ku matuku akabalabo bantu mbadi, akasaiula bantu bamulandi ; yei lolo akafwa, yi bantu boso bakamwedeya bakacakana ca. 38Nkyekyu lolo meme nwambila ene, Nuncuki kudi bantu baba nubalekyeli ; ndo lukanyi lwa noku, ndo kukisa kwa noku kutani yi dicina munda mwa bantu, kunancimibwa ; 39kaninga akali kwapwakala kudi Ncembi, kanunalubukwa kubapwesa, ximbi nuxesananibwa nwamatanda yi Ncembi. 40Yi bakamwombwela diyi dienci, yi pakadi bamabikila batumibwi, bakabakuma, yi bakabapangukila ene, kabatôyi mu dina dia Yisu, yi bakabalekyela. 41Mbwôso bakancuka ku mpala a kikokye, badi mu kuxekyelela bwalo bwamabadibwabo bamalelekyela yi kukyesolebwa ku mucwe ă Dina. 42Yi ku diba dioso, ku tempelo yi ku ncibo, bakadi kabasolekyela kweyesa yi kwambila ene, Yisu udi Kalistu.

Currently Selected:

MAKISA 5: Luna_NT

Highlight

Copy