मरकुस 5

सैतान लग्‍या आला खे अच्छो करनो

(मत्ती 8:23-27; लूका 8:22-25)

1फिर वू नद्दी का आगे गेरासेनीयहोन का देश मे पहुच्या, 2अरु उ डोंगा से उतर्‍यो ते, तुरुत एक इन्‍सान जोमे बुरी आत्मा, थी, कब्र से नीकलीखे ओखे मील्‍यो. 3उ मरगट मे र्‍हिया करतो थो अरु कोय ओखे साकल से भी नी बाधी सकता था. 4क्युकी उ बार-बार बेडिहोन अरु साकलहोन से बाध्यो गयो थो, पर ओने साकल खे तोडी दियो, अरु बेडिहोन खे टुकडा-टुकडा करी दिया था, अरु कोय ओखे कब्जा मे नी करी सकता था . 5उ लगातार रात-दिन मरगट अरु टेकडीहोन मे चिल्लाते अरु पत्थरहोन से अपना आप खे घायल करतो थो. 6उ दूर से यीशु खे देखीखे दौवड्यो, अरु ओका पाय पर घुटना का बल गिर खे प्रणाम करयो.

7अरु जोर से चील्लय खे बोल्‍यो, परम प्रधान परमेश्वर को बेटो यीशु, मेखे तरा से काम? मी तोखे परमेश्वर की कसम दिउस मेखे सजा मत दे 8क्युकी उ ओका से बोली रो थो, “हे बुरी आत्मा, यो इन्‍सान मे से नीकली जा.”

9यीशु ने ओका से पुच्छो, तरो नाम का हइ? ओने ओकासे बोल्‍यो मरो नाम सेना हइ. क्युकी हम भोत झन हइ. 10अरु वोने वोका से गिडगीड्य खे प्रार्थना करी की हमखे यो देस का बाहेर नी भेजनू.

11व्हा पहाड पर एक डुक्कर होन को एक बडो धन चरीरो थो. 12अरु उनने ओकासे प्रार्थना करते हुयो बोल्‍यो हमखे वे डुक्कर मे भेज की हम मीली जाह्ये. 13येका लिये ओने उनखे आज्ञा दि. अरु बुरी आत्मा होन ओमे से नीकली खे डुक्करहोन का अंदर गइ. अरु डूक्करहोन को जो बडो झुण्ड जो नजीकपास दो हजार को थो पहाड पर से झील मे गीरी खे डुबीखे मरी गया.

14उन डुक्करहोन खे चरान आला ने भागी खे नगर मे अरु गाव मे या खबर सुनय, अरु दुन्‍या होन जो कुछ हुयो थो वोखे देखन खे आया. 15तब वे यीशु का पास आया, अरु जो इन्सान मे जो बुरीआत्मा थी जेमे सेना जमाइ थी, कपडा पेन्‍या अरु अच्छो बठ्यो देखीखे डरी गया. 16जो इन्सान होन ने यो देख्‍यो थो ओमे बुरीआत्मा लग्‍यो आलो इन्सान अरु डुक्कर का बारे मे सब कुछ हूयो जो, उनखे बतायो.

17फिर यीशु अरु अपना देस से जान का लिये प्रार्थना करण लग्‍यो.

18अरु जब वु डोंगा मे चडन लग्यो ते वू इन्सान जो पैयले बुरीआत्मा थी प्रार्थना करण लग्यो कि मेखे भी तरा सात र्‍हेन दे.

19फिर भी ओने ओखे आन नी दियो अरु वोखे बोल्‍यो, अपना कुटुम होन का पास घर मे जा अरु वुन खे बता की परमेश्वर ने तरा लीये कसो बडो काम कर्‍यो, अरु वोने तरा पर कसी दया करी.

20व्हा जयखे दिकापुलीस सेवक नगर का बडा देस मे या बात को प्रचार करण लग्या कि यीशु ने मरा लिये कसो बडो काम कर्यो हइ. अरु सब दुन्या अचम्भो करतो थो.

मरी पोरय अरु एक रोगी बायको

(मत्ती 9:18-26; लूका 8:40-56)

21जब यीशु डोंगा से वा पार गयो, ते एक भोत बडी वोका चारी तरफ अरु एक जगा जमा हूइ गा, अरु व्हा नद्दी का किनारा पर था. 22फिर आराधनालय का अधिकार मे से याइर नाम को एक इन्सान आयो अरु वोखे देखी खे वोका पाय पर गीरी गयो, 23अरु यो बोलिखे ओका से प्रार्थना करिखे बोलन लगी का मरी छोटी बेटी बिमार हइ. तू अयखे ओका पर हात रख कि वा अच्छी हुइ जाय अरु जिन्दी र्‍हे.

24तब यीशु ओका साथ गयो. अरु बडी गर्दी ओका पिछे चलन लगी, ह्या तक कि इन्सानहोन कि गर्दी ओका पर गिरी पडी थी.

25एक बय थी जो बारा साल से खुन बगरन की बीमारी थी, 26अरु जेने भोत से वैद्य से इलाज करायो, अरु अपना सब पैसा खर्च करण पर भी ओखे कुछ लाभ नी मील्यो, पर अरु भी बीमार हुइ गइ थी. 27ओने यीशु का बारे मे सुनी खे, गर्दी मे ओका पिछे-पिछे अय अरु ओका कपडा खे छि लियो. 28क्युकी वा बोलती थी कि मी ओका कपडा खे छि लियु ते मी अच्छी हुइ जायु.

29अरु तुरुत ओको खुन बोहानो बंद हूयगो, अपना आंग मे सोची लियो कि मी बीमारी से अच्छी हुइ गइ. 30यीशु ने तुरुत अपना मे जानी लियो, कि मरासे सामर्थ्य नीकली हइ, अरु गर्दी मे पीछे फिरी खे पूछ्यो, “मरा कपडा कोने छिया?”

31ओका सेवक ने ओखे बोल्‍यो, तु तो देखी रो थो की गर्दी तरा पर गिरी पडस अरु तु बोलस, की मेखे हात कोने लगायो?

32जब ओने वा बय खे जो यो कर्‍यो थो यो देखन खे चारी तरफ देखन लग्यो. 33फिर भी वा बय जो कुछ वोका सात हूयो थो वु समजी खे डरस अरु कापते हुइ अय वोका सामने गीरी गय, अरु वोने सब कुछ सच्ची सच्ची बतय दियो. 34वोने ओकासे बोल्‍यो, “बेटी तरा विश्वास ने तोखे अच्छो कर्‍योस. शांती से जा अरु अपनी बीमारी से बची र्‍हे,”

35उ यो बोली र्‍हो थो,कि आराधनालय का सरादार का घर से दुन्याहोन ने अय खे बोल्यो, “तरी बेटी तो मरी गइ. अब गुरु खे क्यु दुख देस हइ.”

36फिर यीशु ने वा बात खे सुनी ली अरु आराधनालय का अधिकारी खे बोल्यो, डर मत पन विश्वास रख. 37अरु वोने पतरस, अरु याकूब, अरु याकूब को भैइ यहून्ना खे छोडी खे, अरु कोय खे अपना साथ आन नी दियो. 38अरु वे आराधनालय का अधिकारी का घर मे आया, ते दुन्‍या होन खे चिल्लाते अरु जोर से रोते विलापते देख्‍यो. 39जब वु अंदर जइ खे वोने बोल्यो तुम काय का लिये रोय रा अरु चिल्लय रा? बेटी मरी नी, पन सोय रीस हइ.

40अरु वे ओकी हसी उडान लग्‍या. पन सब खे बाहेर नीकाली खे बेटी का माय बाप अरु वोका सात आलाखे लीखे वोने उ घर मे झा बठी थी व्हा वे गया. 41अरु बेटी को हात पकडी खे वोने वोखे बोल्यो, तलीता कुमी! येको मतलब हइ, हे बेटी, मी तोखे बोलुस हइ, उट.

42अरु बारा साल की वा पोरय तुरुत चलन फिरन लगी, येका पर दुन्याहोन खे खुब अचम्बो हुयो. 43फिर यीशु ने उनखे चेतावनी का साथ आज्ञा दी कि या बात कोय खे मत बतानु, अरु येखे कुछ खान खे दे.

Currently Selected:

मरकुस 5: NTGnn24

Highlight

Copy