LUKA 14

Yesu ikumbumbulusya umbine

1Isiku limo pisiku lya Sabati, Yesu alinkwingila nnyumba ya nkulumba yumo gwa baFarisai nkulya ifyakulya, abandu balinkuntegelela. 2Keta, nkyeni mmyake alimo umundu yumo ugwa mbungo ya kutonya. 3Umwene Yesu alinkubamula abamanyandagilo nabaFarisai alinkuti, “Bule, ngimba sikwitikisigwa ukubumbulusya abandu pisiku lya Sabati, pamo mma?” 4Abene balinkuya mye itolo. Popapo alinkunkola umundu yula alinkumbumbulusya, alinkundeka ukuti abukege. 5#Mat 12.11Alinkubabula abandu alinkuti, “Ayege ywani mmyinu, uyu linga imbunda yake pamo ing'ombe yake yibulutukile mbwina bwa misi, uyu atikuyifyula nakalinga pisiku lya Sabati?” 6Abene balinkutoligwa nukumwamula amasyu aga.

Isya lwiyisyo nisya kwambilila abahesya

7Popapo Yesu alinkubabula ikifwanikisyo aba babilikiligwe, bo aketile bikwisalila ifikota fya bwimikigwa, alinkuyoba nabo alinkuti, 8#Mbupi 25.6-7“Linga yumo akubilikile kubwegi, komma ukutugasya pakikota ikya bwimikigwa, ukuti ungisakwaga abilikiligwe umwimikigwa uyu akukindile. 9Lelo gwage ikwisa uyu ababilikile mwe babili, ikukubula ikuti, ‘Ulimwepukilapo uyu;’ lelo po kwanda ukwakwitugasya pakikota ikya pasi, bo sikukolile isoni. 10Loli linga ubilikiligwe, po ubukege ukitugasye kunyuma, ukuti linga isile uyu akubilikile, ise akubulege atigi, ‘Gwe mwinangu, fyukaga pabwimikigwa,’ po kwisakubonekaga ubwinufu nkyeni muli bosa aba batugasenie nanugwe. 11#Mat 23.12; Luk 18.14Buno gwesa uyu linga ikwiyimika mwene, yo isakwisigwaga; na uyu linga ikwiyisya mwene, yo isakwimikigwaga.” 12Popapo alinkumbula yope uyu alimbilikile alinkuti, “Linga utendekisye ifyakulya fya pamusi pamo ifya namayolo, komma ukubabilikila abamanyani bako, bomma nabamyinu, bomma nabakamugo, bomma nabapalamani bako abakabi; ko kuti bangisakukubilikila bope, ukuti bafwanege bikukugomokesya. 13Loli linga utendekisye ifya palusekelo, ubabilikilege abalondo, abafilema, aba bikukwema nabafwamaso; 14po kwisakuyaga nsayigwa, namanga abene bakaya nafyo fimo ifya kukugomokesya. Buno kwisa kugomokesigwaga mbusyuka bwa bagolofu.”

Ikifwanikisyo kya fyakulya fya palusekelo ulukulumba

(Mat 22.1-10)

15Yumo umundu muli aba batugasenie nagwe pakulya, bo apilike sisisi, alinkumbula Yesu alinkuti, “Nsayigwa uyu isakulyaga ifyakulya mbutwa bwa Kyala.”

16Yesu alinkumbula alinkuti, “Umundu yumo atendekisye ifyakulya ifya palusekelo ulukulumba fiyo, alinkubabilikila abandu ba bingi; 17Pakabalilo ka kulila, alinkuntuma umbombi gwake kukubabula aba babilikiligwe ukuti, ‘Amwisege lelo, buno fyosa fitendekesigwe.’ 18Popapo bosa balinkwanda ukukana. Untasi alinkumbula alinkuti, ‘Nulile ungunda, mfumbilwe fiyo ukuti mbuke ngagukete; nikukusuma ukuti ukanganilengeko.’ 19Uyungi alinkuyoba alinkuti, ‘Nulile ingambako kalongo, lelo nsumwike kukusigela; nikukusuma ukuti ukanganilengeko.’ 20Uyungi alinkuti, ‘Negile unkikulu, fyobene ngabagila ukwisa.’ 21Umwene umbombi yula alinkwisa, alinkumpangila umalafyale gwake sisisi. Popapo umwenekaya alinkukalala, alinkumbula umbombi gwake alinkuti, ‘Sumukaga mbibimbibi, bukaga mmipulo na mmisebo igya nkaya, ukabatwalege apa abalondo, abafilema, abafwamaso, naba bikukwema ukwenda.’ 22Umwene umbombi yula alinkuti, ‘Malafyale, isi ulagile syo mbombile; loli ubuyo bukali bulimo.’ 23Popapo umalafyale alinkumbula umbombi gwake alinkuti, ‘Bukaga munjila na mumbaso, ukabafimbilisyege abandu ukuti bingilege, ko kuti inyumba yangu yisulege. 24Buno nikubabula une nikuti, muli bala babilikiligwe, nayumo atisakufimanyaga nkanwa ifyakulya fyangu ifya palusekelo.’ ”

Ntengo fiyo ukuya mfundigwa

(Mat 10.37-38)

25Isiku limo ifilundilo fi fingi filinkwenda nagwe Yesu; popapo alinkubasyutukila abandu, alinkubabula alinkuti, 26#Mat 10.37“Linga umundu ikwisa kumyangu, unsitakumbenga nugwise, nunna, nunkasi, nabana, nabamyabo nabalumbu, uyu atikububenga na bu bumi bwake, yo akabagila ukuya mfundigwa gwangu. 27#Mat 10.38; 16.24; Mar 8.34; Luk 9.23Uyu linga atikupimba ikipingika kyake nukungonga munyuma, akabagila ukuya mfundigwa gwangu. 28Kali ayege ywani mmyinu, uyu bo ikulonda ukuyenga ingasya atikutugala tasi nukupima untengo, ukuti akete linga ali nafyo ifya kumalikisya? 29Ko kuti bo alisye ulwalo, angisakutoligwa ukukimalisya, lelo bosa aba banketaga, bandege ukumobela, batigi, 30‘Umundu uyu alyandile ukuyenga, loli atoligwe ukumalisya.’ 31Pamo yo malafyale nki, uyu ikubuka kukulwa ubwite numalafyale unnine, uyu atikutugala tasi nukwinogona, linga abagile ukwakulwa ubwite nabandu baelifu kalongo (10,000) bo ikuya pakulwa na uyu ikwisa nabandu baelifu amalongo mabili (20,000)? 32Linga agile ukuti akabagila, po ikutuma indumi kunnine bo akali ali kubutali, ukuti bapilikisanie isya lutengano. 33Bunobuno lelo, mwesa muno muyilile, uyu linga atikufileka fyosa ifi ali nafyo, akabagila ukuya mfundigwa gwangu.

34“Umunyu go nnunu, loli apa linga umunyu gusukile, po fiyepo fiki ifya kugupelela ubukali? 35Gukabagila kukisu, kangi gukabagila ukuti guyege ndope; po bikugutaga itolo panja. Uyu linga ali nasyo imbulukutu sya kupilikila, yo alipilikaga.”

Currently Selected:

LUKA 14: NNBII

Highlight

Copy