YOHANI 21

Yesu ikubasetukila abafundigwa bahano na babili

1Panyuma pali sisisi, po Yesu alinkubasetukila kangi abafundigwa bake panyanja ya Tiberia; alinkubasetukila bo bunobuno. 2Bali pamopene na Simoni Peteri, na Tomasi uyu batigi Didimo, na Natanaeli gwa nkaya ka Kana nkisu kya Galilai, nabanya Zebedai, nabafundigwa bake abangi babili. 3#Luk 5.5Popapo Simoni Peteri alinkubabula abanine alinkuti, “Nsumwike kukuloba iswi.” Abene balinkumbula balinkuti, “Nanuswe tukubukaga nanugwe.” Popapo balinkusumuka, balinkwipaka mwiboti, loli ikilo kikyo balinkusita nukukola nasimo. 4Lelo bo bukile nulu bunju, Yesu alinkwima pisilya; loli abafundigwa bakamenye ukuti yo Yesu. 5Umwene Yesu alinkubalalusya alinkuti, “Mwe banike umwe, filipo fimo ifya kulya?” Abene balinkumwamula balinkuti, “Mma.” 6#Luk 5.6Umwene alinkubabula alinkuti, “Amusopege ulwelo kulubafu lwa kukililo kya iboti, po mukusyagaga.” Popapo balinkusopa; loli panongwa ya bwingi bwa nswi, balinkutoligwa ukulukwaba. 7Popapo umfundigwa uyu Yesu alinganile, alinkumbula Peteri alinkuti, “Yo yu Ntwa!” Umwene Simoni Peteri bo apilike ukuti yo yu Ntwa, alinkwiniemba ikilundo kyake munsana, namanga ali itolo igya kufwala, alinkwitaga munyanja. 8Loli abafundigwa abangi balinkwisa mwiboti, namanga bakali pabutali na pisilya, ubutali pikufwana pali imikwamba amalongo kalongo (100), balinkukwaba ulwelo lwa nswi. 9Lelo bo bafyukile pisilya, balinkugubona umoto gwa mababu, pamwanya yalipo iswi nikisyesye. 10Popapo Yesu alinkubabula alinkuti, “Amutwalege simo iswi isi mukolile lilino.” 11Umwene Simoni Peteri alinkwingila mwiboti, alinkulukwabila ulwelo pisilya, alinkwaga lwiswile iswi ingulumba mia yumo na malongo mahano niswi itatu (153); pope napa syali nyingi, ulwelo lulinkusita nukulatuka. 12Popapo Yesu alinkubabula alinkuti, “Isaga mulyege ifya lubunju.” Loli mbafundigwa bake, akalipo yumo unkifu ugwa kundalusya ukuti, “Gwani ugwe?” Namanga bamenye ukuti yo yu Ntwa. 13Popapo Yesu alinkwisa, alinkwega ikisyesye, alinkubapa, yope niswi bububo. 14Ulu lo lwa butatu Yesu ukubasetukila abafundigwa bake, bo asyukile mbafwe.

Yesu na Peteri

15Lelo bo balile ifya lubunju, popapo Yesu alinkundalusya Simoni Peteri alinkuti, “Simoni gwe nnya Yohani, kali unganile ukubakinda aba?” Umwene alinkumwamula alinkuti, “Ena gwe Ntwa, umenye ukuti tumanyene.” Yesu alinkumbula alinkuti, “Swilaga utung'osi twangu.” 16Alinkundalusya kangi ulwa bubili alinkuti, “Simoni gwe nnya Yohani, kali unganile?” Umwene alinkwamula alinkuti, “Ena gwe Ntwa, umenye ukuti tumanyene.” Yesu alinkumbula alinkuti, “Timaga ing'osi syangu.” 17Alinkundalusya kangi ulwa butatu alinkuti, “Simoni gwe nnya Yohani kali tumanyene?” Popapo Peteri alinkusulumania, papo alindalusisye ulwa butatu ukuti, “Kali tumanyene?” Popapo alinkumbula Yesu alinkuti, “Gwe Ntwa, ugwe usimenye syosa; usyagenie ukuti tumanyene.” Popapo Yesu alinkumbula alinkuti, “Swilaga ing'osi syangu. 18Naloli nikukubula une nikuti, apa gwali nkekepo gwifundikililaga umpango gwimwene, ulinkubuka kuko gwiganile; loli bo ukangele, kwisakugolosyaga itolo amaboko gako, po uyungi isakukufundikililaga umpango, nukukutwala kuno ukigana.” 19Loli lilili lyo Yesu ayobaga ukunangisya ubufwe ubu Peteri ayaga pakuntukifyamo Kyala. Lelo bo ayobile lilili, popapo alinkumbula alinkuti, “Ngongaga.” 20#13.25Umwene Peteri alinkusanuka, alinkumbona umfundigwa uyu Yesu alinganile, ikukonga, (yo uyu alalusyaga kukipambaga kya Yesu bo bali pakulya ifyakulya, uyu alalusyaga ukuti, “Gwe Ntwa, ywani ikukubikaga mmaboko ga balugu”) 21Bo Peteri ambwene yuyuyu, popapo alinkundalusya Yesu alinkuti, “Gwe Ntwa, bule isya uyu?” 22Umwene Yesu alinkumwamula alinkuti, “Linga niganile ukuti ayege papapa ukufika papo nikwisilaga, syo syako ndili? Ugwe ngongaga itolo.” 23Popapo ilisyu lilili lilinkubalanila mbinabo, ukuti umfundigwa yula atisakufwamo. Umwene Yesu akalinjobile ukuti atisakufwamo, loli atile, “Linga niganile ukuti ayege papapa ukufika papo nikwisilaga syo syako ndili?”

24Yuyuyu yo mfundigwa uyu ikusisimikisya sisisi, yo uyu asisimbile sisisi, kangi tumenye ukuti ulusisimikisyo lwake lo lwa naloli.

25Loli siliko isingi si nyingi isi Yesu abombile, isi linga syasimbigwaga kamo kamo, nikwinogona ukuti angali pasobile na pabubiko amabuku aga gasimbigwaga nkisu.

Currently Selected:

YOHANI 21: NNBII

Highlight

Copy