UBWANDILO 6

Ubuniongafu bwa mundu

1 # Jobu 1.6; 2.1 Bo abandu bandile ukubala pa kisu, popapo abana abalindwana balinkupapigwamo. 2Abana ba Kyala balinkwaga ukuti abana ba bandu abalindwana bamogi fiyo; balinkwegapo bamo aba babasalile ukuya bakasi babo. 3Popapo Kyala alinkuyoba alinkuti, “Mbepo gwangu atisakuyaga bwila mmundu, namanga umwene yo mundu gwa mbili itolo, ikugonaga itolo ifyinja mia yumo, namalongo mabili (120).” 4#Kuba 13.33Mmasiku galagala, kangi na panyuma gilinkuyako imindu iminywamu fiyo, lula abana ba baKyala bingilege mbana ba bandu abalindwana, nukupapamo abana. Gyo gyali mindu gya iyolo igya maka, kangi gyali mindu imifumuke.

5 # Mat 24.37; Luk 17.26; 1 Pet 3.20 Popapo Untwa alinkwaga ukuti ubutulanongwa bwa mundu bubele pa kisu, nukuti syosa inyinogono sya mundu mbibi bwila itolo. 6Popapo alinkusulumania panongwa yakumpela umundu pakisu, silinkumbaba fiyo mu ndumbula yake. 7Bunobuno Untwa alinkuyoba alinkuti, “Nikubapyutaga pakisu abandu aba nabapelile, abandu na fi finyamana, kangi nifyabumi ifi fikwendela ulwanda, na si njuni sya mumpalanga, namanga nsulumenie panongwa yakuti nafipelile.” 8Loli Noa yo alinkulyaga ilipyana nkyeni mu Ntwa.

Noa ikutendekesya ingalaba

9 # 2 Pet 2.5 Isi syo nongwa sya Noa. Umwene Noa yo ali mundu ungolofu, unsita kuyobigwamo kamo akabibi ku bandu ba mungulilo yake; kangi alinkwenda na Kyala. 10Ali na bana abalumyana batatu; Shemu, Hamu na Yafeti.

11Kyala alinkuketa alinkwaga ukuti ikisu kyonangike kiswile na bu bwite bwene. 12Bo ikukiketa ikisu alinkwaga kyonangike naloli; namanga abandu bosa ulwendo lwabo lwali lubibi pakisu. 13Popapo alinkumbula Noa alinkuti, “Ninogwine ukubapyuta bosa abandu, buno ikisu kyosa kiswile nu bwite panongwa yabo; keta, nikuya pakubapyutila, lumo nikisu. 14Utendekesyege ingalaba yako iya matapwa ga mpiki gwa mulombwa; ubikemo ifipinda nkati, kangi uyimate numpulya nkati na panja. 15Uyitendekesyege yiyege bo ulu: mbutali bwake yifwanege amafiti aba mia bana na malongo mahano (450); mbwelefu yifwanege amafiti amalongo mahano na mabili, na mafiti mahano (75) ukufyuka pamwanya yifwanege amafiti amalongo mana na mafiti mahano (45). 16Yiyege nipagalo pamwanya, yisyalengeko amafiti mabili ukufika kumwanya. Ikifigo kiyege mu mbafu; yiyege niyulu ilya pasi, ilya pakati nilya pamwanya. 17Namanga nikuya pakutuma umwelesyo pakisu, ukuti mfipyute ifya bumi fyosa pakisu, kangi nakandu kosa aka kalimo nkisu kisakulwaga. 18Loli nikubikaga ulwitikano pakati pamyako nanine, mwisakwingilaga mu ngalaba ugwe, nabanako abalumyana, unkasi gwako pamopene na bakasi ba banako. 19Mfya bumi fyosa ifya luko nuluko gwise gwegengepo fibilifibili, nukwingila nafyo mu ngalaba ikinyambala ni kikikulu, ko kuti fise fiyege fyumi palikimo nanugwe. 20Gwise gwegege fibilifibili ifya luko losa nkati mu njuni, nifinyamana na nkati muli fyosa ifi fikwendela ulwanda ukufwana nuluko lwabo. 21Mope na nifyakulya ifi abandu bikulya ukegengepo ifya luko losa, ukafibikege bununu, fyo fise fiyege fyakulya fyako ugwe nifyabumi fila.” 22#Hib 11.7Popapo Noa alinkusibomba syosa ukufwana na mumo Kyala alimbulile.

Currently Selected:

UBWANDILO 6: NNBII

Highlight

Copy