UBWANDILO 43

Abamyabo ba Yosefu bikugomokelako kangi ku Egiputi

1Loli injala yo yilinkwendelela nkisu kila; 2bo abana ba Yakobu bamalile ifyakulya fyosa ifi bayile kula nkisu kya Egiputi, ugwisabo alinkubabula alinkuti, “Mubuke kangi mukatulileko ifyakulya ifingi finandi itolo.” 3Popapo Yuda alinkumbula ugwise alinkuti, “Umundu yula atusokile fiyo atile, ‘Mutisakuketana nanine mma, linga mutikwakwisa nu nnuguna gwinu.’ 4Linga ugwe gwitike ukuntuma ugwamyitu palikimo nanuswe, po tukwikililaga tukwakukulila ifyakulya, 5loli linga kukana ukuntuma, po nanuswe tutikubukako, namanga umundu yula atulagilile ukuti, ‘Mutisakuketana nanine napanandi linga mutikwisako nu nnuguna gwinu.’ ” 6Umwene Israeli alinkubabula alinkuti, “Nongwa yafiki mwambombelaga une imbibi bo sisisi apa mwambulaga umundu yula ukuti tuli nagwe ugwamyitu uyungi?” 7Abene balinkumwamula balinkuti, “Papo twalyagile ukuti ikwandisania kabilikabili ukutulalusya isya bunyamundu bwitu ikuti, ‘Ngimba ugwisemwe akali aliko mumi? Ngimba muli nagwe yumo unnuguna gwinu?’ Uswe twamwamulaga isi atulalusyaga. Ngimba twasimenye ukuti ikutubulaga isya kuti, ‘Mukisege nunnuguna gwinu?’” 8Popapo Yuda alinkumbula ugwise Israeli alinkuti, “Untume undumyana abukege nanine po tukusumukaga, ko kuti twise tuye bumi, tuleke ukufwa, uswe na yuyugwe kangi na ba banitu bubo. 9Ungetege yuyune; gwise umbege une inongwa. Linga ndinkwakugomoka nagwe nukuntwala kumyako umumi itolo, po nise njege ni nongwa isitakumalikamo. 10Linga tukatagile akabalilo, pamo lilino angali tuyile kugomokako kabili.”

11Bunobuno ugwisabo Israeli alinkubabula alinkuti, “Linga mukuti siye bo bunobuno, po lelo mubombe isi: Muntwalileko umundu yula ifyabupi mu nyambi syinu ukufuma muli ifi filimo nkisu kyitu, ifi fikindile ubununu: Unkota ugu bikupaka, uluki, utwakufukisya, lubani, amasyabala, niseke sya mpiki gwa alimondi. 12Kangi mwege nindalama, mongelelepo kabili. Indalama sila basigomokisye mmifuko gyinu syope mwege mubukege nasyo; pamo bakasibwene. 13Mumwege na yu mwanike Benjamini mubukege nagwe, mugomokeleko ku mundu yula. 14Umwene Kyala Umwenemakagosa yo ampelege umundu yula ukuya gwa ipyana kumyinu, kokuti akabagomokesye umwe ugwamyinu yula na yu Benjamini. Loli une Linga ndagile abanangu baleke ndagege.” 15Bunobuno balinkwega ifyabupe nindalama balinkongelapo kabili na yu mwanike Benjamini, balinkusumuka ukwikilila nkisu kya Egiputi balinkwakwima nkyeni mwa Yosefu.

16Bo Yosefu ambwene Benjamini palikimo na bamyabo bala, alinkumbilikila undindilili unkulumba nnyumba yake, alinkuti, “Ubukege na bandu aba ku nnyumba yangu, ukegepo kamo aka mu ntimo ubatendekekesye iliseke, buno bikuya pakulya nanine ifyakulya fya pamusi.” 17Popapo undindilili gwa nnyumba yake yula alinkubomba bo mumo Yosefu alindagilile, alinkubatwala abandu bala ku nyumba ya Yosefu. 18Abene loli balinkutetema fiyo bo bikubingisya nnyumba ya Yosefu. Balinkwinogona balinkuti, “Pamo bikuya pakutulonga panongwa ya ndalama isi twasyagile mmifuko gyitu ulutasi lula, bikulonda ukuti bayage inongwa mmyitu po bende nukutwalukila itolo batukole ukuti tuye batumwa, po bende nukwega imbunda syitu.” 19Popapo balinkwisa bo bingile pakifigo balinkuti, “Gwe malafyale, mbwandilo twalisile pakula ifyakulya kuno; 20lelo bo tuyile kuli ka pa bugono bo tukwigula imifuko gyitu, 21tulinkwaga ukuti indalama sya mundu gwesa sili mu mfuko gwake tulinkusyaga syosa itolo mumo syayilile. 22Syo isi tugomwike nasyo tutwele, pamopene nindalama isingi isya kula ifyakulya. Loli tukammanya mma na uyu abikilemo indalama sisisi mu nyambi syitu.” 23Umwene loli undindilili unkulumba yula, alinkubabula alinkuti, “Munginogonaga nasimo, kangi mungatetemaga. Kyala gwinu, Kyala gwa gwisemwe yo uyu abikilemo ikyuma mmifuko gyinu; une nalyambilile indalama syinu.” 24Popapo alinkumwabula Simeoni alinkwisa nagwe kumyabo. Umwene undindilili unkulumba nnyumba ya Yosefu yula, alinkubingisya nnyumba ya Yosefu. Alinkubapa amisi gakusugusula mmalundi, nukusiswila nimbunda syabo. 25Abene balinkutendekekesya kilingani ifyabupe fya Yosefu, bo akali ukugomoka ukufuma ku mbombo pamusi; namanga bababulile ukuti bikuya pakulya nagwe Yosefu ifyakulya palapala.

26Lelo bo Yosefu isile ku kaya, popapo balinkuntwalila ifyabupe ifi balinafyo, balinkufugama nkyeni mmyake balinkundambila. 27Popapo Yosefu alinkubalalusya alinkuti, “Agonile ugwisemwe unkangale uyu mwanjobaga? 28Ngimba akali mumi?” Abene balinkumwamula balinkuti, “Agonile.” Kangi balinkuti, “Ena, akali mumi.” 29Popapo balinkufugama balinkundambila. Umwene Yosefu bo ikuketa, alinkumbona unnuguna gwake Benjamini uyu bafumile nagwe mu nna yumoywene. Alinkubalalusya alinkuti, “Ngimba uyu yo nnuguna gwinu unnandi kuli mwesa uyu mwalimbulilepo?” Yosefu alinkuti “Kyala akusayege gwe mwanangu.” 30Mbibi-mbibi itolo Yosefu alinkusokapo, namanga aliswile nubusyukwe kunnuguna, alinkulonda nukulila amasosi; alinkwakwingila nkipinda kyake mo alinkwakulilila mumo. Bo asuguswile kumaso, alinkwakugomoka kangi bo ikitima kimalike, 31alinkubabula ababombi bake ukuti batwale ifyakulya. 32Popapo ababombi bake balinkumpa Yosefu ifyakulya fyake pasima, bope na bamyabo pasima, abene loli aba Egiputi aba bwila balyaga nnyumba ya Yosefu, bo balinkubapa ifyabo pasima, papo abaEgiputi bikwinogona ukuti, sya kinyanyasi ukulya pamopene na baHiburi. 33Abene abamyabo ba Yosefu bo balitugele nkyeni mmyake, ukufwana na mumo bakonganile mbukulumba bwabo, ukwanda ku nkulumba kuli bosa, ukwakufika ku nnandi kuli bosa. Popapo balinkuketana kumaso po lelo balinkuswiganika itolo. 34Ifyakulya ifi balyaga, filinkuyabigwa ukufuma pa kitalati iyi Yosefu alilaga. Umwene Benjamini yo balinkunjabila fingipo kahano ukufikinda ifya banine. Bunobuno balinkulya nukunwelanila, balinkwenda nukwikyela.

Currently Selected:

UBWANDILO 43: NNBII

Highlight

Copy