UBWANDILO 14

Abramu ikumponesya Loti

1Mmasiku ga Amurafeli, umalafyale gwa kisu kya Shinara, Ariyoko, umalafyale gwa kisu kya Elasara, Kedorolaomere umalafyale gwa kisu kya Elamu, na Tidala umalafyale gwa kisu kya Goyimu, 2balinkusumusya bwite nukulwa na banyafyale aba. Bera umalafyale gwa kisu kya Sodomu, Birisha umalafyale gwa kisu kya Gomora iki kyo kisu kya Zoara. 3Abanyafyale bosa aba balinkuya palikimo nkulwa ubwite muntebela gwa Sidimu, go gu ntebela gwa Nyanja ya Munyu. 4Bwila bayaga pasi pa bulagili bwa Kedorolaomere ifyinja kalongo na fibili (12), loli nkyinja kya kalongo na fitatu (13) balinkunsambukila. 5Po lelo nkyinja kya kalongo na fina (14) Kedorolaomere pamopene na banine aba balwilaga palikimo balinkwisa, balinkubatola abanya-Refa, nkaya ka Ashiteroti-karanayimu, pamopene na banya-Zuzi aba nkisu kya Hamu, abanya-Emi aba nkisu kya Shera-kiriyatayimu, 6na banya-Horo aba nkisu ifya mfyamba ukufuma ku kyamba kya Seyiri ukwakufika pa Ela-parani muno lufikile ulungalangala.

7Po lelo balinkugomoka balinkwisa ku buyo ubu bikuti Enimishipati (nkisu kya Kadeshi) balinkwenda nukukilambika kyosa ikisu kya ba kikolo kya ba Amaleki, nifya ba Amori aba bitugalaga nkisu kya Hazazoni-tamala. 8Popapo abanyafyale ba fisu ifi: Sodomu, Gomora, Adima, Zeboimu na Bela (ikisu kya Zoara) balinkufibungania palikimo ifilundilo fyabo ifya bwite mu ntebela gwa Sidimu, 9bali nkulwa na banyafyale ba fisu ifi: Kedorolaomere umalafyele gwa kisu kya Elamu, Tidala umalafyale gwa kisu kya Goyimu, Amurafeli umalafyale gwa kisu kya Shinara, Ariyoko umalafyale gwa kisu kya Elasara, abanyafyale bana balinkulwa na banyafyale bahano. 10Untebela gwa Sidimu gwaliswile na mayibiyibi ga matope ga mfu gwa tara. Lelo bo abanyafyale ba kisu ifya Sodomu na Gomora bikubopa bamo balinkwiyingisya mmayibiyibi gala ga matope abangi loli balinkubopela ku fyamba. 11Bunobuno abalugu balinkupupa ifyuma fyosa fya nkisu kya Sodomu na Gomora, kangi ni fyakulya fyabo fyosa, popapo balinkubuka. 12Balinkunkola na yu Loti, umwana gwa gwamyabo gwa Abramu, uyu itugalaga nkisu kya Sodomu balinkupupa nifyuma fyake, balinkubuka nagwe.

13Lelo umundu yumo uyu aponile, yo alinkwakumpangila Abramu unHiburi yula, uyu itugasyaga pa mipiki gya mpandapanda igya Mamure, ugwa kikolo kya baAmori, ugwamyabo gwa Eshikolo na Aneri, bababa bo bitugalaga na Abramu. 14Umwene Abramu bo apilike ukuti umwana gwa gwamyabo bankolile babukile nagwe, alinkubabungania ababombi bake na ba bapapigwe nnyumba yake, ubwingi bwabo bali aba mia batatu na bandu kalongo na Bahano nabatatu (318), balinkubakonga munyuma abalugu bala ukwakufika nkisu kya Dani. 15Umwene Abramu alinkubasyungutila abalugu bala pakilo alinkulwa nabo nukubatola, alinkubakaga, alinkwakufika nabo nkaya ka Hoba, kululu kwa kisu kya Damaska. 16Alinkupoka kangi fyosa ifi bapupile, pamopene na yu Loti nifyuma fyake na bakikulu na bandu abangi.

Melekizedeki ikunsaya Abramu

17Bo Abramu ayile kugomoka kuno abukile kukuntola Kedorolaomere palikimo na banyafyale abangi aba balwilaga palikimo, umalafyale gwa kisu kya Sodomu alinkwisa kukwaganila nagwe Abramu pa ntebela gwa Shave (ugu lilino bikuti untebela gwa Malafyale). 18#Hib 7.1-10Popapo Melekizedeki umalafyale gwa pa buyo bwa Salemu alinkuntwalila ikisyesye nubwalwa bwa mbelesya umwene Melekizedeki yo ali mputi gwa Kyala Unkinde. 19Alinkunsaya Abramu alinkuti,

“Kyala Unkinde Umpeli gwa

kumwanya na pasi

yo akusayege ugwe Abramu.

20Kangi atufigwege Kyala Unkinde

uyu akulambikile ugwe abalugu bako!”

Popapo Abramu alinkumpa Melekizedeki

ikiyabo kimo mfiyabo kalongo

ukufuma muli ifi ayile kupoka ku balugu.

21Umalafyale gwa kisu kya Sodomu alinkumbula Abramu alinkuti, “Umbege une abandu, loli ugwe gwegege ifyuma.” 22Abramu alinkumwamula umalafyale gwa kisu kya Sodomu alinkuti, “Mfingile ulufingo nkyeni mu Ntwa Kyala Unkinde, umpeli gwa kumwanya na pasi, ndile, 23ndisakwegako nakamo akandu, nalinga bo busi bwakusonela, pamo utukoba twa filato; ukuti ungisakuyobaga ukuti, ‘Numpelile Abramu ukuya nkabi.’ 24Ndikwegapo nakamo, loli fyene fifyo abalumyana bangu balile nukuyabana na bandu aba nali nabo; Aneri, Shikolo na Mamure, loli bo begeko ikiyabo kyabo.”

Currently Selected:

UBWANDILO 14: NNBII

Highlight

Copy