UBWANDILO 13

Abramu ikupagukana na Loti

1Bunobuno Abramu alinkufyuka ukufuma nkisu kya Egiputi, palikimo nu nkasi gwake, na fyosa ifi ali nafyo, kangi na yu Loti, balinkwakufika nkisu kya kwitongo ku Negebu.

2Pa kabalilo aka Abramu ali ni kyuma fiyo, ali ning'ombe, ni ndalama isya siliva nisya golide. 3Ukufuma ku kisu kya alinkwendela nubuhesya bwake ukwakufika nkaya ka Beteli, kuno ayengile ihema ulutasi lula, pakati pa kaya ka Beteli na kaya ka Ai, 4pabuyo bula ayengilepo ikigemo kya kwikemekesya ulutasi lula; palapala po alinkwiputa ku Ntwa. 5Yope na Loti uyu endege pamopene na Abramu pabuhesya bula, ali nagyo imitimo igya ng'osi, igya ng'ombe, kangi na si hema; 6bunobuno ikisu kikabagile ukubafwana bo babili ukuti bayenge pamopene; namanga imitimo gyabo gyabele fiyo; 7kangi kulinkuyapo ukulwana pakati pa batimi ba mitimo gya Abramu na batimi ba mitimo gya Loti. Nkabalilo kalakala abakikolo kya Kanani na baPerizi bitugalaga nkisu kilakila. 8Popapo Abramu alinkumbula Loti alinkuti, “Kungayangapo ukulwana pakati pamyako nanine, kangi na pakati pa batimi bangu na batimi bako; buno tuli banyamundu. 9Uti kukiketa ikisu kyosa iki kili nkyeni mmyako? Oko, tupagukane. Linga ugwe kulabilaga ku kiboko ikimama po une nikubukaga ku kiboko ikililo; pamo linga ugwe kulabilaga ku bwa kukililo po une nikulabilaga kubwa ku kimama.” 10#Bwa 2.10Umwene Loti alinkukelengania, alinkugubona untebela gwa Lusoko lwa Yordani, ugu gwali na misi posaposa ukwakufika ku Zoara, bo mumo gwayilile ungunda gwa Ntwa, pamo ikisu kya Egiputi; momumo kyope kyayilile bo Kyala akali ukutupyuta utwaya tula utwa Sodomu na Gomora. 11Popapo Loti alinkwisalila untebela gosa ugwa Lusoko lwa Yordani, alinkulabila ku bwa busokelo ilisuba; bunobuno balinkwenda nukupagukana. 12Abramu alinkuyenga nkisu kya Kanani, umwene Loti alinkuyenga ntwaya utwa muntebela, alinkusama ukulabila nkaya ka Sodomu mo alinkuyenga ihema yake. 13Abene abandu ba nkaya ka Sodomu bo bali baniongafu, kangi bali batulanongwa fiyo nkyeni mu Ntwa.

Abramu ikusama ukubuka kukaya ka Hebroni

14Bo Abramu apagukene na Loti, Untwa alinkumbula Abramu alinkuti, “Ukufuma apa gwimile, uketege kubwa kululu na kubwa kwitongo, kubusokelo ilisuba na ku buyongelo ilisuba. 15#Imbo 7.8Ikisu kyosa iki kukibona kyosa nisakukupaga ugwe palikimo na ba nduyungu lwako, ukuti kiyege kyinu bwila na bwila. 16Nisakubolosyaga aba nduyungu lwako, bisakuyaga bo gu nsanga gwa kisu; uyu linga amenye ukugubala unsanga gwa kisu, po bo abagile nukwisa kubabala bope na ba nduyungu lwako. 17Sumuka lelo gwende nkisu kyosa, mbutali bwake na mbwelefu bwake, buno kyo nisakukupaga ugwe.” 18Po lelo Abramu alinkusamisya ihema alinkwakuyenga pabupipi ni mipiki gya mpandapanda igi gyali pa buyo bwa Mamure ubu buli nkaya ka Hebroni, kulakula ko alinkunjengela Untwa ikigemo kyakwikemekesyapo.

Currently Selected:

UBWANDILO 13: NNBII

Highlight

Copy