IMBOMBO SYA BATUMIGWA 14

Nkaya ka Ikonia

1Lelo bo bafikile nkaya ka Ikonia balinkwingila nnyumba yakwiputilamo ya baYuda, balinkusiyoba fiyo inongwa, po apa ikilundilo ikikulumba ikya baYuda na baGriki kilinkwitika. 2Abene loli abaYuda abasitakwitika, balinkubasambulania abapanja, balinkusyonanga inyinogono syabo, ukuti babakalalilege abamyabo. 3Lelo popapo Pauli na Barnaba balinkugonapo akabalilo akatali, balinkuyoba nubukifu itolo mungamu ya Ntwa, uyu alisisimikisyaga ilisyu lyake ilya ipyana, mfika na mfiswigu ifi apelelaga mmaboko gabo. 4Loli abene abandu ba nkaya balinkutapukana; bamo balinkuya kulubafu lwa baYuda, abangi balinkuya kulubafu lwa batumigwa. 5Lelo bo abapanja nabaYuda pamopene nabalagili bikuti tubangalile nukubatika namabwe, 6abene balinkusipilika, balinkuyongela nkaya ka Listra na ka Derbe nkisu kya Likaoniya na nkisu kya mumbali; 7mo balinkufumusya Inongwa Inunu.

Nkaya ka Listra nakaDerbe

8Lelo alimo mumo nkaya ka Listra umundu yumo umonywa amalundi, uyu alemele ukufuma munda munna, yo akalyendilemo siku. 9Alinkupilika isi ayobaga Pauli alinkundulalila. Lelo bo ambwene ukuti ali nalo ulwitiko ulwa kuti ikubumbulusigwaga, 10alinkuyoba ilisyu ilikulumba alinkuti, “Sumukaga gwimege namalundi gako, ugolokege!” Popapo alinkunyela itolo, alinkwenda. 11Lelo bo ifilundilo fisibwene isi abombile Pauli, popapo abandu balinkwinula amasyu balinkuyobela nkiLikaoniya balinkuti, “Bakyala basulwike, bisile mmyitu nkifwani kya bandu.” 12Barnaba balinkumpa iya Zeu, umwene Pauli balinkumpa iya Herme;#14.12 Zeu na Herme: tali bakyala ba baGriki. papo inongwa syosa asiyobaga yuyo. 13Popapo umputi gwa kyala Zeu, uyu inyumba ya kyala gwake yali nkyeni nkaya, alinkutwala ingambaku ningata ya bulenge, alinkufitwala pakipata, alinkulonda ukwikemesya kumyabo, yuyo pamopene nifilundilo. 14Loli abene abatumigwa Barnaba na Pauli bo basipilike sisisi, balinkunyafulania imyenda gyabo, balinkubopa nukwakwingila nkilundilo, balinkukolela balinkuti, 15#Kuso 20.11; Salimo 146.6“Mwe tunya, syo mukubomba sya fiki sisisi? Buno nanuswe tuli bandu itolo bo yuyumwe, tubatwalile Inongwa Inunu iya kuti mugomokeko kufya itolo ifi, mupindukilege kwa Kyala umumi, uyu apelile kumwanya nikisu, ninyanja na fyosa ifi filimo mumo. 16Mungulilo isi sikindile, afilekile ifikolo fyosa ukuti fyendege munjila syabo; 17pope alinkusita nukuleka ukwibonesya mumbombo inunu isi ikubomba, ikubapa ifula ukufuma kumwanya, nutubalilo twa mboto, ikubisukisya ifyakulya nulusekelo mundumbula syinu.” 18Popapo balinkutamigwa fiyo pakufikanisya ifilundilo namasyu gagaga, ukuti bangikemesyaga kumyabo. 19Lelo popapo balinkwisa abaYuda aba bafumile nkaya ka Antiokia na ka Ikonia, balinkufisonga ifilundilo, balinkuntika Pauli namabwe, balinkunkwaba nukunsosya nkaya, balinkuti afwile. 20Lelo bo abafundigwa bansyungutile, popapo alinkusumuka, alinkwakwingila nkaya. Ulwa kilabo, alinkusoka ukubuka nkaya ka Derbe pamopene na Barnaba.

Bikugomokela nkaya ka Antiokia nkisu kya Siria

21Lelo bo balumbilile Inongwa Inunu nkaya kala, nukubapela batundigwa abandu ba bingi itolo, popapo balinkugomoka ukubuka nkaya ka Listra na ka Ikonia, nukwendelela ukubuka nkaya ka Antiokia; 22balinkugikasya imyoyo gya bafundigwa, nukubasukania ukuti bayege mu ndwitiko, nukuti fikuti, “Twendege mbutolwe ubwingi fiyo ukwingila mbutwa bwa Kyala.” 23Bo babimike abakulu mfipanga fyosa, balinkwiputa nukufipika ifyakulya, balinkubabika mmaboko ga Ntwa uyu balimwitike.

24Popapo balinkukisania nkaya ka Pisidia, balinkwakufika nkaya ka Pamfilia. 25Lelo bo balumbilile ilisyu nkaya ka Perge, popapo balinkusuluka ukubuka nkaya ka Atalia. 26Ukufuma mumo balinkwipaka mungalaba, balinkubuka nkaya ka Antiokia, mumo babikigwaga mwipyana lya Kyala kumbombo iyi bayimalisisye. 27Lelo bo bafikile, popapo balinkukibungania ikipanga, balinkupanga syosa isi Kyala abombile nabo, nukuti abigulile abapanja ikifigo kya lwitiko. 28Popapo balinkugonapo nabafundigwa akabalilo akatali.

Currently Selected:

IMBOMBO SYA BATUMIGWA 14: NNBII

Highlight

Copy