Markus 4
4
Yesus majar mara tintun cara dulun norima Antun Mohotara
4:1-20
(Mat. 13:1-23; Luk. 8:4-15)
1Yesus majar mara kole nyan saran danau. Orong lau dulun dombut hotorenye ngorumbung Are. Jadi, Are cakat jukung co oko nyan danau cioh. Are tuot majar mara ingkan intin samir dulun ngarun oko nyan banut. 2Yesus majar mara orong aang indan doh ma hapo tindung. Ponah ajar bara-Eh, Are mantun, 3“Ngonehehboh! Oko potani co tulak morawuh jangoi. 4Kotika are dahat morawuh eh, oko jangoi co nokah nyan calan. Kawan beleu dombut paluh kuman eh dapot punah. 5Oko ka jangoi co nokah nyan tana co hobatu, co aroko orong tanaeh. Jangoi cioh jion during awi tanaeh mipih. 6Kawan imbun taiyoh aroko dalo jalom hakat. Maka tului kopanai mai, kawan imbun taiyoh jarin molanyu, paluh kojang hintang matoi. 7Oko jangoi co bokon co nokah nyan tohun humput duhi. Humput duhi taiyoh nyuluh hintang ngaluk jangoi cioh dapot aroko mua. 8Tapi oko jangoi co nokah nyan tana co subur. Kawan imbun ingkan jangoi taiyoh nyuluh pio, mohasir orong bua. Oko co mohasir tolum pulu kali lipet. Oko co bokon onom pulu kali lipet. Oko ka co mohasir dapot solatuh kali lipet.”
9Opah ngesah tindung cioh, Yesus mantun, “Ome co oko tolingaieh kojereeh boh are ngoneh.”
10Kotika Yesus tarop, duo balas rasul-Eh hintang kawan murid-Eh co bokon ngisok tintun tindung cioh. 11Jadi, Yesus monjelas eh ma iroh. Hie-Eh, “Ikan ocop ihin pomahaman tintun Korojaan Mohotara co arinai tomonau dongam. Tapi, ma kawan dulun nyan luar, Akuh majar mara kokon aang ma hapo tindung. 12Akuh umpi iyoh ina:
‘Iroh horoholuh nolangon alogawin Mohotara tapi samah sindo aroko paham maksut eh.
Iroh horoholuh ngoneh borita ingkan Mohotara, tapi samah sindo aroko paham.
Jadi, iroh aroko naat kawan dosan doh hintang bolum ngonjorih atoi Mohotara. Maka, iroh aroko lian tomampun.’ ”#4:12 Ingkan buku Yesaya 6:9-10.
13Paluh Yesus mantun ma iroh, “Amun ikan aroko paham tindung cioh, maindeoi ikan lian paham kokon tindung co bokon? 14Tuhboh artieh tindung cioh. Potani co morawuh jangoi iyohonon dulun co porapot Antun Mohotara. 15Tana calan cioh niin gamaran kawan dulun co ngoneh Antun Mohotara. Tapi, lansung Lacan Setan dombut hintang umpi iroh solingo Antun Mohotara, dapot atoi doh aroko porocaya. 16Tana co hobatu cioh niin gamaran kawan dulun co ngoneh Antun Mohotara, jion norimaeh ma kojorih. 17Tapi iroh baya porocaya sonyulu leh awi aroko hakat ponah atoi doh. Amun iroh nohimo pondoritaan atawa tonyiksa tului iroh porocaya Antun Mohotara, maka iroh aroko kolu porocaya Antun Mohotara bat. 18Tana co ponu humput duhi gamaran kawan dulun co ngoneh Antun Mohotara, 19tapi kotahin aang eh iroh koatir tintun kobolum nyan dunia tuh. Iroh tonipu bahawa koponatou meleh penting. Iroh mahi oko kawan kojere indan kawan aang co bokon. Kokon iyoh ngaluk iroh dapot iroh aroko mua iyohonon iroh aroko bolum sosuai ma Antun Mohotara. 20Hintang jangoi co nokah nyan tana co subur cioh somporengu kawan dulun co ngoneh tarung cioh hintang norimaeh, iroh mua orong, oko co tolum pulu kali lipet, oko co onom pulu kali lipet, hintang oko co solatuh kali lipet hasir eh.”
Dulun sobulih ngoneh antun Yesus ma kopio hintang hobagi ma dulun bokon
4:21-25
(Luk. 8:16-18)
21Yesus mantun ka, “Amun oko dulun co ngomolum lampu, are aroko nutup eh ma buong atawa mandak eh nyan pinda ika ponirui. Tapi are umpi lampu cioh nyan tungkui meja ina laoh cioh pandau. 22Samah isan iyoh, kokon aang co tocuhuk angar leha; kokon aang co rohosia angar tomonau. 23Amun nyau paham, ngoneh ehboh pio-pio antun-Kuh!”
24Paluh, Yesus mantun ma iroh, “Ngoneh ehboh pio-pio ome co tomajar tomara Kuh ma ikan. Ukuran hapam me mukur dongam, Mohotara angar hapo ukuran co samah yoh ika mukur ikan. Malah ikan angar ihin meleh bahat kole. 25Awi dulun co ocop empun aranaang, angar ihin meleh orong kole; tapi dulun co aroko empun aranaang, ome co oko nyan are angar tomonu ingkaieh.”#4:25 Yesus hapo paribohasa cotuh ika monjelas pomahaman dulun tintun aang co Bujur hintang Korojaan Mohotara. Kawan dulun co bujur-bujur norima-Eh angar paham meleh orong hintang meleh jalom. Tapi dulun co nongkuloi-Eh, aroko angar paham ome-ome.
Korojaan Mohotara samah isan jangoi co nyuluh
4:26-29
26Yesus mahi mantun, “Korojaan Mohotara samah isan kesah cotuh. Oko dulun co morawuh jangoi nyan tana. 27Hayak ondo mamalom, are tirui. Hayak ondo pandau, are monyun. Soponehan iyoh, jangoi mongkup hintang during. Are aroko monau maindeoi caraeh iyoh tojadi. 28Ma caraeh tarop, tana pokusit hasir eh. Kosulak eh, mongkup, nyuluh. Opaiyoh, hotangkai. Paluh buaeh. 29Amun buaeh ocop osak, dulun cioh mutoieh awi ocop waktueh ina tomutoi.”
Korojaan Mohotara samah isan luang sawi#4:30 Imbun sawi nyan Israel aroko sama ma imbun sawi co oko nyan ika tito. Imbun sawi nyan idi boraoi nyuluh kohunyung tolu meter hintang hodaan orong kawun kawan beleu hegah nguan salah doh inyai.
4:30-34
(Mat. 13:31-35; Luk. 13:18-19)
30Yesus mantun kole, “Ito lian mombanding Korojaan Mohotara ma ome? Ito lian umpi gamaran eh ma tindung comoh? 31Korojaan Mohotara samah isan luang sawi co tomimbun nyan tana. Mula luang sawi co poko nyai ingkan kokon muder jangoi. 32Tapi, hiah waktu luang sawi cioh nyuluh, imbun cioh jarin meleh bahai hangki kokon imbun co bokon. Kawan daan imbun cioh cukup kahai dapot kawan beleu lian nyalah hintang bolindung inyaieh.”
33Isaniohboh Yesus majar mara dulun ma hapo orong tindung isan iyoh, sosuai ma komampuan doh ika paham. 34Yesus horoholuh hapo tindung amun Are majar mara kawan dulun taiyoh. Tapi amun ma kawan murid-Eh, Are monjelas kokoieh ma iroh.
Yesus umpi bahi lowut jarin ranai
4:35-41
(Mat. 8:23-27; Luk. 8:22-25)
35Hiah cohit ondo cioh, Yesus mantun ma kawan murid-Eh, “Haas ito tulak hia pohoi danau.” 36Jadi, iroh naat dulun ngarun yoh hintang tulak homboh Yesus. Iroh cakat jukung co ika Yesus tuot ika majar mara niin. Oko kawan jukung bokon co umba ka. 37Waktu iroh nyan tohun danau yoh, nongkocok oko bahi lowut dombut. Kawan umbak nampuh jukung doh hintang muntam hia ponah dapot jukung cioh jonyo kuntop ma danum. 38Tapi, hiah waktu iyoh, Yesus dahat tirui nyan lai jukung hapo tingkang. Jadi, kawan murid-Eh monyun Are. Hien doh ma-Eh, “Pa Guru, mositi ito angar matoi! Kura Iko aroko poruli?!”
39Yesus monyun, paluh ngorangat bahi cioh, hintang mantun ma danau, “Tonih, aroh holiap!” Paluh bahi ranai, hintang danau aroko holiap bat. 40Paluh, Are mantun ma kawan murid-Eh, “Kura ikan takut? Kura Ikan aroko porocaya ma-Akuh?”
41Iroh takut lau. Hien doh ico ma co bokon, “Dulun cotuh bohimat lau.. Bahi hintang danau mahi tuhit ma-Eh!”
Currently Selected:
Markus 4: TBSS
Highlight
Share
Copy
Want to have your highlights saved across all your devices? Sign up or sign in
