Matius 18
18
Monurut Mohotara, ome poko tohormat
18:1-5
(Mrk. 9:33-37; Luk. 9:46-48)
1Opaiyoh, kawan murid Yesus dombut hia-Eh. Hien doh, “Ome co poko tohormat ponah Korojaan Sorga?”
2Yesus naah ico anak daja paluh mehen eh nyan tohun-tohun iroh. 3Hien Yesus, “Porhati ehyoh! Ikan sobulih naat dosa hintang tuhit ngonyorih Mohotara kawun jarin isan anak daja cotuh. Amun aroh, maka ikan aroko angar muntam hia ponah Korojaan Sorga. 4Tapi dulun co randah atoieh isan anak daja cotuh, maka are iyohco dulun co poko tohormat ponah Korojaan Sorga. 5Sika dulun co norima anak daja isan otuh tului porocaya ma Akuh, samah ma are norima Akuh leh.”
Kawan murid Yesus sobulih ngolawan dosa
18:6-11
(Mrk. 9:42-48; Luk. 17:1-2)
6 Yesus mahi mantun, “Sika dulun co monyebap ico ingkan kawan anak daja co porocaya ma-Akuh ina umpi dosa, Mohotara angar mohukum dulun cioh. Jadi, meleh pio indaieh amun oko loong batu tomowot nyan koraieh, paluh porotong eh ponah laut. 7Colakaboh kawan dulun nyan dunia tuh awi oko orong aang co umpi iroh bodosa. Mula kawan aang tanon sobulih oko, tapi Mohotara angar mohukum sika dulun co umpi dongai bodosa!
8Amun silum atawa paam mu umpi iko bodosa, mungkong paluh mende bat iyoh. Awi, meleh pio amun iko haba bolum sokotahi-tahieh nyan sorga arelu oko silan silum atawa paam non, hangki iko tenden oko silum hintang paam non paluh tomende hia ponah apui noraka daai. 9Amun matam umpi iko bodosa, ngoluet hintang mende luang matam mu non! Awi meleh pio amun iko haba bolum sokotahi-tahieh nyan sorga arelu oko ico luang matam, hangki iko tenden oko duo luang matam paluh tomende hia ponah apui noraka daai.
10Mingatlah, aroh mongangap randah ico ingkan kawan anak daja tatuh. Awi, porhatiehlah otuh: Oko kawan molekat nyan sorga co jaga iroh. Kawan molekat taiyoh horoholuh boraoi oko nyan tohimo Tamang-Kuh nyan sorga. [11Poko tului iyoh Anak Kolunon dombut ika nyolamat dulun co bodosa.]”
Tindung Yesus tintun domba co dajat
18:12-14
(Luk. 15:4-7)
12Ome pondapatmu tintun cuntu cotuh? Sompamaeh oko dulun co empun solatuh kontuluh domba. Amun are niho ico kontuluh domba awi domba cioh dajat, Mainboh are aroko angar naat suoi pulu suoi kontuluh domba co bokon nyan lungkuh ika tulak nganyap co dajat cioh? 13Ngoneh ehlah! Amun are bohasir popak domba cioh, mositi are angar mias kojorih. Are angar meleh kojorih awi haba ico domba cioh hangki suoi pulu suoi domba co aroko dajat. 14Sanioh ka Mohotara Tamam me co nyan sorga aroko kolu ico mahi ingkan kawan dulun co punan porocaya ma-Akuh tuh dajat.
Cara nosehat konduang co bodosa
18:15-20
15“Amun konduangmu umpi dosa, tulakbat socara pribadi hiaeh ika nopoh are. Amun are ngoneh iko, maka iko ocop mehen are hopuli ina are bolum ma cara co buah. 16Amun are aroko kolu ngoneh topoh mu, tulakbat hiaeh kole hintang mehen ico atawa duo beti saksi bokon ma iko. Awi oko tonulih ponah Surat Borasih ma duo atawa tolu beti saksi porokara cioh boraoi tomasti.#18:16 Poraturan cotuh ingkan buku Ulangan 19:15. 17Amun are aroko kolu ngoneh topoh doh, porapot ehbat porokara cioh ma jomaat. Amun are aroko kolu ka norima topoh jomaat, maka angapbat are iyohco dulun co kuloi umbot bodosa isan dulun co aroko nyono Mohotara atawa tukang nakih pajak.
18Porhati ehlah otuh! Ome co tomowot me nyan dunia tuh, aang cioh angar tomowot ka nyan sorga. Ome co tomolapas me nyan dunia tuh, aang cioh angar tomolapas ka nyan sorga.
19Ngoneh eh ka lah: Amun duo beti atawa labih nyan halo ikan nyan dunia tuh hosopakat tintun ome bewe paluh mondoa aang cioh, maka Tamang-Kuh nyan sorga angar mongabul doa cioh. 20Awi, amun duo atawa tolu beti hokumpur ponah arang-Kuh, maka Akuh oko nyan tohun-tohun iroh.”#18:18-20 Yesus mihi hak ma jomaat ika umpi koputusan ponah kawan porokara isan nyan ayat 15-17. Kosatuan dulun porocaya umpi tindakan hintang doa to (nyan dunia tuh) meleh sosuai ma kojere Mohotara (nyan sorga).
Ito sobulih horoholuh mongampun dongan to
18:21-35
21Opaiyoh Petrus dombut hia Yesus. Hieeh, “Tuhan, amun konduang kuh umpi dosai ma akuh, dapot hotompira kali akuh sobulih mongampun are? Main dapot hotompitu kali, pai?”
22Yesus mantun maeh, “Aroh hotompitu kali. Ngoneh ehlah otuh: Iko sobulih horoholuh mongampun are aroko hopaieh.
23 Iko sobulih mongampun dongam awi Mohotara ocop mongampun iko. Korojaan Sorga samah isan kesah cotuh. Oko ico laca co nyau mohitung rekenan duit co tomotindah eh ma kawan polayan eh. 24Jadi, are molai morisa utang hopomasing polayan eh. Waktu iyoh, oko ico polayan co utang eh bojuta-juta.#18:24 Tek asli, bohasa Yunani hapo ‘sopuluh ribu tolenta’. Polayan cioh tomehen nohimo laca. 25Tapi awi dulun cioh aroko hegah molunas utang eh, laca cioh morentah ina are tomonjuar sobagai cipon kawun anak oruh eh hintang kokon hartaeh ika tahur utang eh. 26Maka, polayan cioh nukup bolutut nyan tohimo laca. Hieeh, ‘Dohop sabar houn ma akuh. Akuh angar nahur kokon utang kuh.’ 27Laca cioh nongkomo masi ma polayan cioh kojekaieh are tomombebas hintang utang eh tomangap lunas.
28Tapi, kotika polayan cioh pusit hintang sopopak ma jolahai bogawi co tohutang ma are boribu-ribu,#18:28 Tek asli, bohasa Yunani hapo ‘solatuh dinar’. Utang cioh cukup orong tapi kolik tomombanding ma utang tioh co ocop tomongampun laca. are nawan paluh ngacak koran jolahaieh yoh. Hieeh, ‘Nahur utangmu!’ 29Jolahaieh yoh nukup bolutut nyan tohimoeh paluh nyawot asi, ‘Dohop sabar houn ma akuh. Akuh angar nahur kokon utang kuh.’ 30Tapi are kuloi. Are nyarah jolahaieh yoh ina tomonjara dapot are hegah nahur kokon utang eh.
31Kawan jolahaieh bogawi co bokon kito iyoh. Iroh korinah jorung paluh mara kokon iyoh hia laca. 32Jadi, laca cioh naah polayan eh yoh. Hien laca cioh maeh, ‘Iko polayan co jahat. Akuh ocop mohapus kokon utangmu awi iko nyawot asi hia akuh. 33Jadi kura iko aroko porahan komasi mu ka ma jolahammu, samah isan akuh ocop porahan komasi kuh ma iko?’ 34Sangit lau laca cioh. Are nyarah polayan cioh hia kawan ponjaga seper ika tomohukum dapot are nahur kokon utang eh.
35Samah isan laca cioh mohukum polayan eh, Tamang-Kuh nyan sorga angar mohukum ikan amun ikan aroko tuu-tuu mongampun konduangme.”
Currently Selected:
Matius 18: TBSS
Highlight
Share
Copy
Want to have your highlights saved across all your devices? Sign up or sign in
