Yohanes 21
21
Yesus poleha arop ma kawan murid-Eh nyan banut danau Tiberias
21:1-14
1 Bopira ondo opaiyoh, Yesus poleha arop-Eh kole ma kawan murid-Eh. Iyoh tojadi nyan banut danau Tiberias. Santuh tojadieh:
2Bopira murid Yesus co hokumpur. Oko Simon Petrus, Tomas (co tonisi ‘Anak Tatup’), Natanael (ingkan desa Kana nyan propinsi Galilea), duo anak Sebedeus,#21:2 Duo anak Sebedeus iyohco Yokobus doruo Yohanes. hintang duo murid-Eh co bokon. 3Hien Simon Petrus ma iroh, “Akuh nyau tulak monyala.”
Hien doh maeh, “Kaih mahi umba.” Jadi, iroh tulak cakat jukung. Tapi, ico komomi cioh iroh aroko haba ome-ome.
4Waktu ondo ocop molai pandau. Yesus tonjok nyan saran danau. Tapi kawan murid taiyoh aroko monau bahawa iyoh Yesus. 5Hien Yesus ma iroh, “Ooi kawan jolaha, mainboh ikan haba ocin?”
Useh doh, “Arinai!”
6Yesus mantun ma iroh, “Nimbai bat jala me nyan topit kontou jukung, maka ikan angar haba ocin.” Paluh, iroh nimbai jala nyan intin. Iroh haba korinah kongorong ocin dapot iroh aroko hegah ngocet eh hopuli hia ponah jukung cioh.
7Murid co tongasih Yesus yoh mantun ma Petrus, “Dulun nyan banut non iyohco Tuhan!” Kotika Petrus ngoneh iyoh, are nope lembon eh awi sorinaieh are loheng-loheng. Paluh, are tajun hia ponah danum, nangui hia banut. 8Opaiyoh, kawan murid co bokon ngonulu hapo jukung, samir ngocet jala nyan uwoi likut co ponu ma ocin. Iroh aroko ocu ingkan banut, kira-kira solatuh meter leh.
9Kotika iroh toka ingkan jukung, iroh noto oko bahon apui hintang nyan tungkuieh oko ocin hintang rute. 10Hien Yesus ma iroh, “Mehenbat pira-pira ocin, co punam me haba non.”
11Paluh, Simon Petrus cakat hia jukung holuh hobehet jala cioh hia tana. Jala cioh ponu ma ocin co bahai-bahai, solatuh limam pulu tolu kontuluh. Oluco kongorong iyoh, jala cioh aroko tirat. 12Hien Yesus ma iroh, “Haas boh, ito nontamar.” (Kokon murid-Eh monau bahawa iyoh iyohco Tuhan Yesus. Jadi, arelu oko nyan halo iroh co bohanyi ngisok ma-Eh, “Omeboh Iko?”)
13Opaiyoh, Yesus maju monu rute haluh mihi indan doh, sanioh ka ma ocin cioh. 14Iyohboh kohontolu kalieh Yesus poleha arop-Eh ma kawan murid-Eh opah Are bolum hopuli.
Yesus nyuhu Petrus monjaga kawan dulun co porocaya
21:15-19
15Opah iroh nontamar, Yesus mantun ma Simon Petrus, “Simon, anak Yohanes, mainboh iko mongasihi Akuh meleh hangki iroh tuh mongasihi Akuh?”
Useh Petrus ma-Eh, “Bujur Tuhan! Iko monau bahawa akuh mongasihi-Iko.”
Hien Yesus maeh, “Nyorunuhboh kawan dulun co porocaya ma-Akuh, samah isan dulun co tukang nyorunuh kawan domba.”
16Paluh, Yesus ngisok kole, indan co kohonuo kalieh. Hie-Eh, “Simon, anak Yohanes, mainboh iko mongasihi Akuh?”
Useh Petrus ma-Eh, “Bujur Tuhan! Iko monau bahawa akuh mongasihi-Iko.”
Hien Yesus maeh, “Nyorunuhboh kawan dulun co porocaya ma-Akuh, sama isan dulun co tukang nyorunuh kawan domba.”
17Opah iyoh, Yesus ngisok kole, indan kohontolu kalieh. Hie-Eh, “Simon, anak Yohanes, mainboh iko mongasihi Akuh?”
Petrus nongkomo jorung lau tului Yesus ngisok iyoh dapot hontolu kali. Hien Petrus ma-Eh, “Tuhan, Iko monau kokon aranaang. Iko monau bahawa akuh mongasihi-Iko!”
Hien Yesus maeh, “Nyorunuhboh kawan dulun co porocaya ma-Akuh, sama isan dulun co tukang nyorunuh kawan domba. 18Ngoneh ehboh, tuu bujur co tomantun-Kuh tuh: Hiah waktu iko rahat kobungah, iko leh mowot kahangmu tarop. Iko nyolana hia omoh bewe kojeremu. Tapi hiah waktu iko ocop ongko daai, iko angar nyoro duo silummu. Dongam mu angar mowot iko paluh mehen iko hia ika co aroko tongonjeremu.” 19(Yesus mantun iyoh ika poleha caraeh Petrus angar matoi. Pompatoieh ma cara cioh, angar poleha bahawa Mohotara tohormat.)
Opah Yesus mantun iyoh, Are mantun ma Petrus “Umba bat Akuh!”
Murid co bokon sala bopikir bahawa Yohanes aroko angar matoi
21:20-23
20Kotika Petrus noto hia uwoi likut, are kito oko murid bokon rahat ngonulu iroh. Murid cioh iyohco murid co poko tongasih Yesus. (Hiah waktu iroh samah kuman batuh, murid cioh iyohco murid co tuot doni Yesus paluh ngisok, “Tuhan, omeboh cioh co cagar mohianat-Iko?”)#21:20 Noto Yohanes 13:23-25.
21Kotika Petrus noto murid cioh, are mantun ma Yesus: “Tuhan, omeboh co angar tojadi ma are tuh?”
22Useh Yesus, “Aroh momikir tintun roncana-Kuh indan dongam mu. Sompamaeh, Akuh nyau ina are tenden bolum dapot Akuh dombut hopuli, onon bokon urusanmu. Tapi Akuh nyuhu iko: ngumbabat Akuh.”
23Tului Yesus mantun iyoh, tosebarbat tarung nyan halo kawan dulun porocaya bahawa murid cioh aroko angar matoi. Podahar Yesus aroko mantun bahawa murid cioh aroko angar matoi, Yesus baya mantun, “Sompamaeh, Akuh nyau ina are tenden bolum dapot Akuh dombut hopuli, onon bokon urusanmu.”
Tontiput kawan antun Yohanes
21:24-25
24Murid cioh iyohco murid co bosaksi tintun kokoieh tuh. Areboh co ocop nulih eh. Ito monau bahawa antun eh bujur.
25Incah oko orong aang bokon co tongompian Yesus. Sompamaeh aang taiyoh tonulih boroico ico, akuh bopikir aroko angar oko muat tolungai nyan ngolauh dunia ika mandak kawan buku tatuh.
Currently Selected:
Yohanes 21: TBSS
Highlight
Share
Copy
Want to have your highlights saved across all your devices? Sign up or sign in
