Yohanes 20
20
Yesus bolum hopuli
20:1-10
(Mat. 28:1-10; Mrk. 16:1-8; Luk. 24:1-12)
1Nyan ondo Mengu, ngonyua-nyua lau, kotika ondo incah pindong, Maria Makdalena tulak hia kolowong Yesus. Are kito batu tutup calan muntam guha kolowong cioh kolinang ingkan ikaeh. 2Maka, are tongkoru nyopopak Simon Petrus hintang ico murid co bokon co tongasih Yesus. Hien Maria ma iroh ruo, “Ontun Tuhan ocop tomonu ingkan kolowong! Kaih aroko monau nyan omoh Are tomandak.”
3Maka, Petrus hintang murid co bokon yoh holuh tulak hia kolowong. 4Iroh ruo tongkoru, tapi murid co bokon yoh tongkoru meleh dere hangki Petrus sohinga are meleh houn tocak kolowong. 5Murid co bokon cioh hoop-hoop ngoncongat hia ponah kolowong. Are noto oko benang nyan intin, benang co hapan ika mungkuh ontui-Eh. Tapi, are aroko muntam hia ponah. 6Paluh, Simon Petrus ngonulu. Kotika are dapot, are holuh muntam hia ponah kolowong cioh. Are mahi kito benang co hapan ika mungkuh ontui-Eh nyan intin. 7Tapi benang co hapan molilit kuhung-Eh, aroko topandak halo benang co hapan indan batang beti-Eh, benang cioh tolipat nyan ika co bokon ma iyoh. 8Opaiyoh, murid co bokon mahi muntam, iyohonon murid co meleh houn tocak nyan kolowong. Are noto paluh porocaya bahawa Yesus bujur-bujur bolum hopuli. 9(Awi kotahin iyoh, iroh arinai paham ma antun co tonulih ponah Surat Borasih bahawa Are sobulih bolum hopuli ingkan pompatoi.) 10Paluh, kawan murid Yesus taiyoh buli.
Yesus poleha arop ma Maria Makdalena
20:11-18
11Tapi Maria Makdalena tonjok nyan muka kolowong Yesus hintang nangih. Samir nangih, are hoop-hoop ngoncongat hia ponah kolowong cioh. 12Nongkocok, are kito duo molekat co holembon bura. Molekat duo iyoh tuot nyan nyulon ika ontun Yesus tomandak. Ico molekat tuot nyan topit kuhung hintang co icoeh kole nyan topit paai. 13Hien kawan molekat taiyoh maeh, “Bu, kura iko nangih?” Useh Maria, “ontun Tuhan-Kuh ocop tomonu. Akuh aroko monau nyan omoh Are tomandak.”
14Opah are mantun sanioh, are ngolet hia uwoi likut kito oko dulun co tonjok nyan intin. Iyoh Yesus, tapi Maria aroko monau bahawa iyoh iyohco Yesus. 15Hien Yesus maeh, “Ine, kura iko nangih? Iko nganyap ome?”
Maria nyompan dulun cioh tukang kabun. Paluh, Maria mantun, “Pa, amun Iko co ngandih ontui-Eh ingkan intoi, dohop mara ma akuh nyan omoh Iko mandak-Eh ina kuh boraoi monu-Eh.”
16Hien Yesus maeh, “Maria!”
Maria bopaling, sadar iyoh Yesus. Hieeh, “Rabuni!” (Ponah bohasa Ibrani antun cioh artieh ‘Guru’.)
17Hien Yesus maeh, “Aroh nantot Akuh awi Akuh arinai nukat hia Tamang-Kuh. Tapi, tulakbat hia kawan konduang-Kuh. Mantunbat ma iroh bahawa makitu Akuh angar tulak hia Tamang-Kuh, iyohonon Tamam me ka. Are iyohco Mohotarang-Kuh hintang Mohotaram me ka.” 18Maka Maria Makdalena tulak hia kawan murid Yesus. Are mahi mara ma iroh bahawa are ocop kito Tuhan. Are mahi mara ma iroh bahawa Yesus co mantun kawan aang taiyoh ma are.
Yesus poleha arop ma kawan murid-Eh
20:19-23
(Luk. 24:36-39,47-49)
19Kotika ondo ocop mamalom hiah ondo Mengu cioh, kawan murid Yesus hokumpur nyan ico lopo. Iroh ngunci kawan antop eh awi iroh takut ma kawan pomimpin dulun Yahudi. Nongkocok, Yesus dombut, tonjok nyan tohun-tohun iroh. Hie-Eh, “Kongolandah kongolami indam me!” 20Opah Are mantun iyoh, Are porahan ma iroh nyulon dingan eh nyan silui hintang bolikat-Eh. Hiah waktu iroh kito Tuhan, iroh jorih jerah. 21Sindo oni, Yesus mantun ma iroh, “Kongolandah kongolami indam me! Samah isan Tamang-Kuh nyoruhan Akuh, sanioh ka Akuh nyoruhan ikan.”
22Opah Yesus mantun iyoh, Are minyup napas-Eh hia iroh paluh mantun, “Norimabat Roh Mohotara! 23Amun ikan mongampun dosan dulun, maka Mohotara mahi mongampun eh. Amun ikan aroko mongampun dosan dulun, maka Mohotara mahi aroko mongampun eh.”
Yesus poleha arop ma rasul Tomas
20:24-29
24Oko ico ingkan duo balas rasul Yesus. Araieh Tomas. Are co tonisi ‘Anak Tatup’. Hiah waktu Yesus dombut niin, Tomas arelu oko halo iroh. 25Jadi, kawan murid co bokon taiyoh mantun maeh, “Kaih ocop kito Tuhan! Are ocop bolum hopuli!”
Tapi Tomas mantun, “Akuh aroko angar porocaya onon sorinai akuh noto nyulon dingan paku nyan hoponyila silui-Eh, hintang mandak bua silung kuh nyan nyulon dingan kawan paku co bahai yoh, hintang mandak silung kuh ka nyan nyulon dingan towok nyan bolikat-Eh.”
26Ico Mengu opaiyoh, kawan murid Yesus hokumpur kole nyan lopo cioh. Kotika cotuh, Tomas mahi oko halo iroh. Iroh ngunci kawan antop eh isan tumun aang. Nongkocok, Yesus dombut kole, tonjok nyan tohun-tohun doh. Hie-Eh, “Kongolandah kongolami indam me!”
27Paluh, Are mantun ma Tomas, “Notobat silung-Kuh. Mandakbat bua silummu nyan intoi. Nyorobat silummu, hintang mandakbat nyan bolikat-Kuh. Aroh ragu-ragu bat tapi porocaya leh!”
28Tomas mantun ma Yesus, “Tuhankuh hintang Mohotarangkuh!”
29Hien Yesus maeh, “Iko porocaya awi iko ocop kito Akuh. Tapi ihin aang co pio hinut iroh co porocaya oluco iroh aroko noto Akuh.”
Tujuan Yohanes nulih buku cotuh
20:30-31
30Yesus nguan orong aang co mosotahir co bokon nyan mata baun kawan murid-Eh. Tapi aroko kokon aang co mosotahir taiyoh tonulih nyan ponah buku cotuh. 31Tapi kokon aang co oko nyan intoi, tonulih ina ikan porocaya bahawa Yesus iyohco Laca Co Tomonjanji Mohotara, Laca co tonisi ‘Kristus’. Hintang ina ikan porocaya bahawa Yesus iyohco Anak Mohotara. Ma porocaya onon, ikan haba bolum hokohico ma Are.
Currently Selected:
Yohanes 20: TBSS
Highlight
Share
Copy
Want to have your highlights saved across all your devices? Sign up or sign in
