Римэйхиндэ 3

1Еврей байхада юугээрээ һайн юм? Отолуулһан байхада ямар аша туһатай юм? 2Алишье талаһаа һайн, илангаяа еврейнүүдтэ Бурханай һургаалай даалгагдаһаниинь шухала юм. 3Үнэн дээрээ тэдэнэй зариманиинь тэрэ һургаалда этигээгүй. Тиин тэдэнэй этигэл һүзэггүй байхада Бурхан найдабаригүй байха аал? 4Үгыл даа. Хүн бүхэнэй худал хуурмаг юумэ хэлэжэ байбашье, Бурхан үнэн зүбые хэлэдэг.

«Хэлэһэнтнай үнэн зүб байһыетнай баталха,

зарга шүүбэриин болоходо, Та илажа гарахат», –

гэжэ Нангин Бэшэг соо Бурхан тухай хэлэгдэнэ.

5Хэрбээ Бурханай үнэн зүб байһые нүгэлтэ хэрэгүүднай элирүүлжэ байбал, бидэ юун гэжэ хэлэхэбибди? Уур сухалаа хүрөөд, маанадые хэһээжэ байһан Бурхан буруу юумэ хэнэ аал? (Энэ оршолонгой зон тиигэжэ һурадаг.) 6Үгыл даа. Бурхан үнэн зүб бэшэ һаа, газар дэлхэйнхидые яажа шүүбэрилхэб?

7«Хэрбээ манай буруу ябадал Бурханай үнэн сэхэ байһые харуулан, Тэрээндэ агууехэ алдар соло олгожо байбалнь, юундэ Бурхан мүнөө болотор маанадые нүгэлтэн гэжэ нэрлэнэб», 8үшөө «Нүгэлтэ юумэ үйлэдэжэ байя, тиигэбэл тэрэмнай һайн үрэ дүнтэй байха», – гэлдэнэт гэжэ зарим зон маанадые зэмэлнэ. Зүгөөр Бурхан тэдэниие үнэн зүб зарга шүүбэридэ оруулха.

Хэншье үнэн сэдьхэлтэн гэжэ тоологдохогүй

9Зай, хэлэһэн бүхы юумэмнай ямар удхатайб? Бидэ еврейнүүд бусад яһатанда орходоо һайн нүхэсэлдэ байна гүбди? Үгыл даа. Еврейнүүд бусад яһатанай зондол тон адляар нүгэл шэбэлдэ хүтэлүүлэгдэдэг гэжэ би һаяхан хэлээ һэнби. 10Нангин Бэшэг соо иигэжэ хэлэгдэнэ:

«Үнэн сэдьхэлтэй хүн нэгэшье үгы,

Бурханда һайшаагдаха хүн нэгэшье үгы,

11юумэ ойлгодог, Бурханиие бэдэрдэг хүн

нэгэшье үгы.

12Бүхы зон хамта замһаа хадуураа,

булта хэндээшье хэрэггүй болоо.

Һайн хэрэг хэдэг хүн байхагүй,

нэгэшье үгы.

13Ама хоолойнь үхэлэй зам руу татадаг,

хэлэниинь худал хуурмаг юумэ үгүүлхэдээ бэрхэ.

Хэлэндэнь могойн хадхуурта адли хорон байдаг.

14Амандань – хараал, хорон үгэ оршодог.

15Тэдэнэр гэмтээхэ, алахадаа түргэн юм.

16Гэшхэһэн газартаал тэдэнэр һүйдхэл һүнэлгэ асардаг.

17Энхэ тайбан байдал тэдэ найруулжа шадахагүй.

18Бурханһаа айха гээшэ тэдээндэ байхагүй».

19Хүн түрэлхитэнэй өөрыгөө сагааруулхаяа болихын тула, бүхы газар дэлхэйнхидые Бурханай зарга шүүбэридэ оруулхын тула Хуули соо хэлэгдэһэн бүхы юумэнүүд Хуулиин мэдэлдэ байһан хүнүүдтэ хандуулаатай гэжэ бидэ мэдэнэбди. 20Юундэб гэхэдэ, Хуулиин тогтоолнуудые дүүргэжэ байһанаараа нэгэшье хүн Бурханда һайшаагдахагүй. Хуули болбол маанадай нүгэлтэй байһые мэдэрүүлхэ зорилготой юм.

Бурханай урда үнэн сэдьхэлтэй байлга

21Харин мүнөө Бурханай урда үнэн сэдьхэлтэй байха арга зам харуулагдаба. Тэрээн тухай Моисейн Хуулиин ба лүндэншэдэй гэршэлһэншье байбалнь, тэрэ арга зам Хуулида ямаршье хабаагүй юм. 22Иисүүс Христоосто һүзэглэһэн этигэл һүзэгэйнь ашаар Бурхан хүн бүхэниие, ямаршье илгаагүйгөөр, үнэн сэдьхэлтэнэй тоондо оруулна. 23Ушарынь юуб гэхэдэ, хүн бүхэн нүгэл шэбэл хээд, Бурханай алдарта хүртэнэгүй. 24Зүгөөр маанадые сүлөөлһэн Иисүүс Христоосой ашаар бидэ Бурханай аша буянда хүртэн, үнэн сэдьхэлтэй болонобди. 25-26Бурхан маанадтай эбтэй эетэй болохын тула Христоосые тахил болгон эльгээгээ. Тиимэһээ бидэ Тэрээндэ һүзэглэһэнэйнгөө ашаар Бурхантай эблэрнэбди. Бурхан урдань тэсэбэритэй, нүгэлтэнүүдые тоонгүй байһанаараа үнэн зүб байһанаа харуулба. Баһа Иисүүстэ һүзэглэһэн зониие үнэн сэдьхэлтэй гэжэ тоолоходоо, Бурхан үнэн зүб байһанаа харуулна. 27Зай, тиихэдээ юугээрээ бахархахамнайб? Юугээршье бахархалтагүй. Хуули сахиһанаараа үнэн сэдьхэлтэнэй тоодо ороо гүбди? Үгыл даа. Һүзэгэйнгөө ашаар үнэн сэдьхэлтэн болообди. 28Ушарынь юуб гэхэдэ, хүн Хуулиин тогтоолнуудые дүүргэһэнээрээ бэшэ, харин һүзэгэйнгөө ашаар Бурханай урда үнэн сэдьхэлтэй болодог гэжэ бидэ тоолонобди. 29Али Бурхан гансал еврейнүүдэй Бурхан гү? Тэрэ баһал бусад арадуудай Бурхан бэшэ аал? Тиимэл даа, 30Бурхан ори ганса ушарһаа бүхы арадуудай Бурхан мүн. Тиин Бурхан бусад арадуудые еврейнүүдтэй тон адляар һүзэгэйнь ашаар Өөрынгөө урда үнэн сэдьхэлтэй байлгадаг. 31Тиихэдээ бидэ һүзэгөөрөө Хуули хүсэгүй болгоно гүбди? Үгыл даа, бидэ Хуули бүришье хүсэн түгэлдэр болгонобди.

Currently Selected:

Римэйхиндэ 3: BurBBL2024

Highlight

Copy