Римэйхиндэ 14

Ондоо хүнүүдые бү шүүбэрилэ

1Этигэл һүзэгөөр һула хүнүүдые хүндэлжэ байгты, һанамжанууд тухайнь тэдэнтэй бү арсалдагты. 2Зарим хүнүүдэй һүзэгынь ямаршье юумэ эдихые зүбшөөдэг, харин һүзэгөөр һула хүнүүд гансал ургамал эдидэг. 3Ямаршье юумэ эдидэг хүн нүгөөдэ эдидэггүй хүнөө доогуур бү хараг; тиин гансал ургамал эдидэг хүн үнөөхи ямаршье юумэ эдидэг хүнөө бү шүүбэрилэг, Бурхан тэрэ хүниие һайшаагаад байна ха юм. 4Ондоо хүнэй зарасые шүүбэрилжэ байхаар ши хэн гээшэбши? Тэрэ хүнэйшни эзэниинь лэ зарасынгаа зүб гү, али буруу байһыень мэдэхэ. Тэрэ зүб байха, юундэб гэбэл, Эзэн тэрэниие зүб байлгаха арга хүсэтэй юм.

5Зарим хүнүүд нэгэ үдэрые бусад үдэрнүүдтэ орходоо шухала гэжэ тоолоод, тусгайгаар тэмдэглэдэг, тиихэдэнь нүгөө зарим хүнүүд үдэрнүүдые хоорондонь илгадаггүй. Хүн бүхэмнай хэжэ бодожо байһанайнгаа ушар шалтагынь ойлгожо байг. 6Нэгэ үдэрые бусад үдэрнүүдтэ орходоо шухала тусхай гэжэ тоолодог хүн Эзэнэй алдарай ашада тиигэнэ. Ямаршье юумэ эдидэг хүн Эзэнэй алдарта эдинэ, тэрэ эдеэнэйгээ түлөө Бурханда баяр талархалаа хүргэнэ. Зарим юумэнүүдые эдидэггүй хүн Эзэнэй алдарта тиигэнэ, тэрэ хүн Бурханда баяр талархалаа хүргэдэг. 7Бидэ ганса бэеэ бодон ажамидардаггүйбди, али ганса бэеэ бодон үхэдэггүйбди. 8Ажамидархадаа, бидэ Эзэниие бодон ажамидарнабди, үхэхэдөө, бидэ Эзэниие бодон үхэнэбди. Тиимэһээ амидарна гүбди, али үхэнэ гүбди, бидэ Эзэнэйл хүмди. 9Амиды ба үхэһэн хүнүүдэй Эзэн байхын тула Христоос үхөөд амидыраа. 10Тиихэдээ ши юундэ һүзэглэгшэ аха дүүгээ шүүбэрилээ хүмши? Али яахадаа ши һүзэглэгшэ аха дүүгээ доогуур хараа хүмши? Бидэ бултадаал Бурханай зарга шүүбэридэ орохо ха юмбибди.

11«Яһатан бүхэн урдамни мүргэхэ,

ямаршье хэлэтэй хүн Намайе Бурхан гэжэ айладхаха,

баталан тангаригланаб гэжэ

Эзэн хэлэнэ», – гэжэ Нангин Бэшэг соо хэлээтэй байдаг.

12Хүн бүхэмнай өөрынгөө үйлэ ябадалай түлөө Бурханай урда тоосохо юм.

Бусад зониие бү доройтуула

13Зай, бэе бэеэ шүүбэрилхэ шүүмжэлхэеэ болиёл даа. Харин бусад зониие бүдэрүүлхэ гү, али нүгэл шэбэлдэ унагааха юумэ хэхэгүй гэжэ оролдожо байял. 14Ямаршье хоол барижа болохо гэжэ Эзэн Иисүүс намда бата этигэл үгөө. Хэрбээ таанад зарим эдихэ юумээ бузартай гэжэ тоолоо һаа, тэрэ эдеэнтнай танда бузартай байха. 15Хэрбээ эдижэ байһан юумээрээ ши ондоо хүниие гомдохооболшни, ши хайра дураар хүтэлүүлэгдэнэгүйш. Эдижэ байһан хоолоороо ши тэрэ хүниие доройтуулан бү хосороо. Тэрэ хүнэйшни түлөө Христоос Өөрынгөө амиие үргөө. 16Шинии һайн гэжэ бодожо байһан юумэнүүдые хүнүүд бү шүүбэрилэг. 17Ушарынь юуб гэбэл, Бурханай хаан орон эдихэ, ууха тухай бэшэ, харин Арюун Һүлдэһөө эхи абадаг үнэн сэдьхэл, энхэ тайбан, баяр жаргал тухай юм. 18Таанад тиимэ маягаар Христоосто алба хэжэ байбал, Бурханда таатай ба хүн зондо хүндэтэй байхат.

19Тиимэһээл бидэ энхэ тайбаниие найруулдаг, бэе бэеынгээ һүзэг бэхижүүлдэг юумэнүүдтэ зорижо байха ёһотойбди. 20Эдеэ хоолһоо боложо Бурханай хэһэн юумэ бү һандарга. Ямаршье хоол барижа болохо, гэхэтэй сасуу ондоо хүниие нүгэл шэбэлдэ унагааха шалтаг болохо юумэ эдихэнь буруу юм. 21Бусад һүзэглэгшэдые доройтон унагааха шалтаг болохо ямаршье юумэ хэнгүй, мяха эдингүй, үзэмэй дараһан архи уунгүй байхань зүб шуу. 22Эдэ мэтэ һанамжануудаа зосоогоо баряад, Бурхандаал мэдүүлээд бай. Эдиһэн ууһан юумээрээ һэшхэлдээ гэмнүүлээгүй хүн жаргалтай байна! 23Харин эдижэ байһан юумэн тухайгаа һэжэглэһэн хүниие Бурхан тэрэ юумээ эдижэ байхадань гэмнэдэг, юундэб гэбэл, тэрэ хүн һүзэгэйнгөө ёһоор болоногүй ха юм. Тиин һүзэгэй ёһоор хэгдэдэггүй юумэнүүд булта нүгэлтэй юм.

Currently Selected:

Римэйхиндэ 14: BurBBL2024

Highlight

Copy