Марк 8

(Мт 15:32-39)

1Дахин тэдэ үдэрнүүдтэ ехэ олон зон Иисүүсые тойроод сугларба. Зоной эдихэ юумэгүй болоходо, Иисүүс шабинараа дуудажа хэлэбэ:

2– Би эдэ зониие хайрланаб. Тэдэ Намтай гурбан үдэр байлсаа, теэд мүнөө эдихэ юумэгүй болоод байна. 3Тэдэнэй зариманиинь холоһоо ерээ. Тиимэһээ үлэн хооһон гэртэнь табибални, тэдэ замдаа һуларжа ядаржа магадгүй.

4– Теэд эзэгүй хооһон энэ газарта эдэ зониие бултыень садхааха хилээмэ хүн хаанаһаа олохоб? – гэжэ шабинарынь асууба.

5– Таанадта хэды шэнээн хилээмэ байнаб? – гэбэ Иисүүс.

– Долоон жэжэхэн монсогор хилээмэн байна, – гэлдэбэ шабинарынь. 6Иисүүс улад зониие һуухыень захирба. Тиигээд байгаа долоон хилээмэ абаад, Бурханда баяр баясхалан хүргэбэ. Хилээмэеэ хухалан, хүн зондо хүртөөжэ хубаахыень шабинартаа үгэбэ. Шабинарынь хубааба. 7Үшөө тэдэ хэдыхэн загаһатай һэн. Иисүүс тэдэнэй түлөө Бурханда баясхалан хүргөөд, тэрэ загаһа хубаажа үгэхыень шабинартаа захиба. 8-9Дүн хамтадаа дүрбэн мянган шахуу ганса эрэшүүл дураараа эдижэ садаа, үшөө тиихэдэ эдеэнэй үлөөдэһэн долоон түрсүүгээр дүүрэн суглараа. Иисүүс хүн зоноо тараагаад, 10шабинартайгаа хамта онгосодо һуужа, Далманутаагай газар нютаг руу тамарба.

Тэнгэриһээ баталагдаһан гайхамшагта тэмдэг

11Хэдэн фарисейнүүд Иисүүстэ ерэжэ, үгөөр буляасалдаба. Тиигээд Тэрэниие туршахаяа һэдэжэ, тэнгэриһээ баталагдаһан гайхамшагта дүлгэ тэмдэг харуулыт даа гэбэ. 12Иисүүс хүндөөр һанаа алдажа:

– Оршон үеын зон яахадаа гайхамшагта дүлгэ тэмдэг харуулхые шаарданаб? Зүб даа, ямаршье тиимэ юумэн тэдэ зондо харуулагдахагүй, – гэжэ хэлээ һэн. 13Тиигэмсээрээ Тэрэ фарисейнүүдые орхёод, дахин онгосодоо һуугаад, далайн нүгөө эрье руу тамарба.

Фарисейнүүдэй ба Иродэй эһээбэри

14Шабинарынь хилээмэ абахаяа мартаһан байба, тиимэһээ онгосодонь оройдоол гансахан монсогор хилээмэн байгаа.

15– Һэргэг байгты! Фарисейнүүдэй, Иродэй эһээбэриһээ болгоомжолжо ябагты, – гэжэ Иисүүс шабинараа һэргылбэ.

16– Маанадта хилээмэнэй үгы байһан дээрэһээ тиигэжэ хэлээ ёһотой, – гэжэ шабинарынь өөһэд хоорондоо тухайлба. 17Юун тухай хэлсэжэ байһыень мэдээд, Иисүүс тэдэндээ хэлэбэ:

– Таанар хилээмэ абаагүйбди гэжэ юундэ хоорондоо хэлсээбта? Мүнөө болотор мэдэбэ, ойлгобогүй гээшэ гүт? Ухаан бодолтнай тиимэ мунхаг байна гээшэ гү? 18-19Нюдэтэй байгаад, харанагүй гээшэ гүт? Шэхэтэй аад лэ, дууланагүй гээшэ гүт? Табахан монсогор хилээмэ табан мянган хүндэ хубаажа үгэхэдэмни, хэды түрсүүгээр дүүрэн үлөөдэһэ суглуулһанаа һананагүй аалта?

– Арбан хоёр түрсүүг, – гэжэ шабинарынь харюусаба.

20– Тиигээд долоон хилээмэ дүрбэн мянган хүндэ хубаахадамни, хэды түрсүүгээр дүүрэн үлөөдэһэ суглуулаа һэмта? – гэжэ Иисүүс һураба.

– Долоон түрсүүг, – гэжэ шабинарынь харюусаба.

21– Теэд юун тухай хэлэһыемни мүнөөшье болотор ойлгоногүй гээшэ гүт? – гэжэ Иисүүс дахин һураба.

Бэтсаидаа хотодо Иисүүс һохор хүниие эмнэбэ

22Иисүүсэй шабинартайгаа Бэтсаидаа хото ерэхэдэнь, хэдэн хүн тэрээндэ һохор хүниие хүтэлжэ асараад, адис хүртүүлэн эдэгээхыень гуйба. 23Иисүүс тэрэ һохор хүниие гарһаань барижа, тосхонһоо хүтэлэн гаргаба. Тиигээд нюдэндэнь нёлбоод, дээрэнь гараа табин адислаад:

– Зай, юумэ харана гүш? – гэжэ һураба. 24Тэрэнь иишэ тиишээ хараад:

– Хүнүүдые харанаб, теэд тэдэ тойроод ябаһан мододтол адли үзэгдэнэ, – гэжэ хэлэбэ.

25Иисүүс дахин нюдэндэнь гараараа хүрэбэ. Тиигэхэтэйнь сасуу үнөөхи хүн хараатай болобо; нюдэнь эдэгэжэ, тэрэ бүхы юумэ эли тодоор харадаг болобо.

26– Зай, ши гэртээ хари, тосхондо бү ороорой, – гэжэ захин, Иисүүс тэрэ хүниие ябуулба.

Иисүүс гээшэмнай хэн бэ?

27Иисүүс шабинартайгаа Филиппэй Кесари хотын хажуудахи тосхонуудта ошобо.

– Хүнүүд Намайе хэн гэжэ һананаб? – гэжэ Иисүүс шабинарһаа замдаа ябахадаа асууба.

28– Зариманиинь Уһаар Арюудхагша Иоанн байнат, нүгөөдүүлынь Элияа гээшэт, үшөө бусадынь лүндэншэдэй нэгэниинь байнат гэжэ хэлсэнэ, – гээд шабинарынь харюусаба.

29– Теэд таанар Намайе хэн гэжэ һананабта? – гээд Иисүүс һураба.

– Та Бурханай табисууртат, – гэжэ Пётр харюусаба.

30– Хэн байһан тухаймни хэндэшье ама бү гарагты, – гэжэ Иисүүс шабинартаа захирба.

Иисүүс зобохо, алуулха тухайгаа хэлэнэ

31Иисүүс Өөртэйнь юу болохо тухай шабинартаа хөөрэжэ эхилбэ:

– Хүн түрэлхитэнэй Хүбүүн аргагүй ехээр зобохо, ахамадууд, ахамад санаарта болон Хуули заадаг багшанар Тэрээнһээ арсаха. Тэрээниие алаха, теэд гурбадахи үдэртөө Тэрэ амидырха. 32Тиигэжэ Иисүүс шабинартаа тон эли тодоор хэлэжэ байгаа. Тиимэһээ Пётр Тэрэниие хажуу тээшэнь дуудажа абаашаад, иигэжэ хэлэхэеэ болиит гэбэ. 33Харин Иисүүс шабинар тээшээ эрьен хараад, Пётрые зэмэлэн:

– Холо боло Намһаа, сатана! Шинии һанал бодолнуудшни Бурханһаа үршөөгдэнэ бэшэ, харин хүн шанарһаашни бүрилдэнэ! – гэбэ. 34Удаань Иисүүс улад зониие, шабинараа дуудаад хэлэбэ:

– Намтай ябалсаха дуратай хүн өөр тухайгаа бодохоёо болёод, үдэр бүхэн хэрээһэеэ үргэлөөд#8:34 Зоболон туйлахадашье, үхэлэй саазада хүртэхэдэшье бэлэн байха гэһэн удхатай., хойноһоомни яба. 35Ушарынь хэлэбэл, ами наһаяа абарха һанаатай хүн тэрэнээ алдаха, харин Минии түлөө, мүн Һайн Мэдээсэлэй түлөө ами наһаяа үгэбэл, абарагдаха. 36Хэрбээ танай бүхы дэлхэйе олзолоод, ами һүнэһэеэ алдабалтнай, танда ашагтай гү? Үгыл даа! 37Таанад ямаршье юумэ түлөөд, ами һүнэһэеэ бусаажа шадахагүйлта. 38Хэрбээ забхай, нүгэлтэ энэ дэлхэйн зоной дунда байхадаа Намһаа, Минии һургаалһаа эшэбэлтнай, Хүн түрэлхитэнэй Хүбүүн Эсэгынгээ алдартай Бурханай Эльгээмэлнүүдтэй хамта ерэхэдээ, таанадһаа эшэхэл.

Currently Selected:

Марк 8: BurBBL2024

Highlight

Copy