Марк 16

(Мт 28:1-8; Лк 24:1-10; Ин 20:1-18)

1Субботын үнгэрһэн хойно Магдалай Мария, Саломия, Яковай эхэ Мария гэгшэд Иисүүсэй бэе түрхихөөр хангалтай зүйлнүүдые худалдажа абаба. 2Субботын хойто үдэрэй эртэ үглөөгүүр нара гарахын урда тээхэнэ агы нүхэн хуурсагта ошобо. 3Замдаа тэдэнэр:

– Агы нүхэ хааһан шулууе хэн бидэндэ хажуу тээшэнь үмхирүүлжэ үгэхэб? – гэжэ бэе бэеһээ һуража байгаа. 4Зүгөөр, ерэжэ харахадань, асари томо тэрэ шулуун хажуу тээшээ болгогдоһон байба. 5Тэдэнэр агы соо ороод, үүдэнэй баруун талада саб сагаан хубсаһатай залуу хүнэй#16:5 Эндэ Бурханай Эльгээмэл тухай хэлэгдэнэ. һуухые харабад. Эхэнэрнүүдэй айн мэгдэхэдэ, 6тэрэ хүн:

– Бү айгты! Таанад хэрээһэндэ хадуулһан Назаредэй Иисүүсые бэдэрнэт гэжэ би мэдэнэб. Тэрэтнай эндэ үгы, амидыраа. Энэ бэеыень табиһан газар харыт. 7Мүнөө шабинартань, илангаяа Пётрто ошожо: «Таанадта хэлэһэнэйнгээ ёһоор, Тэрэ түрүүн Галилей ошохо, тэндэ Тэрэниие харахат», – гэжэ дуулгагты.

8Эхэнэрнүүд агы сооһоо айхабтар ехээр сошоһон һүрдэһэн юумэд гүйлдэжэ гарабад. Тон ехээр мэгдэһэн дээрэһээ тэдэ хэндэшье юумэ дуулгабагүй#16:8 Эгээн эртэнэй эхэ бэшэгүүдтэ Маркын Һайн Мэдээсэл энэ газарта түгэсэнэ..

Иисүүс Магдалай Марияда ерэбэ

9Субботын хойто үдэрэй эртэ үглөөгүүр Иисүүс амидыраад, анха түрүүн Магдалай Марияда ерэбэ. Урдань Иисүүс тэрэ эхэнэр сооһоо долоон ада шүдхэрые намнажа гаргаһан байгаа. 10Мария Иисүүстэй хамта ябалсаһан шаналжа, уйлажа байһан хүнүүдтэ ошожо, 11Иисүүсэй амидырһан тухай, өөрөө Тэрэниие хараһан тухайгаа хөөрэбэ. Гэбэшье тэдэнь үнэншэбэгүй.

Иисүүс хоёр шабидаа ерэбэ

12Удаань Иисүүс ондоо шарай шарайлаад, хотоһоо гараад ябаһан хоёр шабидаа ерээ. 13Тэдэнь бусажа ерээд, ушарһан бүгэдые нүгөө шабинартаа хөөрэбэ, харин тэдэнь этигэбэгүй.

Иисүүс арбан нэгэн шабинартаа ерэбэ

14Һүүлдэнь Иисүүс үдэшын хоол барижа байһан арбан нэгэн шабинартаа ерэбэ. Амидырһан хойнонь хараһан зондо үнэншэжэ үгэнгүй зүрюутэһэнэйнь түлөө, этигэлгүй байһанайнь түлөө шабинараа Тэрэ харааба. 15Тиигээд тэдэндээ иигэжэ хэлэбэ:

– Бүхы газар дэлхэйгээр ябажа, хүн бүхэндэ Һайн Мэдээсэл номногты. 16Намда этигэһэн, уһан арюудхалгада хүртэһэн хүн бүхэн абарагдаха. Харин Намда этигэхэеэ арсаһан хүн бүхэн гэмнэгдэхэ. 17Намда этигэһэн хүн бүхэн гайхамшагта үйлэ хэрэгүүдые бүтээхэ аргатай байха. Минии нэрээр тэдэ ада шүдхэрнүүдые намнажа гаргаха, танигдахагүй хэлэнүүдээр дуугарха. 18Тэдэ могойнуудые барибашье, хоро уубашье, өөһэдыгөө гэмтээхэгүй. Мүн гараа үбшэн зон дээрэ табяад, тэдэниие эдэгээжэ байха.

Иисүүс тэнгэридэ дэгдэбэ

19Эдэ бүгэдые шабинартаа хэлээд, Эзэн Иисүүс тэнгэридэ дэгдэжэ, Бурханай баруун таладань һууба. 20Тиигээд шабинарынь хаа хаанагүй ябажа, эндэ тэндэ номножо байба. Эзэн тэдэндэ хамһалсажа, хэлэһэн үгэнүүдэйнь үнэн зүб байһые гайхамшагта үйлэ хэрэгүүдээр баталдаг байгаа.

Currently Selected:

Марк 16: BurBBL2024

Highlight

Copy