Марк 15

(Мт 27:1-2, 11-14; Лк 23:1-5; Ин 18:28-38)

1Үүр сайха үеэр түрүү санаартан, ахамадууд, Хуули заадаг багшанар яаралтайгаар Зүблэлэй гэшүүдтэй уулзажа хуралдаба. Тэдэ Иисүүсые хүлижэ, Пиладта#15:1 Понтий Пилат – иудейн можодо дүүрэн эрхэтэй Римэй захирагша (26–36 онууд). абаашажа тушаагаа.

2– Та еврейнүүдэй хаан гүт? – гэжэ Пилат Иисүүсһээ асууба.

– Та тиигэжэ хэлэнэт, – гэжэ Иисүүс харюусаба. 3Түрүү санаартан Иисүүстэ олон зэмэ тохожо байгаа. 4Тиимэһээ Пилат:

– Та харюу үгэхэгүй гүт? Таниие иимэ олон хэрэгүүдтэ гэмнэжэ байһые Та дууланагүй гүт? – гэжэ хэлэбэ. 5Харин Иисүүс харюу үгэнгүй Пиладые гайхуулба.

Иисүүсые үхэлэй саазада хүртүүлбэ

6Паасхын һайндэрөөр Пилат хаалтада һуугшадай нэгыень зоной дурадхалаар сүлөөдэ табидаг заншалтай байгаа. 7Тэрэ үедэ Бараббаа гэдэг хүн түрмэдэ һуугаа. Хотодо үймөөнэй болоходо тэрэниие үшөө хэдэн үймүүлэгшэдтэй хамта алуур һүйдхэл гаргаһанайнь түлөө барижа хааһан байгаа. 8Улад зон сугларжа, урданайнгаа заншалаар хаалтада һууһан нэгэ хүниие табихыень Пиладһаа гуйба.

9– Еврейнүүдэй хааниие танда табихыемни хүсэнэ гүт? – гэжэ Пилат тэдэнһээ һураба. 10Иисүүстэ атаархажа байһан дээрэһээ түрүү санаартан Тэрээние барижа асараа гэжэ Пилат һайн ойлгожо байгаа бшуу. 11Теэд түрүү санаартан Бараббаае табихыень Пиладһаа гуйгты гэжэ улад зониие идхаба.

12– Еврейнүүдэй хаан гэжэ таанадай нэрлэдэг хүниие би яаха болонобиб? – гэжэ Пилат улад зонһоо асууба.

13– Тэрэниие хэрээһэндэ хада! – гэжэ зон хашхарба.

14– Ямар гэмтэй юумэ Тэрэ хээб? – гэжэ Пиладай һурахадань, улад зон харюудань:

– Тэрээниие хэрээһэндэ хада! – гэжэ бүри шангаар, гааралдан хашхарба. 15Пилат улад зоной һайшаалда хүртэхэеэ һанажа, тэдэндэ Бараббаае табиба, харин Иисүүсые сохёод, хэрээһэндэ хадахыень захирба.

Сэрэгшэд Иисүүсые баһаба

16Сэрэгшэд Иисүүсые Пиладай ордоной хэрэмэй хорёодо абаашажа, тиишэнь бүхы бүлэг сэрэгшэдээ дуудаба. 17Тэдэ Иисүүстэ улаан суба үмдэхүүлбэ, үүргэнээр гүрлөө гүрэжэ, толгойдонь углаба. 18Тиигээд Тэрэниие баһажа:

– Еврейнүүдэй хаан мандаха болтогой! – гэжэ байгаад хашхарба. 19Тиигээд сэрэгшэд Тэрэнэй тархи түрүүень таягаар сохижо, урдаһаань нёлбожо, мүн үбдэг дээрээ унан дохибо. 20Тиигэжэ сэрэгшэд Иисүүсые ханатараа баһаад, удаань үнөөхи улаан субыень тайлаба. Тиигээд Өөрынь хубсаһа үмдэхүүлээд, хэрээһэндэ хадахаяа абаашаа һэн.

Иисүүсые хэрээһэндэ хадаба

21Харгыдаа тэдэнэр хээрэһээ гэртээ бусажа ябаһан Хэрээн нютагай Симон гэдэг хүнтэй уулзаба. Сэрэгшэд тэрэниие Иисүүсэй хэрээһэ үргэлөөд ябахыень баалаба. (Симон болбол Александр Рүүф хоёрой эсэгэ байгаа.) 22Сэрэгшэд Иисүүсые «Хохимой» (еврей хэлээр «Голгофо») гэдэг газарта асараа. 23Тиигээд үбшэнэй мэдэрэл алдуулдаг эмтэй холиһон үзэмэй дараһан архи уухыень үгэхэдэнь, Иисүүс уубагүй. 24Удаань сэрэгшэд Иисүүсые хэрээһэндэ хадаад, жээрэб татажа, хубсаһыень дундаа хубаажа абаа. 25Тэрэниие хэрээһэндэ хадахада үглөөнэй юһэн саг боложо байгаа. 26Юундэ хэрээһэн дээрэ хадуулааб гэжэ тайлбарилһан модон хабтагай дээрэнь «Еврейнүүдэй хаан» гэжэ бэшээтэй байба. 27Иисүүстэй хамта үшөө хоёр хоротониие саазалба: нэгыень баруун таладань, нүгөөдыень зүүн таладань хэрээһэндэ хадаба#15:27 Зарим эхэ бэшэгүүдтэ иимэ хэһэгээр үргэлжэлэгдэдэг: 28 «Тэрэниие хоротон гэжэ тоолохо», – гээд Нангин Бэшэг соо хэлэгдэһэн үгэнүүд иигэжэл бэелбэ.. 29Хажуугаарнь үнгэрһэн зон толгойгоо һэжэржэ, Иисүүсые шоолон:

– Зай, Та Һүмые һандаргаад, гурбан үдэр соо бодхоохоб гээ бэлэйт. 30Та түрүүн хэрээһэнһээ буужа, Өөрыгөө абарыт! – гэжэ хашхаралдаба. 31Тон тиигэжэл Иисүүсые түрүү санаартан, Хуули заадаг багшанар шоолон, бэе бэедээ:

– Бусадые абардаг аад, харин Өөрыгөө абаржа шаданагүйл. 32Хэрбээ Израилиин хаан, Бурханай табисуурта юм һаа, хэрээһэнһээ бууг лэ! Тиигэбэл бидэ нюдөөрөө хараад, этигэхэбди, – гэлдэжэ байба. Мүн Иисүүстэй хамта хэрээһэндэ хадуулһан дээрмэшэдшье Тэрээниие шоглон баһаба.

Иисүүс наһа бараба

33Хахад үдэрэй багһаа үдэрэй гурбан саг болотор бүхы газар дэлхэй шэб харанхыда хушагдаба. 34Гурбан сагай багаар Иисүүс:

– Элои! Элои! Лема сабахтани? (Бурхамни, Бурхамни! Юундэ Намайе орхибот?) – гэжэ шангаар хашхарба. 35Хажуудань зогсожо байһан зарим зон хэлэһыень дуулаад:

– Шагныта, Тэрэ Элияае дуудана! – гэлдэбэ. 36Тэдэнэй нэгэниинь гүйжэ ошоод, бамбагар юумэн дээрэ уксус адхаад, тэрэнээ тулуурай үзүүртэ табяад, Иисүүстэ уухыень үгэхэ зуураа:

– Хүлеэгты, Элияа Тэрээниие хэрээһэнһээнь буулгахаяа ерэгшэ аа гү, харая! – гэбэ. 37Иисүүс шанга абяа гаргаад, амяа табиба.

38Тиихэдэнь Һүмэ соо Хамагай Нангин газарта ороходо үлгөөтэй хүшэгэ дээрэһээ доошоо шууража, хоёр боложо хахарба. 39Иисүүсэй сэхэ урдань зогсожо байһан зуунай дарга Тэрэнэй хашхараад, амяа табихыень харахадаа:

– Энэ хүн үнэхөөрөө Бурханай Хүбүүн байгаа, – гэбэ. 40-41Тээ холохоно зогсоод эдэ бүгэдые хэдэн эхэнэрнүүд хаража байгаа. Тэдэ Иисүүстэй хамта Иерусалим ерэһэн юм. Тэдэ үшөө энэ ушарай тохёолдохын урда, Иисүүсэй Галилейдэ байхада Тэрэниие дахажа ябадаг, Тэрээндэ туһаламжа үзүүлдэг һэн. Тэдэнэй дунда Магдалай Мария, балшар Яков Ёшияа хоёрой эхэ Мария ба Саломия гэгшэд байлсаба.

Иисүүсые хүдөөлүүлбэ

42Тиихэдэ субботын урдахи үдэшэ бэлэй. Тиимэһээ еврейнүүд энэ нангин үдэртэ бэлдэжэ байгаа. 43Аримафейн Иосиф гэдэг хүн Пиладта орохоёо зүрхэлжэ, тэрээнһээ Иисүүсэй бэе үгэхыень эрибэ. Иосиф өөрөө дээдын Зүблэлэй ехэ хүндэтэ гэшүүниинь һэн, тиин тэрэ Бурханай хаан түрын мандахые хүлеэжэ байгаа. 44Иисүүсэй тиимэ түргөөр үхэһэн тухай дуулаад, Пилат гайхаба. Тиигээд зуунай нэгэ даргые дуудаад, Иисүүс хэзээ үхөөб гэжэ һураба. 45Пилат тэрэ даргые шагнаад, Иисүүсэй бэе абахыень Иосифто зүбшөөбэ. 46Иосиф нарин улһаар нэхэһэн бүд худалдажа абаа. Удаань Иисүүсэй бэе хэрээһэн дээрэһээ буулгаад, бүдөөр орёогоод, хабсагайда түнхинэгдэһэн агы нүхэн соо хадагалаа һэн. Тиигээд агы нүхэнэй амһартые томо шулуугаар хааба. 47Иисүүсэй бэеын хаана хадаглагдахые Магдалай Мария, Ёшияагай эхэ Мария гэгшэд ажаглан хаража байгаа.

Currently Selected:

Марк 15: BurBBL2024

Highlight

Copy