Эхин 23
23
Саррын наһа баралга
1Сарра зуун хорин долоон наһатай болоод, 2Ханаһаанай газар дайдада, Кирьяат-Арбаа хотодо (мүнөө Хэброон гэгдэдэг) наһа бараба. Абраһаам дээрэнь уйлан гашуудан байгаа һэн. 3Тиигээд тэрэ бэеһээнь холодон, хээт обог зондо иигэжэ хандаба:
4– Би танай нютаг руу зөөжэ ерэһэн ерүүл хүн байһан ушарһаа үмсын газаргүйб. Һамгаяашье хүдөөлүүлхэ газаргүй байнаб. Наһа бараһан хүнөө хүдөөлүүлхэ газар намда худалдыт.
5Хээт обог зон тэрээндэ иигэжэ харюу үгэбэ:
6– Нүхэр, дураараа боло. Ши хүндэтэй, Бурханай хайратай хүнши. Манай газарай хамагай һайн хада уула шэлэжэ, тэндэ һамгаяа хүдөөлүүлэ. Эрхим хүндэтэ шамһаа хүдөөлүүлгын газар хэншье харамнажа байхагүй.
7Тиихэдэнь Абраһаам бодожо, хээт зондо доро дохибо. 8-9Тиигээд тэрэ иигэжэ хэлэбэ:
– Хэрбэеэ таанад бултадаа намда һамгаяа хүдөөлүүлхэ зүбшөөл үгэжэ байгаа хадатнай, би үшөө нэгэ иимэ гуйлтатайб: Цохаарай Эпроон гэдэг хүнэй үмсын газар болохо таряалантай зэргэлээд Махпэлаа гэдэг агы нүхэн бии. Тэрэ агы нүхэ намда худалдахыень Эпроондо хэлыт. Таанадай хараһаар байтар дүүрэн сэнгыень сүм түлөөд, тэрэ газар худалдажа абахаб.
10Тэрэ үедэ хээт обогой зон хотын бартаануудай хажууда суглаа хэжэ байгаа. Эпроон өөрөө тэндэ байһан ушарһаа Абраһаамда иигэжэ харюусаба:
11– Үгы, нүхэр! Һайн хүн боложо, энэ газар агытайнь хамта намһаа бэлэг болгон аба. Минии угайхид гэршэ болохо: би энэ газараа һамгаяа хүдөөлүүлхыеш бэлэглэнэб!
12Абраһаам эдэ зондо доро дохёод, 13олоной шагнаһаар байтар Эпроондо:
– Эрхим хүндэтэ Эпроон! Үгыемни шагныш даа. Би тэрэ газарай түлөө мүнгэ түлэһэнэйл удаа наһа бараһан хүнөө тэндэ хүдөөлүүлхэб, – гэбэ.
14Эпроон Абраһаамда:
15– Эрхим хүндэтэ Абраһаам! Намайе шагна. Тэрэ газар дүрбэн зуун шээкэл сагаан мүнгэн үнэ сэнтэй. Энэ болбол шамдашье, намдашье ехэ мүнгэн бэшэ. Нүгшэһэн хүнөө тэндэ хүдөөлүүлыш даа, – гэжэ хэлэбэ.
16Абраһаам Эпрооной хэлэһые шагнаад, хээт обогтоной бултанайнь дуулааша мүнгэнэй тэрэ тоое – тэрэ үеын дүрбэн зуун шээкэл сагаан мүнгэ шэгнэжэ, Эпроондо барюулба. 17-20Иигэжэ Абраһаам Ханаһаан орон нютагай Мамрээгэй, ондоогоор хэлэбэл, Хэброон хотын, зүүн талада оршодог Махпэлаа гэдэг газарые хада, агытайнь, ой модотойнь Эпроонһоо худалдажа абаба. Энэ бүгэдын Абраһаамай үмсын зөөри болоһынь хотын бартаануудай дэргэдэ байгша хээт обог зон нэгэн дуугаар баталба.
Удаань Абраһаам Сарра һамгаяа тэрэ хадын агы соо хүдөөлүүлээ бэлэй.
Currently Selected:
Эхин 23: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
