Эхин 22

Бурханда Абраһаамай үнэн сэхэ байлга

1Энэ болоһон ушарай удаа Бурхан Абраһаамые туршахаяа шиидэжэ дуудахадань, Абраһаам:

– Би энэ байнаб! – гэбэ.

2Тиихэдэнь Бурхан айладхал буулгаба:

– Ори ганса хайрата Исаак хүбүүгээ абаад, Мориһаа нютаг руу ошо. Тэндэ ошоходош, Би шамда нэгэ хада заажа үгэхэб. Тэрэ хада өөдэ гараад, хүбүүгээ Намда түгэс шатаалта үргэл болгон тахи.

3Үглөөдэрынь Абраһаам эртэ бодожо, элжэгэеэ унаад, хоёр залуу зарасые, мүн Исаак хүбүүгээ абаад, түгэс шатаалта үргэл хэхын тула түлеэ бэлдээд, Бурханай зааһан газар зорибо.

4Аян замдаа хоноһоор гурбадахи хоногтоо Абраһаам тэрэ газар дайдые холоһоо обёорбо.

5– Эндээ үлэжэ, элжэгэнүүдээ харан байгты, – гэжэ тэрэ зарасануудтаа хэлэбэ. – Бидэ хүбүүнтэеэ хоюулан тиишээ ошожо, Бурхандаа мүргөөд бусахабди.

6Түгэс шатаалта үргэлэй гал дэгжүүлхэ түлеэгээ Абраһаам Исаагайнгаа мүр дээрэ ашаба. Һүүлээрнь хэтэ сахюур, хутага абаад, хада өөдэ тэдэ хоюулханаа зорибо.

7Ябажа ябахадаа Исаагай:

– Аба-аа! – гэжэ ооголходо, Абраһаам:

– Зай, хүбүүмни, юуб? – гэбэ.

– Хэтэ сахюуршье, түлеэншье манда бии, зүгөөр түгэс шатаалта үргэлэй хурьган хаанаб? – гэжэ хүбүүниинь асууба.

8– Хүбүүмни! Бурхан түгэс шатаалта үргэлэй хурьгые Өөрөө хаража олохо, – гээ бэлэй Абраһаам.

Тиигээд тэдэ хоюулаа саашалба.

9Бурханай заагша газар хүрөөд, Абраһаам тэндэ шулуугаар үргэлэй шэрээ барижа, дээрэнь түлеэ табяад, Исаак хүбүүгээ ооһороор хүлижэ, түлеэн дээрэ хэбтүүлбэ. 10Тиигээд хүбүүгээ алахаяа хутагаяа тэрэнэй далайхадань, 11Эзэнэй Эльгээмэл огторгойһоо ооголбо:

– Абраһаам! Абраһаам!

– Биб! – гэжэ тэрэ харюусаба.

12– Тэрээндээ гар бү хүрэ! – гэжэ Эльгээмэл айладаба. – Боли! Хайрата ганса хүбүүгээ Намда үргэхэһөө татагалзаагүй байһан дээрэһээш Намайе хүндэлдэг гэжэ Би мэдэбэб.

13Абраһаам толгойгоо үргэхэдөө, һөөг бургааһанда эбэрээрээ тээгэлдэһэн хуса гэнтэ обёорбо. Тэрээндэ ошоод, хусые хүбүүнэйнгээ орондо түгэс шатаалта үргэл болгон тэрэ үргэбэ.

14Эзэнэй иигэжэ хуса үгэһэн ушарһаа Абраһаам тэрэ газарые «Эзэн хэрэгтэй зүйл үгэдэг» гэжэ нэрлэбэ. Мүнөөшье болотор «тахилгатай уула дээрэ хэрэгтэй юумээр Эзэн хангажа үгэдэг» гэһэн яряа үгэ бии юм.

15Эльгээмэл огторгойһоо Абраһаамда хоёрдохиёо хандаба:

16– Эзэн иигэжэ айладхана: «Би шамда Өөрын нэрээр тангаригланаб. Ори ганса хүбүүгээ хайрлангүй Намда үргэхөөр бэлэн байһанайш түлөө 17Би шамайе буян хэшэгтээ хүртөөхэб! Огторгойн одо мүшэд, далайн эрьеын элһэн мэтэ тоолошогүй олон үри һадаһадые шамда хайрлахаб. Шинии үри һадаһад дайсадаа даража, газар уһыень эзэлэн абаха. 18Минии үгые дуулаһанайш түлөө шинии уг удамаар дамжан, бүхы дэлхэйн арад зон Минии үреэл хайрада хүртэхэ».

19Энээнэй удаа Абраһаам хүбүүнтэеэ хамта хоёр залуу зарасанартаа бусажа, Бэһээр-Шээбэ нютагаа хариба.

Абраһаам иишэ-тиишээ нүүжэ ябахаяа болижо, Бэһээр-Шээбэдэ удаан сагта ажаһуугаа бэлэй.

Нахоорой үри һадаһад

20Хэдэн сагай үнгэрһэн хойно Абраһаамда иимэ мэдээн дуулдаба:

– Танай аха Нахоорой һамган Милкаа олон хүбүүдые түрөө. 21Ууган хүбүүн Ууц, тэрэнэй дүү Бүүз, Кэмүһээл (һүүлдэнь Араам гэжэ хүбүүтэй болоо һэн), 22Хээсэд, Хазоо, Пилдааш, Идлаап болон Бэтүһээл гэгшэд хүбүүдынь болоно. 23Һүүлдэнь Бэтүһээл гэрлэжэ, Рэбээккаа гэжэ басагатай болоо һэн. Абраһаамай аха Нахоорто эдэ найман хүбүүдые Милкаа түрэжэ үгөө.

24Нахоор Реумаа гэжэ нэрэтэй нэгэ бага һамгантай байгаа. Тэрэнь Нахоорто Тээбаа, Гаахам, Таахаш ба Маһахаа гэжэ дүрбэн хүбүүдые түрөө бэлэй.

Currently Selected:

Эхин 22: BurBBL2024

Highlight

Copy