Эхин 14

Абрам Лоодые сүлөөтэй болгоно

1Шинаарай хаан Амрапээл, Ассириин Элласаар хотын хаан Ариоох, Элаам уласай хаан Хэдорлаһоомэрэй, мүн Месопотамиин Гоим хотын хаан Тидаал гэгшэдэй үедэ энэ үйлэ хэрэг болоо бэлэй. 2Эдэ дүрбэн хаашуул нэгэдэжэ, Содом хотын Бээрэ, Гоморро хотын Биршаа, Адмаа хотын Шинааб, Цэбоһиим хотын Шэмээбэр хаашуулда болон Бээла хотын, ондоогоор тэрэниие нэрлэбэл, Цооһар хотын хаанда эсэргүү дай үүсхэжэ эхилбэ. 3Иордан голой нюруу Сиддимдэ тэдэ сэрэгээ хамтадхан, байлдаанда бэлдэбэ. (Һүүлдэнь Дабһата далайн тогтоходо энэ Сиддим нюруу үгы болоо.)

4Энээнэй урда тэрэ оршом дайдын хаашуулые Элаам уласай Хэдорлаһоомэр хаан арбан хоёр жэлэй туршада зонхилоо, арбан гурбадахи жэлдээ тэдэ хаашуул урдаһаань буһалгаа хээ һэн. 5Тиимэһээ арбан дүрбэдэхи жэлдээ Элаам уласай хаан Хэдорлаһоомэр, тэрээнтэй эб холбоо байгуулһан хаашуул сэрэгээ Сиддимэй нюруу руу оруулхын урда тээ урда зүг руу шэглэн, Ханаһаан ороной Аштэроот-Карнааһим хотын рэпаиим гэдэг обог зонтой дайлалдажа диилэбэ. Удаань тэдэ Һаам хотые эзэлэн, зузиим яһатаниие илаба. Һүүлдэнь Шабээ-Кириатааим гэдэг тала нютагта оршодог эмиим обог зониие диилээ бэлэй. 6Хории обог зониие Сэһиир гэдэг хадалиг газар нютагһаань элһэн губиин хилэ дээрэ оршодог Эл-Параан хото хүрэтэр намнаба. 7Тэндэһээ эрьежэ, хойто зүгтэ Ээн-Мишпаат руу, ондоогоор нэрлэбэл, Кадээш хото руу орожо, амалээг обог зониие тэдэ бута сохёод, удаань Хацацоон-Тамаарта байдаг эмоор обог зониие илаба.

8-9Содом, Гоморро, Адмаа, Цэбоһиим болон Бээла, ондоогоор тэрэниие нэрлэбэл, Цооһар хотонуудай табан хаашуул нэгэдэжэ, Сиддим голдо ошожо, Элаамай хаан Хэдорлаһоомэр, Месопотами ороной Гоим хотын хаан Тидаал, Шинаарай хаан Амрапээл, мүн Ассириин Элласаар хотын хаан Ариоох гэдэг дүрбэн хаашуулай урдаһаа тэмсэбэ.

10Сиддим голдо дабирхайгаар дүүрэн нүхэн олон бэлэй. Содом ба Гоморрын хаашуулай сэрэгшэд зугадан тэрьедэхэдээ, иимэ нүхэнүүдтэ орожо хосорбо. Амиды үлэһэниинь хада уулаар тэрьедэбэ. 11Илалта туйлагша дүрбэн хаашуулай сэрэг Содом ба Гоморро хотонуудые эзэлэн, хамаг эд зөөрииень, эдеэ хоолыень хуряан абаба. 12Ошоходоо, тэдэнэр Содом хотодо тэрэ үедэ ажаһуужа байгша Лоодые, Абрамай дүүгэй хүбүүе, хамаг эд зөөритэйнь абаад ябаба.

13Тэрэ үедэ Абрам еврей эмоор обог зонтой хамта Мамрээ гэдэг хүнэй сарса модото харьяата газартань ажаһуужа байгаа. Энэ хугасаа соо тэрэ Мамрээтэй, Эшхоол, Анээр гэдэг дүүнэртэйнь анда нүхэд болоһон юм.

Нэгэтэ Содом хотоһоо арай амиды тэрьедэһэн нэгэ хүн Абрамда ерээд, юун болоһон тухай дуулгаба. 14Дүүгэйнгээ хүбүүнэй дайсадта баригдаад байһые дуулаад, Абрам бүлэдэнь түрэжэ үдэһэн, сэрэгэй эрдэм шудалһан гурбан зуун арба найман албатадаа дахуулаад, Хэдорлаһоомэрые тала баригшадтайнь хамта Даан хото хүрэтэр мүрдэн дахаба. 15Тэндэ Абрам зоноо хэдэн бүлэг болгон хубаагаад, һүниндөө дайсадта добтолон, бута сохибо. Иигэжэ тэрэ Дамааскһаа хойшоо оршодог Хобаа хото хүрэтэр үлөөшэ сэрэгые намнаа бэлэй. 16Дайсадай дээрмэдэн абаһан хамаг юумэ тэрэ һөөргэнь бусаагаа – Лоодые хамаг хогшол зөөритэйнь, Содом болон бусад хотонуудһаа олзологдоһон эрэ, эмэ зониие эд зөөритэйнь хамта бусаан асараа һэн.

Мэлхицээдэг Абрамые үреэнэ

17Хэдорлаһоомэрые мүн тэрэнэй тала бариһан хаашуулые илаад бусажа ябахадань, Абрамые Содом хотын хаан угтан, хотоһоо гараба. Тэдэ Шавээ голдо (мүнөө Хаанай гол гэдэг) уулзаа бэлэй. 18Мүн лэ Шалээм хотын Мэлхицээдэг хаан Абрамда хилээмэ, үзэмэй дараһан архи барижа, Дээдэ Бурханай санаартан байһан ушарһаа 19иигэжэ үреэбэ:

– Огторгой дэлхэй хоёрые бүтээһэн Дээдэ Бурхан таниие үреэхэнь болтогой! 20Дайсадаа дарахадатнай туһалһан Дээдэ Бурхан үреэл магтаалтай байһай!

Абрам тэрээндэ дайсанһаа бусаан абаһан эд баялигай арбанай нэгэ хубиие бэлэглэбэ.

21Удаань Содомой хаан Абрамда иигэжэ хэлэбэ:

– Бусаажа абаһан энэ бүхы эд зөөриие та өөртөө үлөөгты. Харин минии хотын зонииел намда һөөргэнь үгыт.

22-23Гэбэшье Абрам иигэжэ харюусаба:

– Һэтэрхэй зүүшье, түгдэрхэй тэбэнэшье танай зөөриһөө абахагүйб гэжэ огторгой газар хоёрые бүтээгшэ Дээдэ Эзэн Бурханай урда тангаригланаб. «Би Абрамые баян болгооб» гэжэ хожом танай хэлэжэ байхагүйн тула иигэнэб. 24Манай зон дайлалдажа ябахадаа, хоол хүнэһэнэйтнай зарим хубиие эдеэ юм бэзэ. Тэрэл минии хубида үгтэһэн болуужан. Бусаажа абаһан эд баялигһаа анда нүхэд Мамрээ, Эшхоол, Анээр гэгшэдэй хубида хүртэхэнь зүб бэзэ. Харин намда юуншье хэрэггүй.

Currently Selected:

Эхин 14: BurBBL2024

Highlight

Copy