Эхин 13

Абрам ба Лоот

1Абрам һамгантаяа хамаг малаа туун, эд бараагаа абаад, Египедһээ һөөргөө Нээгэб ошобо, түрэһэн дүүгэйнь хүбүүн Лоодшье тэрээнтэй суг ябалсаба. 2Мүнөө Абрам айхабтар баян болоод ябаа: адуу малааршье, алтааршье, сагаа мүнгөөршье. 3Нээгэбһээ тэрэ Бэт-Ээл ба Һай хоёр хотонуудай тэг дундахи газар руу бусаба. Анхан тэрэ эндэ тогтожо, 4Эзэндэ зорюулан, үргэлэй шэрээ шулуугаар бүтээгээ бэлэй. Абрам мүнөө тэндээ Эзэниие дахин хүндэлжэ, үреэл гуйба.

5Абрамтай суг нүүжэ ябаһан Лоот өөрын гэр бүлэтэй, мүн лэ өөрын малтай, өөрын майхангуудтай болонхой ябаа. 6Тэрэ газар нютагай бэлшээри, уһалуури эдэ хоёр айлай мал һүрэгтэ хүртэхөөр бэшэ болобо. 7Абрам Лоот хоёрой зараса малшад энээнһээ боложо, арсалдадаг, хэрэлдэдэг болобо. Тэдээнһээ гадна тэндэ ажаһуудаг ханаһаан болон пэриззии обог аймагайхид бэлшээри, уһанда бүришье хүртэхэгүй болоһон байгаа.

8Тиимэһээ Абрам Лоодто иигэжэ хэлэбэ:

– Бидэ түрэл гарал зон гээшэбди. Тиимэһээ маанадай, түрэл зоной, мүн зараса малшадаймнай хоорондоо эбээ таһархань һайн бэшэ. 9Үргэн салуу газар дайда урдашни байна бэшэ гү? Бэе бэеһээ таһарая. Шинии зүүлээ һааш, би баруулхаб. Шинии баруулаа һааш, би зүүлжээ ошохоб. Дуратай газараа шэлыш даа.

10Лоот хараба: Иордан голой нюруу Цооһар хото хүрэтэр үргэлжэ бэлшээри, уһа һайтай, Эзэнэй Эдээм сэсэрлиг мэтэ, Египедэй баян шэмэтэй газар дайда мэтэ һалбаржа байба. Тэрэ үедэ Эзэн Содом болон Гоморро хотонуудые усадхаадүй байгаа. 11Лоот энээниие шэнжэлээд, Иордан голой нюруу шэлэжэ, зүүн зүг зорин ябаба.

Иигэжэ эдэ хоёр бэе бэеһээ таһаржа, 12Абрам Ханаһаанда нютагжаба, харин Лоот Иордан голой нюруу дамжан нүүһээр Содом хотын шадар ерэжэ байрлаба. 13Содомой улад муу аяг зантай зон байгаа, Эзэниие оройдоошье ойндоо оруулдаггүй, хүндэлдэггүй һэн.

Мамрээ гэдэг хүнэй сарса мододой дэргэдэ Абрам түбхинэнэ

14Лоодой таһаржа нүүһэнэй удаа Эзэн Абрамда айладхаба:

– Байһан газартаа зогсоод, зүг бүхэниие шэртэ! 15Нюдэнэйш хараагай хүрэхэ бүхы энэ дайдые шамда болон шинии үри һадаһадта хэтын хэтэдэ эзэлхыетнай үгэхэб. 16Шинии үри һадаһадые элһэн мэтэ олон болгохоб. Сүл губиин элһэ тоолохын аргагүй мэтэ шинии үри һадаһад тоогүй олон болохо. 17Ши энэ байһан газараа орхёод, энэ Минии шамда гэжэ үгэһэн бүхы газар дайдаар нүүн яба!

18Иигээд Абрам майханаа хуряагаад, аян замда гаража, Хэброон хотын хажууда тогтон, тэндэхи Мамрээ гэдэг хүнэй сарса мододой дэргэдэ ерэбэ. Тэрэ Эзэндэ зорюулан, шулуугаар баһа нэгэ үргэлэй шэрээ барин бодхообо.

Currently Selected:

Эхин 13: BurBBL2024

Highlight

Copy