Пётрой 2-дохи хандалга 2

Хуурмаг һургагшанар

1Урдань израильшуудай дунда хуурмаг лүндэншэдэй элирдэгтэл адляар таанадай дунда хуурмаг һургагшад байха. Тэдэнэр зүб замһаа хадууруулдаг хуурмаг һургаалнуудые нюусаар асарха, тэдэниие эрхэ сүлөөтэй болгоһон Эзэнһээ арсаха, тиигэжэ тэдэнэр өөһэдтөө түргэн хосорол олохо. 2Олон хүнүүд тэдэнэрэй бузар хэрэгүүдые һажааха, тиигэжэ Үнэн бодото зам муушалха шалтаг тэдэнэр бусад зондо үгэхэ. 3Тэдэ хомхой хуурмаг һургагшад, зохёоһон үльгэрнүүдээ таанадта хөөрөөд, нилээн олзо өөһэдтөө олохо. Гэхэтэй сасуу хэһэн хэрэгүүдэйнь түлөө хэһээлтэ үни гэһээр бэлэн хүлеэжэ байна, тэдэнэй үхэлынь удахагүй.

4Эльгээмэлнүүдэйшье нүгэл үйлэдэхэдэ, Бурхан тэдэниие хайрлаагүй, Зарга шүүбэриин Үдэрэй ерэтэр тэдэниие тамада хэтын харанхыда хүлеэд барижа байгаа. 5Бурхан урдын хүнүүдыешье хайрлаагүй, дорой ябадалтай зониие уһан галабаар һүйдхөө. Тиихэдэ Бурханда үнэн зүбөөр хандаха тухай һургадаг Нойе, тэрээнтэй хамта үшөө долоон хүнэй амиие үлээгөө. 6Дорой ябадалтай зониие һэргылэн, Бурхан Содом ба Гоморро хотынхидые гэмнээд, үнэһэ болгон усадхаа. 7Зүгөөр Тэрэ зальхай забхай хүнүүдэй дунда арай шамай тэсэжэ байһан үнэн сэдьхэлтэй Лоодые абараа. 8Тэрэ үнэн сэдьхэлтэн тэдэ зоноор ажамидархадаа, нүгэлтэ үйлэ хэрэгүүдыень харахадаа, дуулахадаа, үдэр бүхэн аргагүй ехээр тулижа байгаа. 9Үнэн сэдьхэлтэй зониие туршалгануудһаа яажа аршалхые, муу муухай ябадал гаргагшадые Зарга шүүбэриин Үдэрэй хэһээлтэ хүрэтэр яажа һахижа байхые Эзэн мэдэхэ гэжэ урда хэлэгдэһэн харуулна. 10Илангаяа энэнь бэеынгээ харата хүсэлэнгүүдэй мэдэлдэ байдаг, Бурханай эрхэ засагые тоодоггүй хүнүүдтэ хабаатай.

Тэдэ убайгүй, һэшхэлгүй хуурмаг һургагшанар огторгойншье хүсэнүүдые доромжолхоёо айдаггүй. 11Эдэ хуурмаг һургагшадта орходоо нилээн хүсэтэй, һүр жабхалантай Эльгээмэлнүүдшье тэдэ огторгойн хүсэнүүдые доромжолдоггүй, Эзэнэй урда тэдэниие зэмэлдэггүй. 12Харин эдэ хүнүүд гансал зүнгөөрөө мэдэдэг, баригдажа алуулхын тула түрэдэг зэрлиг амитадтал адли: ухаагаараа ойлгохо аргагүй юумэнүүдээ хардадаг, тиимэһээ тэдэ зэрлиг амитадтал адли үхэхэ. 13Тэдэнэр хүнүүдтэ хүргэһэн хороо амсана. Үдэр дунда найрлаха, архидаха, һамгадаар орёолдохонь зохистой гэжэ тоолодог. Тиимэһээ таанадтай хамта хоол барихадаа, тэдэнэр өөһэдынгөө худал хуурмаг ябадалаар сэдьхэл ханажа, танай нэрэ түрые унагаадаг, бузарладаг. 14Тэдэнэй нюдэдынь ташаяан хүсэлэнгөөр дүүрэнхэй, тэдэ нүгэл хэжэ бэеэ ханахагүй. Тулгагүй ахир хүнүүдыел зангадаа оруулдаг. Сэдьхэлынь хомхолзожо һуршанхай. Тэдэнэр үхэхэл табилантай юм. 15Тэдэ сэхэ замһаа хадуураад, төөришэбэ; буруу юумэ хэжэ, мүнгэндэ шунашаһан Бэһоорой Балаһаам хүбүүнэй замаар ябаба. 16Гэбэшье Балаһаамай нүгэлынь элирүүлэн шүүмжэлэгдээ: хэлэгүй элжэгэнь хүндэл адли дуугаржа, лүндэншын тэнэг юумэ хэхэ гэжэ байхадань зогсоогоо.

17Тэдэ хүнүүд хатаһан булагуудта, шуурганда туугдаһан үүлэнүүдтэл адли дэмы юм: Бурхан тэдэндэ хаб харанхыда газар бэлдээд байна. 18Бардам хооһон үгэнүүдые хэлэн, тэдэнэр буруу замаар ябаһан хүнүүдһээ арай шамай холодоһон хүнүүдые бэеын хурисалай, зальхайралай зангада оруулдаг. 19Өөһэдөө үхэлэй барлагууд байһан мүртөө мэхэдээ оруулһан хүнүүдтэ эрхэ сүлөө амалдаг. Бидэниие ямар юумэн иланаб, бидэ тэрэ юумэнэй барлагууд болонобди. 20Манай Эзэн, Абарагша Иисүүс Христоосые мэдээд, энэ дэлхэйн бузарнуудһаа мултаржа шадаһан аад, һүүлдэнь дахин тэдэ хүсэнүүдтэ баригдажа илагдаһан хүнүүд һүүлэй һүүлдэ түрүүшынхиһээ бүри муу нүхэсэлдэ ороно. 21Үнэн сэдьхэлтэнэй замые мэдээд, өөһэдтэнь даалгагдаһан Бурханай нангин захяа заабариие сахихаяа болинхаар, тэдэ хүнүүдэй тэрэ замые юрэдөө мэдэнгүй байһань холо дээрэ байгаа. 22«Нохой бөөлжэһэндөө бусажа ошодог», «Угаагдаһан гахай һөөргөө шабар шабхайда хүльбэрхэеэ ошодог» гэһэн бодото оньһон үгэнүүд тэдэ хүнүүдэй тушаа хэлэгдэнэ.

Currently Selected:

Пётрой 2-дохи хандалга 2: BurBBL2024

Highlight

Copy