Иоаннай 2-дохи хандалга 1
1
Амаршалга
1Һүзэглэгшэ бүлгэмэй ахалагшаһаа – Бурханай шэлэжэ олоһон Хатанда. Танда, танай үхибүүдтэ би үнэхөөрөө дуратайб. Гансашье би бэшэ, мүн үнэн зүб юумые мэдэһэн бүхы хүнүүд таанадта дуратай. 2Юундэб гэбэл, Бурханай үнэн зүбынь бидэнтэй байна. Тэрэ үнэн зүбынь хододоо маанадтай хамта байлсаха. 3Үнэн зүбөөр, бэе бэедээ дуратайгаар ажаһуугша бидэндэ Эсэгэ Бурханай, Тэрэнэй Хүбүүн Иисүүс Христоосой дураниинь, үршөөл хайрань, энхэ тайбан байдалынь үршөөгдэхэ.
Бурханай үнэн зүбынь, Тэрэнэй дуран
4Эсэгэ Бурханһаа бидэнэй зааһан заабаряар, үнэн зүбөөр ажаһуугшадые шинии үхибүүдэй дунда олоод, би ехэ баярлааб. 5Бэе бэедээ дуратай байял даа гэжэ одоо би шамайе, хүндэтэ Хатан, гуйнаб. Мүнөө минии бэшэжэ байһан юумэн шэнэ захяа заабари бэшэ. Энэ заабариие бидэ анханһаа хойшо абаабди! 6Эсэгэ Бурханай захяа заабаряар бидэнэй һуугаа һаа, тэрэмнайл дуран гээшэ. Энэмнайл анханһаа хойшо таанарай дуулагша захяа заабари мүн, тиин энэ захяа заабариие сахиха ёһотойбди.
7Юундэб гэбэл, олон тоото мэхэшэд дэлхэйдэ ерэбэ. Иисүүс Христоосые хүн боложо газарта ерэһые тэдэ мэдэрнэгүй. Тиимэ хүнүүд мэхэшэд, Христоосой дайсад гээшэ. 8Тиимэһээ бэеэ нарин нягтаар абажа ябагты, юунэй түлөө бидэнэй ажаллаһые миин бү хосороогты, теэд ажалайнгаа түлөөһые хүсэд дүүрэнээр абаха гэжэ оролдогты. 9Христоосой һургаалһаа холодон, тэрэ һургаалые дахадаггүй хүн Бурхангүйгөөр ажаһууна. Харин Христоосой һургаалые баримталан сахигша Эсэгэ Бурхантай, Тэрэнэй Хүбүүнтэй нэгэн хамта байна. 10Хэрбээ Христоосой һургаалгүйгөөр танда хэн нэгэнэй ерээ һаа, тэрэ хүниие гэртээ бү оруулагты, тэрээнтэй бү мэндэшэлэлсэгты. 11Тэрээнтэй мэндэшэлэлсэһэн хүн тэрэнэй хорото муухай хэрэгтэ өөрөө хабаадалсаһан болоно.
Түгэсхэл
12Таанарта бэшэхэ гэһэн юумэн намда олон бии. Теэд саарһа, бэхэ хэрэглэжэ бэшэхые хүсэнэгүйб. Би өөрөө ерээд, таанартай хөөрэлдэхэб гэжэ найданаб. Тиихэдэл бидэнэй баяр баясхалан хүсэд дүүрэн болохо. 13Бурханай шэлэжэ олоһон эгэшыншни үхибүүд шамда мэндые хүргэнэ.
Currently Selected:
Иоаннай 2-дохи хандалга 1: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024