Yohaanisa 6

Ichashu Mukulu Asaa

(Maato 14:13-21; Mar 6:30-44; Luqa 9:10-17)

1Hessafe guye, Yesuusi Xibradoosa geetetiya Galila Abbaafe hefinthi pinnis. 2I harganchota pason oothida malaata be7ida gisho, daro asay iya kaallidosona. 3Yesuusi zumaa bolla keyidi, yan ba tamaaretara issife uttis. 4Ayhudeti bonchiya Paasika Ba7aale gallasay gakis. 5Yesuusi daro asay baako yeysa be7idi Filphoosako, “Ha asaa ubbaa muzanaw gidiya kathi awupe shammanee?” yaagis. 6I hessa Filphoosa paacanaw gisipe attishin, I ba huuphen ay oothaneko erees.

7Filphoosi zaaridi Yesuusako, “Hari attoshin, Huuphen huuphen, issi issi barsi gathanaw, nam7u xeetu dinaaren#6:7 Dinaare: Issi dinaarey issi asi issi gallas oothi pee7idi ekiya miishe. Nam7u xeetu dinaarey issi asi laytha bagga oothidi ekiya miishe keena. (Maato 20:2) xeellite. uythu shamminka gidenna” yaagis.

8Qassi Yesuusa tamaaretape issoy, Simoon Phexroosa ishay Indiriyasi, 9“Ichashu banga uythinne nam7u molo oykida issi na7ay haysan de7ees, shin ha asa ubbaas hessi ay maaddanee?” yaagis.

10Yesuusi ba tamaaretako, “Asaa utisite” yaagis. He bessan daro maati de7ees; asa ubbay uttis. Adde asaa tayboy ichashu mukulu gidana. 11Yesuusi uythaa ekidi Xoossaa galati simmidi yan uttida asaas gishis. Moluwaka ekidi hessada oothidi immin, asay ba koydaysa mela mis. 12Enti ubbay kallidaape guye, Yesuusi ba tamaaretako, “Issibayka iitonna mela attida tiifiya shiishite” yaagis. 13Hessa gisho, enti ubbaa shiishidosona. Asay min attida banga uytha tiifiya shiishidi tammanne nam7u gayta kunthidosona.

14Asay Yesuusi oothida malaatata be7ida wode, “Haysi tuma ha alamiya yaana geetetida nabiya” yaagidosona. 15Yesuusi enti iya oykidi wolqan kawo oothanaw haneysa eridi, barka zumaa bolla zaaridi keyis.

Yesuusi Abba Bollara Hemetis

(Maato 14:22-33; Mar 6:45-52)

16Sa7ay omarsida wode Yesuusa tamaareti abbaako wodhidosona. 17Sa7ay qammida gishonne Yesuusi buroo entako yiboona gisho iya tamaareti wogolon gelidi abba pinnidi Qifirnahooma baanaw dendidosona. 18Wolqaama carkoy carkida gisho abbay qaaxees. 19Ichashu woyko usupun kilo mitire gideysa mela enti abba pidhidi bidaape guye, Yesuusi abba bollara hemetishe yeysa be7idi yayyidosona. 20Shin I, “Babofite, tana” yaagis. 21Enti ufaytidi iya wogoluwan gelsidosona; iiraka wogoloy enti biya abba gaxa gakis.

Yesuusi De7o Uythu

22Wontetha gallas abbaafe hefinthan attida daro asay issi wogolo xalaali de7eysa be7idosona. Yesuusi ba tamaaretara wogoluwan gelidi, entara boonnaysanne enti bantarka bidaysa akeekidosona. 23Shin Xibradoosape hara wogoloti Yesuusi Xoossaa galatin, asay uythaa mida bessaa yidosona. 24Asay Yesuusi woyko iya tamaareti yan baynaysa be7idi, Yesuusa koyanaw wogolotan gelidi Qifirnahooma bidosona.

25Asay Yesuusa abbaafe hefinthan demmida wode, “Astamaariyaw, haa awude yadii?” yaagis.

26Yesuusi zaaridi, “Taani hintew tuma odayis; hinte tana koyey uythi midi kallida gishosafe attishin, malaata be7ida gishosa gidenna. 27Samiya kathas oothopite, shin merinaa de7o immiya kathas oothite. Xoossaa Aaway I oothana mela iyaw maata immida gisho he katha Asa Na7ay hintew immana” yaagis.

28Yaatin enti, “Nuuni Xoossaa oosuwa oothanaw ay oothanee?” yaagidi Yesuusa oychidosona.

29Yesuusi zaaridi, “Hinte oothana mela Xoossay koyiya oosoy haysa: I kiittidaysa ammanite” yaagis.

30Enti zaaridi, “Nuuni be7idi, nena ammanana mela ay malaata ne bessanee? Ne ay oothanee? 31Geeshsha Maxaafan, ‘Enti maana mela uythu salope immis’ geetetidi xaafetidaysada nu aawati mela biittan manna midosona” yaagidosona.#Kessa 6:4, 15; Maz 78:24.

32Yesuusi, “Taani hintew tuma odayis; hintew salope tuma uythaa immiday ta Aawape attishin, Muse gidenna. 33Hiza, Xoossay immiya uythay salope wodhidaysi alamiyas de7o immeysa” yaagis.

34Enti zaaridi, “Godaw, nuus he uythaa ubba wode imma” yaagidosona.

35Yesuusi, “Taani de7o immiya uythaa; taako yaa oonika ubbaraka koshatenna. Qassi tana ammaniya uray ubbaraka saamotenna. 36Shin taani hintew odas; hinte tana be7ideta, shin ammaneketa. 37Ta Aaway taw immiya ubbay taako yaana; qassi taako yaa oonaka kare yeddike. 38Taani ta koyaba oothanaw gidonashin tana kiittidaysi koyaba oothanaw salope yas. 39Tana kiittidaysi koyey haysa: taani I taw immida ubbataka wursetha gallas hayqope denthana melape attishin, issuwaka dhaysana mela koyenna. 40Hiza, ta Aaway koyey hessa: Na7aa be7idi ammaniya ubbay merinaa de7uwa ekana; taani he ubbaa wursetha gallas merinaa de7os hayqope denthana” yaagis.

41Yesuusi, “Taani salope wodhida uythaa” gida gisho, Ayhudeti iya bolla zuuzumidosona. 42Enti, “Haysi nuuni iya aawanne iya aayiw eriya Yoosefa Na7aa Yesuusa gidennee? Yaatin, I waanidi, ‘Taani salope wodhas’ gaanaw danda7ii?” yaagidosona.

43Yesuusi zaaridi, “Issoy issuwara zuuzuntha aggite. 44Tana kiitida ta Aaway taako ehiya asape attishin, taako yaanaw danda7iya oonika baawa. Taani wursetha gallas iya merinaa de7os hayqope denthana. 45Nabeti, ‘Xoossay asa ubbaa tamaarsana’ yaagidi xaafidosona. Aawa si7eysinne iyape tamaariya oonika taako yees.#Isa 54:13. 46Xoossaa matape yidaysafe attishin, Aawa be7iday oonika baawa; iya xalaali Aawa be7is.

47“Taani hintew tuma odayis; tana ammaniya oodeska merinaa de7oy de7ees. 48Taani de7o immiya uythaa. 49Hinte aawati mela biittan manna midosona, shin hayqidosona. 50Salope yaa uythay haysa; he uythaa miya oonika hayqenna. 51Salope yida de7o uythay tana. Oonika ha uythaa miiko merinaw daana. Qassi ha alamey de7on daana mela taani hintew immana uythay ta ashuwa” yaagis.

52Ayhudeti, “Ha addey ba ashuwa nu maana mela nuus waatidi immanaw danda7ii?” yaagidi banta giddon palamidosona.

53Hessa gisho, Yesuusi entako, “Taani hintew tuma odayis; Asa Na7aa ashuwa, hinte moonna ixiko, qassi iya suuthaa hinte uyonna ixiko, hintew de7oy baawa. 54Ta ashuwa miya uraasinne ta suuthaa uyaa uraas merinaa de7oy de7ees. Taani wursetha gallas iya hayqope denthana. 55Ta ashoy tuma kathi; ta suuthayka tuma ushshu. 56Ta ashuwa miya uraynne ta suuthaa uyaa uray tanan de7ees; taka iyan de7ayis. 57De7o Aaway tana kiittin, taani iya baggara de7on de7eysada, tana miya urayka ta gaason de7on daana. 58Salope wodhida uythay haysa: hinte aawati midi hayqida manna mela gidenna; ha uythaa miya uray merinaw daana” yaagis.

59Yesuusi Qifirnahooma kataman ayhude woosa keethan haysa tamaarsis.

Merina De7o Qaala

60Yesuusa tamaaretape dariya baggay hessa si7ida wode, “Haysi gelonna timirte; haysi ooddes gelii?” yaagidosona.

61Yesuusi ba tamaareti hessas zuuzumidaysa eridi, “Haysi hintena dhubbii? 62Yaatin, Asa Na7ay kase de7iyasuwa pude keyishin hinte be7idi woygandetii? 63Geeshsha Ayyaanay de7o immees; asa wolqi aykoka maaddenna. Ta hintew odiya qaalay de7o immiya Geeshsha Ayyaanape yees. 64Shin hinte giddon ammanonaysati de7oosona” yaagis. Ammanonaysati oonanteko Yesuusi koyrope doomidi erees. Qassi bana aathidi immanay ooneko erees. 65Qassika Yesuusi, “Aaway ba goonna oonika taako yaanaw danda7enna gada taani odiday hessa gishosa” yaagis.

66Hessa gaason, Yesuusa kaalleysatape daroti iya aggidi guye simmidosona; zaari iya kaallibookona. 67Yesuusi ba tammanne nam7u tamaaretako, “Hinteka aggidi baanaw koyeetii?” yaagidi oychis.

68Simoon Phexroosi zaaridi, “Godaw, nuuni oodeko baanee? New merinaa de7o immiya qaalay de7ees.#Maato 16:16; Mar 8:29; Luqa 9:20. 69Neeni Xoossaa Geeshshaa gideysa nuuni ammanoosinne eroos” yaagis.

70Yesuusi entako, “Taani hintena tammanne nam7ata doorabikina? Shin hintefe issoy Xalahe” yaagis. 71Yesuusi hessa giday Simoona Na7aa Asqoroota Yihudasa. Yihudi Yesuusa aathidi immanaw de7iya tammanne nam7u tamaaretape issuwa.

Currently Selected:

Yohaanisa 6: GFBLVF

Highlight

Copy