Yohaanisa 3

Yesuusanne Niqodimoosa

1Farsaaweta yaraape gidida, Ayhudeta halaqay, Niqodimoosa geetetiya issi addey de7ees. 2Niqodimoosi qamma Yesuusako yidi, “Astamaariyaw, neeni Xoossay kiitida astamaare gideysa nuuni eroos. Ayis giiko, Xoossay iyara doonna ixiko ha neeni oothiya malaata oothanaw danda7iya asi baawa” yaagis.

3Yesuusi zaaridi, “Taani new tuma odayis; oonika zaari yeletonna ixiko Xoossaa kawotethaa be7anaw danda7enna” yaagis.

4Niqodimoosi, “Ceega asi waanidi zaari yeletanaw danda7ii? Ba aaye ulo simmi gelidi zaari yeletanaw danda7ii?” yaagis.

5Yesuusi zaaridi, “Taani new tuma odayis; oonika haathafenne Geeshsha Ayyaanape yeletonna ixiko, Xoossaa kawotethaa gelanaw danda7enna. 6Asho na7atethi aawupenne aayipe yees; Xoossaa na7atethi Geeshsha Ayyaanape imetees. 7Taani, ‘Hinte zaari yeletanaw bessees’ gada hintew odida gisho neeni malaaletofa. 8Carkoy ba koyida bessi carkees. Neeni iya kooshincha si7asape attishin, I awupe yaako woyko aw biyako eraka. Ayyaanape yeletida ubbay hessa mela” yaagis.

9Yaatin Niqodimoosi, “Hessi waanidi hananaw danda7ii?” yaagidi oychis.

10Yesuusi zaaridi, “Neeni Isra7eeleta astamaare gidashe haysa erikii? 11Taani new tuma odayis; nu eriyaba odoosinne be7idaba markatoos, shin nu markatethaa hinte ekeketa. 12Taani hintew sa7aba odin hinte ammanonnaba gidiko saloba odin waatidi ammananee? 13Salope wodhida Asa Na7aape attishin, salo keyday oonika baawa; [salon de7iya Asa Na7ay tana”]#3:13 Salon de7iya Asa Na7ay tana: Issi issi beni maxaafati gujoosona. yaagis.

14-15Musey mela biittan Naase birata shooshi kaqidaysada tana ammanida ubbay merinaa de7uwa ekana mela Asa Na7ay dhoqu gaanaw bessees.#Taybo 21:9.

16Xoossaa Na7aa ammaniya ubbay merinaa de7uwa laattanaape attishin, dhayonna mela Xoossay ha alamiya daro dosida gisho ba issi Na7aa immis. 17Xoossay ba Na7aa ha alamiya kiittiday alamiya pirdanaw gidonashin alamiya iya baggara ashshanaasa.

18Na7aa ammaniya oonika pirdetenna, shin Na7aa ammanonna oonika issi Xoossaa Na7aa ammanibona gisho ha77i pirdetis. 19Pirdayka haysa: poo7oy alamiya yis, shin asaa oosoy iita gidiya gisho asay poo7uwape aathidi dhumaa dosees. 20Iitabaa oothiya oonika poo7o ixees. Ayis giiko, ba oosoy qonconna mela poo7uwako yeenna. 21Shin tuma oothiya oonika Xoossay kiitidaysada I oothidaysa poo7oy qoncisana mela poo7uwako yees.

Xammaqiya Yohaanisi Yesuusaba Markatis

22Hessafe guye, Yesuusinne iya tamaareti Yihuda biitta bidosona. Yesuusi yan xammaqishe entara guutha wode uttis.

23Qassi Yohaanisi Saleema matan de7iya Henoona giya bessan gidiya haathi de7iya gisho asaa yan xammaqees. Asayka yaa bidi xammaqetosona. 24He wode Yohaanisi buroo qashetibeenna.#Maato 14:3; Mar 6:17; Luqa 3:19-20.

25Hessafe guye, Yohaanisa tamaaretinne issi Ayhude addey#3:25 Issi Ayhude Addey: Issi issi maxaafati “Guutha Ayhude asati” yaagosona. geeshsho wogabaa palamidosona. 26Enti Yohaanisako bidi, “Astamaariyaw, Yordaanose Shaafape hefinthan neera de7eysi, neeni iyabaa markatidaysi, Heko xammaqees. Asa ubbayka iyako boosona” yaagidosona.

27Yohaanisi zaaridi, “Xoossay immonna asi aybibaaka ekanaw danda7enna. 28‘Taani Kiristoosa gidike, shin iyape sinthe kiitetas’ gidaysas taw hinte, hinte huuphen marka.#Yoha 1:20. 29Gelos giigidaara ekenaw giigidaysasa. Ekeysa laggey iya matan eqidi I geysa si7iya wode daro ufaytees. Hessa gisho, haysi ta ufaysay poletis. 30I gitatanaw taani guuxanaw bessees” yaagis.

31Bollafe yeysi ubbaafe bolla. Sa7ape bentidaysi sa7aba. I sa7aba odees. Salope yeysi ubbaafe bolla. 32I ba be7idabaanne si7idaba markatees, shin iya markatethaa ekey baawa. 33Iya markatethaa ekiya oonika Xoossay tuma gideysa qoncisees. 34Xoossay ba geeshsha Ayyaana iyaw kumethi immiya gisho Xoossay kiittidaysi Xoossaa qaala odees. 35Aaway ba Na7aa dosidi ubbaba iya kushen wothis.#Maato 11:27; Luqa 10:22. 36Na7aa ammaniya uraas merinaa de7oy de7ees. Shin Na7aa ammanonaysa bolla Xoossaa hanqoy de7eesipe attishin, I de7o demmenna.

Currently Selected:

Yohaanisa 3: GFBLVF

Highlight

Copy