Medhetethi 41
41
Gibxe Kawa Amuho
1Nam7u laythafe guye, Gibxe Kawoy amuho amuhis. He amuhuwan I Nayle Shaafa gaxan eqis. 2Laapun ordenne modho miizati Nayle Shaafape keyidi, maata mishin be7is. 3Entafe kaallidi, hara laapun gilqa miizati Nayle Shaafape keyidi, shaafa gaxan de7iya hara miizata matan eqidosona. 4He gilqa miizati laapun ordenne modho miizata mittidosona. Hessafe guye, Kawoy barkis.
5I zaari dhiskidi, hara amuhoka amuhis. Laapun lo77onne muruuta mor7eti issi maqa bolla keyidosona. 6Entafe kaallidi, lee7onne doloha bagga carkon shullida hara laapun mor7eti keyidosona. 7He lee7ida mor7eti lo77onne muruuta mor7eta mittidosona. Hessafe guye, Kawoy barkidi amuho gideysa eris. 8Sa7ay wontin dhiskofe I dendiya wode iya wozanay yarkis. Hessa gisho, Gibxen de7iya bitanchotanne eranchota ubbaa kawoy xeegisidi entaw ba amuhuwa odis. Shin iyaw he amuhuwa birshiya asi dhayis.
9Ushsha kaapoy he wode Gibxe kawako, “Taani ta naaquwa hachi hassayayis. 10Issi wode Kawoy ba aylleta hanqetidi, tananne kathaa kaapuwa qasho keethan yeggis. 11Yan de7ishe nu nam7ati amuho amuhida. He amuhotas dumma dumma birshethay de7ees. 12He wode naageysata kaapuwa aylley, Ibraawe panthay, nuura qashon de7ees. Nuuni nu amuhuwa iyaw odin, I nuus huuphen huuphen amuhuwa billis. 13Yaanin, he hanoti I nuus billidaysada hanidosona. Hessi aybe giiko, taani ta shuumatethaako simmas, hankoy kaqetis” yaagis.
14Yaatin, Gibxe Kawoy Yoosefa xeegisis. Enti iya qasho keethafe ellesidi ehidosona. I meedetidi ba ma7uwa laammidi, kawako gelis. 15Kawoy Yoosefa, “Taani amuho amuhas, shin taw issi asika billanaw danda7ibeenna. Taani, ne amuho billanaw danda7eysa si7as” yaagis.
16Yoosefi, “Taani hessa danda7ike, shin Xoossay kawas lo77onne like birshethi immana” yaagis.
17Kawoy, “Taani ta amuhora Nayle Shaafa gaxan eqidashin, 18laapun ordenne modho miizati Nayle Shaafape keyidi, maata moosona. 19Entafe kaallidi, hara laapun gilqanne laafida miizati keyidosona. Taani hessa mela gilqa miizi Gibxe biittan ubbaka be7a erike. 20He gilqanne laafida miizati koyro keyida laapun modho miizata mittidosona. 21Shin enta mittidaape guye kaseysada gilqi uttida gisho, enti mittidaba oonika eranaw danda7ibeenna. Hessafe guye, taani barkas.
22“Taani ta amuhuwan qassi laapun lo77onne muruuta mor7eti issi maqa bolla keydaysata be7as. 23Entafe kaallidi, lee7onne doloha bagga carkuwan shullida hara laapun mor7eti keyidosona. 24He lee7ida mor7eti laapun lo77o mor7eta midosona. Taani ha amuhuwa bitanchotas odas, shin taw amuhuwa birshiya asi bentibeenna” yaagis.
25Hessafe guye, Yoosefi Gibxe kawako, “kawa amuhota birshethay issino. Xoossay ba oothana haniyaba kawas qoncisis. 26He laapun lo77o miizati laapun laythata, qassi laapun lo77o mor7eti laapun laythata, ha amuhota birshethay issino. 27He laapun gilqanne laafida miizati laapun laythata, qassi doloha bagga carkuwan shullida, lee7o laapun mor7eti laapun kosha laythata.
28“Taani kawas odidaysadaka, Xoossay ba oothana haniyaba kawa bessis. 29Laapun daro kalo laythati Gibxe biitta ubban yaana. 30Shin hessafe guye, laapun kosha laythati kaallidi yaana. He wode Gibxe kaaloy ubbay dogetana, koshi biitta caacana. 31Koshay daro iita gidiya gisho he biitta kaaloy dogetidi attana. 32Nam7u ogiyan kawas he amuhoy bentiday Xoossay ba qopidaba oothanaw qanxida gishosa. Hessa Xoossay mata woden oothana.
33“Ha7i hiza, neeni eranchonne cinca asi koyada Gibxe biittan shuuma. 34Laapun kalo laythan kaxiya kathaafe ichashu kushiyape issuwa shiishana asata shuuma. 35Enti yaa kalo laythan kathaa shiishidi, banta aawatethan kataman kataman minjidi wothana mela kiita. 36Biittay koshan dhayona mela ha kathay Gibxe biittan laapun laythan dendana koshas minjetidi de7o” yaagis.
Yoosefi Gibxe Biittan Shuumetetha
37Yaatin he oday Gibxe kawasinne iya moorinnatas lo77o gididi bentis. 38Hessa gisho, Kawoy entako, “Yoosefape aadhiya hara Xoossa Ayyaanara de7iya asi demmanaw danda7oko” yaagis.
39Hessafe guye Kawoy Yoosefa, “Xoossay haysa ubba nena erisida gisho, ne mela eranchoynne cinca asi oonika baawa. 40Taani nena ta biittan shuumas. Ta asa ubbay new kiitetana. Taape hari neepe aadhiya oonika baawa. 41Heko, taani nena Gibxe biitta ubba bolla shuumas” yaagis. 42Hessafe guye, Kawoy ba paramiya migiduwa ba biradhiyafe kessidi, Yoosefa biradhen aathis. Boncho ma7onne qoodhe worqa iya mayzis. 43Kawoy ba nam7antho para gaariya Yoosefa togisis. Boncho wotaadarey, “Ziggite! Ziggite!” yaagishe iyape sinthara hemetees. Hessada oothidi, kawoy iya Gibxe biitta ubbaa bolla shuumis.
44Hessafe guye Kawoy Yoosefa, “Taani kawo gidikoka ne kiittonna oonika Gibxe biitta ubban ba kushiya woyko ba tohuwa qaaxofo” yaagis. 45Kawoy Yoosefa, “Xafnaat-Pa7ina” gidi sunthis. I iyaw Ona katama kahiniya Phoxfaara na7iw Asnaato macho immis. Yaanin, Yoosefi Gibxe biitta ubbaa bolla maata ekis.
46Yoosefi Gibxe kawas ooso oykiya wode, iyaw laythi hastama. Yoosefi kawa sinthafe keyidi, Gibxe biitta ubbaa giddon hemetis. 47He laapun kalo laythan biittan daro kathi kaxis. 48Yoosefi Gibxe biittan he laapun kalo laytha katha ubbaa shiishidi, katamatan minjis. Issi issi katama yuushuwan de7iya gadiyape katha ubbaa he katamatan shiishis. 49Yoosefi abba shafiya mela daro katha shiishis. Katha darotethaafe dendoysan makanaw danda7etibona gisho, maki maki qoleysa aggaagis.
50Kosha laythi yaanape sinthe, Ona katama kahine Phoxfaara na7e Asnaatipe Yoosefi nam7u adde nayta yelis. 51Yoosefi ba bayra na7aa sunthaa, “Xoossay tana ta metuwanne ta aawa soo asa ubbaa dogisis” gidi Minaase#41:51 Minaase: Ibraawetho doonan ha suntha birshethay “Dogisees” guussu. gidi sunthis. 52Nam7antho na7aa sunthaaka, “Xoossay ta metootida biittan taw na7a immis” gidi Efreema#41:52 Efreema: Ibraawetho doonan ha suntha birshethay “Na7a immees” guussu. gidi sunthis.
53Gibxe biittan de7iya he laapun kalo laythati aadhidosona. 54Yoosefi odidaysada laapun kosha laythati kaalli yidosona. Hara biitta ubban koshi keyis, shin Gibxe biitta ubban kathay de7ees. 55Gibxe biittay ubbay koshatida wode, asay kathas kawako waassidosona. Kawoy Gibxe asa ubba, “Yoosefako bidi, I odeysa oothite” yaagidi kiittis.
56Koshay Gibxe biitta ubba gakida wode, Yoosefi katha minjida shaaleta ubba dooydi, kathi Gibxe asaas bayzis. 57Biitta ubban koshi suullida gisho, sa7an de7iya asa ubbay kathi Yoosefape shammanaw Gibxe yidosona.
Currently Selected:
Medhetethi 41: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
