Medhetethi 39
39
Yoosefanne Phoxfaara Machiw
1Isma7eela asati Yoosefa Gibxe biitta efidosona. Gibxe kawa moorinatape issuwas, kawa naageysata halaqaas Yoosefa bayzidosona.
2Goday Yoosefara de7iya gisho, I oothiyaba ubbaa iyaw injeyis. Yaatin, ba Gibxe godaa son de7is. 3Goday iyara de7eysanne I oothiyaba ubbaa iyaw injeyidaysa Phoxfaari be7ida wode, 4Yoosefa dosis, baw mata oosancho oothis. Phoxfaari iya ba keetha bollanne baw de7iyaba ubbaa bolla shuumis. 5He wodepe doomidi, Goday Gibxe ura keetha Yoosefa gisho anjis. Godaa anjoy Phoxfaara sooninne iya gaden de7iyaba ubbaa bolla wodhis. 6I miya kathiw eriyaripe attishin, baw de7iya haraba ubbaa Yoosefa kushen sheedhis.
Yoosefi yegelsinne mala lo77o asi. 7Guutha wodepe guye, iya godaa machiya Yoosefa be7ada, “Haaya, taara zin7a” yaagasu.
8Shin I ixidi, iiko, “Be7a, ta goday, baw de7iyaba ubbaa ta kushen yeggida gisho, ba son de7iyabas aykoka hirgenna. 9Ha son taape aadhey oonika baawa. Neeni iya macho gidiya gisho, neepe attishin, haraa, I taw immonabay baawa. Yaatin, taani waatada haysa mela daro iitaba hanada Xoossa bolla nagara ootho?” yaagis. 10Iya he odaa wonta wonta Yoosefas odinka, I iira aqonna woyko I mata shiiqona ixis.
11Shin issi gallas I ba ooso oothanaw soo geliya wode, soo aylletape oonika son baawa. 12Iya Yoosefa afila oykada, “Taara zin7a” yaagasu. Shin I ba afila I kushiyan yeggi aggidi, soope kare woxi keyis.
13Yoosefi ba afila I kushiyan yeggi aggidi, soope kare woxi keydaysa iya be7ida wode, 14ba soo aylleta xeegada, “Heko, ta azinay ehida ha Ibraawe uray tana kawushshanaw oykis. I tana iissanaw ta de7iyasuwa gelis, shin taani waassas. 15I ba afila ta matan yeggi aggidi, soope kare woxidi keyis” yaagasu.
16I azinay soo yaana gakanaw iya Yoosefa afila ba matan wothasu. 17I yin, iyaw haysada gada odasu; “Haysi ne ehida Ibraawe aylley tana iissanaw taako gelis. 18Shin taani waassin, ba afila ta matan yeggi aggidi, soope kare woxi keyis” yaagasu.
19Iya goday hanidaba si7ida wode daro yilotis. 20Iya goday Yoosefa efidi, kawa qasho asay de7iya qasho keethan yeggis.
21Shin Yoosefi qasho keethan de7iya wode, Goday iyara de7ees. Ba keehatetha iyaw darsidi, qasho keetha kaapuwa sinthan iyaw saba immis. 22Yaanin, qasho keetha kaapoy qasho asa ubba Yoosefa kushen yeggis. Yan oosetiyaba ubbaas aawatetha immis. 23Goday Yoosefara gididi, I oothiyaba ubbaa iyaw injeyida gisho, qasho keethaa kaapoy Yoosefa kushen de7iyabas aykoka hirgenna.
Currently Selected:
Medhetethi 39: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
