ሮመ 15

1ኑኒ አማኖን ምንዳይሳት ዳቡራንቾታ ቶሁዋ ቶካናዉ በሴስ። ኑኒ ኑና ኡፋይሳናዉ በሰና። 2ኑኒ ኑ እሻ አማኖን ምንናዉ እያ ማዳናዉነ ኡፋይሳናዉ በሴስ። 3ክርስቶስ ባና ኡፋይስቤና። ሽን ጌሻ ማፃፋን፥ “አሳይ ነና ጫይዳ ጫሻይ ታና ጋክስ”#ማዝ 69:9. ጌተትድ ፃፈትዳይሳዳ ሀንስ። 4ጌሻ ማፃፋይ እምያ ገንጫንነ ምንዋን ኑ ኡፋይሳ ኤካና መላ ጌሻ ማፃፋን ፃፈትዳ ኡባይ ኑና ታማርሳናዉ ፃፈትስ።

5ገንጫነ ምኖተ እምያ ጎዳይ ህንተ ክርስቶስ የሱሳ ካልያ ዎደ እስፈተ ህንተዉ እሞ። 6ሄስካ፥ ኑ ጎዳ የሱስ ክርስቶሳ አዋ፥ ፆሳ፥ እስ ዎዛናንነ እስ ቃላን ህንተ ቦንቻና መላሳ።

ዎንገል አሳ ኡባሳ

7ክርስቶስ ህንተና ኤክዳይሳዳ ፆሳ ቦንቾስ እሶይ እሱዋ ኤክተ። 8ፆሳይ በን አዋታስ እምዳ ኡፋይሳይ ፖለታና መላነ እያ ቱማተይ ኤረታና መላ ክርስቶስ አይሁደታ አይለ ግድድ ይዳይሳ ታ ህንተዉ ኦዳይስ። 9ክርስቶስ አይሁደታ አይለ ግድዳ ሀራ ጋሶይ ቃስ አይሁደ ግዶና አሳት ፆሳ እያ ማሮተ ግሾ ጋላታና መላሳ። ጌሻ ማፃፋን፥

“ታ ነና አይሁደ ግዶና አሳ ግዶን ጋላታና፤

ነ ሱን ሳባና”#2 ሳሜ 22:50፤ ማዝ 18:49.

ጌተትድ ፃፈትዳይሳዳ ሀንስ።

10ቃስ፥

“አይሁደ ግዶና አሳቶ፥

ፆሳ ደርያራ ኡፋይትተ”#ዛረ 32:43.

ያገትስ።

11ቃስ ዛሪድ፥

“አይሁደ ግዶና አሳቶ፥

ጎዳ ጋላትተ፤

ካዎተ ኡባይ እያ ሳቢተ”#ማዝ 117:1.

ያገትስ።

12ሄሳዳ እሳያስ፥

“እሰየ ኮቻፈ የለትያ እሶይ ያና፤

እ ካዎተ ኡባ ሃራና።

ኤንቲ ባንታ ኡፋይሳ እያ ቦላ ዎና”#እሳ 11:10.

ያጌስ።

13ጌሻ አያና ዎልቃን ህንተ ድጫና መላ ኡፋይስ እምያ ፆሳይ፥ ህንተ አማኑዋ ጋሶን ህንተዉ ኡፋይስነ ሳሮተ ኩመ እሞ።

ጳዉሎስ ኪታ ፃፍዳ ጋሶ

14ታ እሻቶ፥ ህንተናን ሎኦተነ ኤራተ ኩምዳይሳ ቃስ እሶይ እሱዋ ዞራናዉ ዳንዳኤይሳ ታ ጌሻዳ ኤራይስ። 15ታኒ ህንተና እስ እስባ ጉጃ አኬክሳናዉ ኮያዳ ያዮና ሀ ዳብዳብያ ህንተዉ ፃፋስ። 16ታኒ ክርስቶስ የሱሳ አይለ ግዳዳ፥ አይሁደ ግዶና አሳስ ካህነዳ ኦዳ፥ ዎንገላ ኦዳና መላ ፆሳይ ታዉ አ ኬሀተ እሚስ። አይሁደ ግዶና አሳይ ጌሻ አያናን ጌይድ፥ ፆሳ ኡፋይስያ ያርሾ ግዳና መላ ፆሳይ ሄሳ ኦስ።

17ታኒ ክርስቶስ የሱሳን ግዳዳ ፆሳስ ኦያ ኦሱዋን ጬቀታይስ። 18አይሁደ ግዶና አሳይ ፆሳስ ኪተታናዳ፥ ክርስቶስ ታ ቃላነ ታ ኦሱዋ ባጋራ ኦዳ ኦሱዋፐ አትሽን፥ ሀር ታ ጬቀትያባይ ባዋ። 19ፆሳይ ሄሳ ማላታንነ ጌሻ አያና ዎልቃን ዋት ኦዳኮ ታ ህንተዉ ኦዳና። ታኒ የሩሳላመፐ ዶማዳ፥ እልዋርቆነ ጋካናዉ ክርስቶሳ ዎንገላ ሳባካስ። 20ታኒ ሀራ አስ ባስዳ በሳን ኬፃናዉ ኮይከ። ክርስቶሳ ሱንይ ፄገትቦና በሳን ዎንገላ ኦዳናዉ አሞታይስ። 21ጌሻ ማፃፋን፥

“እያባይ ኦደትቦና አሳት እያ በአና፤

እያባ ስእቦና አሳት አኬካና”#እሳ 52:15.

ጌተትድ ፃፈትስ።

22ሄሳ ጋሶን፥ ታኒ ህንተኮ ያናዉ ዳንዳአብከ።#ሮመ 1:13. 23ሽን ታኒ ሀእ ሀ ሄራን ታ ኦሱዋ ኦንግዳ ግሾነ ዳሮ ላይፈ ዶማዳ ህንተና በአናዉ ላሞትዳ ግሾ፥ 24ታኒ እስፔነ ባሸ ህንተና በአናዉ ቆፓስ። ቃስ ጉ ዎደ ህንተራ ኡፋይትዳፐ ጉየ፥ እስፔነ ብያ ዎደ ህንተ ታ ኦግያስ ታና ማዳና መላ ኮያይስ።

25ሽን ሀእ ታኒ ፆሳ አሳታ ማዳናዉ የሩሳላመ ባይስ። 26ማቀዶነነ አካያን ደእያ ፆሳ አሳት፥ የሩሳላመን ደእያ ማንቆታ ሚሸን ማዳናዉ ኮይዳ ግሾሳ። 27ኤንቲ ማንቆታ ማዳናይስ ኤንታዉ አቶናባ ግድዳ ግሾ ባንታ ሁጰን ሄሳ ኦናዉ ቆፋ ቃችዶሶና። አይሁደት አይሁደ ግዶናይሳታራ አያና አንጁዋ ሻከትኮ፥ ኤንቲ ቃስ ባንታዉ ደእያባን አይሁደታ ማዳናዉ በሴስ።#2 ቆሮ 9:11. 28ሄሳ ግሾ፥ ታኒ ሄ ሺቅዳ ሚሽያ ኤንታዉ እምዳፐ ጉየ፥ እስፔነ ባሸ ህንተ ማታራ አና። 29ታኒ ህንተኮ ብያ ዎደ ክርስቶሳ አንጁዋን ኩማዳ ባናይሳ ኤራይስ።

30ታ እሻቶ፥ ታዉ ፆሳ ዎስሸ ታ ባፅያን ታራ ኤቃና መላ ጎዳ የሱስ ክርስቶሳንነ ጌሻ አያና ሲቁዋን ህንተና ዎሳይስ። 31ፆሳይ ታና ይሁዳን ደእያ አማኖና አሳታፐ አሻናዳነ የሩሳላመን ታ ኦና ኦሶይ ፆሳ አሳታ ማታን ኤከታና መላ ታዉ ዎስተ። 32ቃስ ፆሳይ ጊኮ፥ ታኒ ህንተኮ ባዳ ኡፋይሳን ህንተራ ሸምፓና መላ ታዉ ዎስተ። 33ሳሮተ ፆሳይ ህንተ ኡባራ ግዶ። አምንእ።

Currently Selected:

ሮመ 15: GFBEVF

Highlight

Copy