ሮመ 1

1የሱስ ክርስቶሳ አይለ ግድዳ፥ ሀዋረ ግዳና መላ ፄገትዳይሳፈነ ፆሳ ዎንገላ ሳባካና መላ ዶረትዳ ጳዉሎስ ኪትዳ ኪታ።

2ፆሳይ ዳሮ ዎደፐ ስን ባ ናበታ ባጋራ እማና ያግዳ ፆሳ ዎንገላይ ጌሻ ማፃፋታን ፃፈትስ። 3ሄ ዎንገላይ አሾን ዳዊታ ሼሻፐ የለትዳ፥ ፆሳ ናኣ፥ ኑ ጎዳ የሱስ ክርስቶሳባ። 4ቃስ እ ባ ጌሻ አያናን ሀይቆፐ ደንድድ፥ ፆሳ ናኣ ግደይሳ ግታ ዎልቃን በስስ። 5እያ ባጋራ አይሁደ ግዶና አሳ ኡባይ፥ አማንድ ኪተታና መላ ክርስቶሳ ሱን ግሾ፥ ፆሳይ አ ኬሀተነ ሀዋረተ ማታ ኑስ እሚስ። 6የሱስ ክርስቶሳስ ግዳና መላ ፄገትዳ አሳታፐ ባጋት ህንተና።

7ሮመን ደእያ፥ ፆሳይ ሲቀይሳታስነ እያ ጌሻ ደረ ግዳና መላ ዶርዳይሳታስ።

ፆሳ ኑ አዋፐነ ጎዳ የሱስ ክርስቶሳፐ አ ኬሀተይነ ሳሮተይ ህንተዉ ግዶ።

ጋላታ ዎሳ

8ኡባፈ ኮይሮታዳ፥ ህንተ አማኖይ ቢታ ኡባን ስኤትዳ ግሾ፥ የሱስ ክርስቶሳ ባጋራ ህንተ ግሾ ታ ፆሳ ጋላታይስ። 9ታኒ እያ ናኣ ዎንገላባ ኩመ ዎዛናን ኦድያ ፆሳይ፥ ታኒ ታ ዎሳን ኡባ ዎደ ህንተና ቆፐይሳስ እ ማርካ። 10ዉርሰን፥ ፆሳ ሸነ ግድኮ፥ ታኒ ህንተኮ ባናዉ ኦገይ ታዉ እንጀታና መላ ኡባ ዎደ ዎሳይስ። 11ታኒ ህንተዉ አያና እሙዋ ሻካናዉነ ህንተና በአናዉ ላሞታይስ። 12ሄስካ፥ ታኒ ህንተ አማኑዋን፥ ቃስ ህንተ ታ አማኑዋን ምነታና መላሳ።

13ታ እሻቶ፥ ታኒ አይሁደ ግዶና አሳፐ አይፈ ደምዳይሳዳ፥ ህንተፈካ አይፈ ደማናዉ ህንተኮ ባናዉ ቆፓስ፥ ሽን ድገታስ።#ሀዋ 19:21. 14ታማርዳ አሳስነ ታማርቦና አሳስ ቃስ ጭንጫታስነ ኤያታስ ታዉ አጮይ ደኤስ።

15ሄሳ ግሾ፥ ሮመን ደእያ ህንተዉካ ዎንገላ ኦዳናዉ አሞታይስ።

ዎንገል ፆሳ ዎልቃ

16እያ አማንያ ኡባ፥ ኮይሮትድ አይሁደታ፥ ካልድ አይሁደ ግዶናይሳታ አሻናዉ ዎንገላይ ፆሳ ዎልቃ ግድያ ግሾ፥ ታ ዎንገላን ዬላትከ።#ማር 8:38. 17ፅሎይ አማኖን ደኦን ዳና ጌተትድ ጌሻ ማፃፋን ፃፈትስ። ዎንገላን ፆሳ ፅሎተይ ቆንጭስ፤ ኮይሮፐ ዉርሰ ጋካናዉ፥ አሳይ ፅለይ አማኖና።#እብራ 2:4.

አሳ ኢታተ

18ቱማይ ኤረቶና መላ ባንታ ኢታ ኦሶን ካምያ አሳ ቦላነ ናጋራ ኡባ ቦላ፥ ፆሳ ሀንቆይ ሳሎፐ ዎስ። 19ፆሳይ ኤንታዉ ቆንጫናዉ በሲያባ ቆንጭስዳ ግሾ፥ ኤንቲ ፆሳባ ኤሮሶና። 20አላመይ መቶሳፐ ዶምድ፥ አሳስ በንቶና ፆሳ ካንዶይ፥ ሄስካ እያ መርና ዎልቃይነ ፆሳተይ እያ መተን ቆንጭድ ደእያ ግሾ፥ አሳይ ባንታ ኢታተስ ጋሶያባይ ባዋ።

21ኤንቲ ፆሳ ኤርሸ፥ እያ ቦንችቦኮናነ ጋላትቦኮና። ኤንታ ቆፋይ ማዶናባ ግድስ፤ ኤንታ አኬኮና ዎዛናይ ምስ።#ኤፈ 4:17-18. 22ኤንቲ ባንታና ጭንጫታ ጎሶና፥ ሽን ኤያታ። 23ኤንቲ ሀይቆና ፆሳ ጎይናናይሳ አግድ፥ ሀይቅያ አሳ መን፥ ካፎታ መን፥ ዶአታ መንነ ኡሎራ ጎሸትያባታ ዳንስድ ኦዳ ምስለታ ጎይንዶሶና።#ዛረ 4:16-18.

24ሄሳ ግሾ፥ ኤንቲ እሶይ እሱዋራ ቦርሶባ ኦድ፥ ባንታ አሳተ ካዉሻና መላ ፆሳይ ኤንታ ዎዛናይ አሞትያ ቱና ኦሶስ ኤንታ የግ አግስ። 25ሄስ ሀንዳይ ኤንቲ ፆሳ ቱማ ዎርዶን ላምዳ ግሾነ መዳ ፆሳ አግድ፥ መተ ጎይንዳ ግሾሳ። ፆሳይ መርናዉ ጋላተትዳይሳ። አምንእ።

26ሄሳ ግሾ፥ ፆሳይ ኤንታና ኤንታ ቦርሶ አሙዋስ የግ አግስ። ኤንታ ማጫሳይ ባንታዉ በሲያ አደራ ጋሄተ አግድ፥ በሶናባ ሀንድ ማጫስ ማጫሳራ ጋሄትዶሶና። 27ሄሳዳካ፥ አደት ባንታዉ በሲያ ማጫሳራ ጋሄተ አግድ፥ አደይ አደራ ጋሄትዶሶና። አደት እሶይ እሱዋራ አሞን ፁገትድ፥ ቦርሶባ ኦዶሶና። ባንታ ኦዳ ናጋራስ በሲያ ፕርዳ ኤክዶሶና።

28ኤንቲ ፆሳ ኤርሸ፥ ሀር አቶሽን እያባ ቆፓናዉ ኮዮና እፅዳ ግሾ፥ በሶናባ ኦና መላ ፆሳይ ኤንታና ፓና ቆፋስ አድ እሚስ። 29ኤንታን ጌላተ፥ ኢታተ፥ ዪቀይ፥ ገነይ፥ ቃናተይ፥ ሸምፖ ዎይ፥ ፓላም፥ ጭሞይነ ኢታ አሞይ ኩምስ። ኤንቲ ዝግረይሳታ፥ 30አሳ ሱን ኢሰይሳታ፥ ፆሳ እፀይሳታ፥ ጫየይሳታ፥ ኦቶረይሳታ፥ ጬቀተይሳታ፥ ኢታባ ኦናዉ ኮየይሳታነ ባንታ አየስነ አዋስ ኪተቶናይሳታ፥ 31አኬኮናይሳታ፥ ጫቆ መንይሳታ፥ ሲቆይ ባይናይሳታ፥ ቃይ ባይናይሳታ። 32ሀይሳታ መላ ኦይሳታስ ሀይቆይ በሴስ ግያ ፆሳ ህግያ ኤርሸ፥ ሀይሳታ ኦሶና። ኤንቲ ባንታዉ ኦሶ ፃላላ ግዶናሽን፥ ኦያ ሀራታካ ናሾሶና።

Currently Selected:

ሮመ 1: GFBEVF

Highlight

Copy