ማርቆሳ 10
10
ኤኮ ገሎ ትምርተ
(ማቶ 19:1-2፤ ሉቃ 16:18)
1የሱሲ ሄሳፈ ደንድድ፥ ይሁዳ ቢታ ብድ ዮርዳኖሰ ሻፋ ፕንስ። ዳሮ አሳይ ዛሪድ እያኮ ሺቅን፥ ካሰይሳዳካ ሄ አሳ ታማርስስ።
2እስ እስ ፋርሳወት ፓጫናዉ ኮይድ የሱሳ፥ “እስ አስ ባ ማችዉ የዳና መላ ሙሰ ህገይ ኪቲ?” ያግድ እያ ኦይችዶሶና።
3እ ዛሪድ፥ “ሙሰይ ህንተና ዎይግድ ኪትዴ?” ያግስ።
4ኤንቲ፥ “ሙሰይ፥ ‘እስ አስ ባ ማቼስ አንጆ ዎርቃተ እምድ የዶ’ ግስ” ያግዶሶና።#ዛረ 24:1.
5የሱሲ ዛሪድ፥ ኤንታ “ህንተ ኦድን ስኦናይሳታ ግድያ ግሾ፥ ሙሰይ ሀ ኪታ ህንተዉ ፃፍስ። 6ሽን ፆሳይ ኮይሮ መያ ዎደ፥ አደነ ማጫ ኦድ፥ ኤንታ መስ።#መ 1:27፤ 5:1. 7ሄሳ ግሾ፥ እስ አስ ባ አዋነ ባ አይዉ አግድ፥ ባ ማቸራ እስፈ ደኤስ።#መ 2:24. 8ኤንቲ ናምአይ እስ አሰ ግዶሶና፤ ህዛፐ፥ ኤንቲ እስ አሰ ግዶሶናፐ አትሽን፥ ናምኡ አስ ግዶኮና። 9ሄሳ ግሾ፥ ፆሳይ እስፈ ቃችዳይሳ አስ ሻኮፎ” ያግስ።
10ኤንቲ ሶ ስምዳ ዎደ፥ እያ ታማረት ሀ ኦዳባ የሱሳ ናምአን ኦይችዶሶና። 11የሱሲ ኤንታኮ፥ “ባ ማችዉ የድድ ሀራ ኤክያ ኦንካ ላይማቴስ።#ማቶ 5:32፤ 2 ቆሮ 7:10-11. 12ቃስ ማጫስያካ ባ አዝናፐ ከያዳ ሀራ አዝና ገልኮ ላይማታዉሱ” ያግስ።
የሱሲ ዮጋ ናይታ አንጅስ
(ማቶ 19:13-15፤ ሉቃ 18:15-17)
13የሱሲ ጉ ናይታ ቦላ ባ ኩሽያ ዎና መላ፥ እስ እስ አሳይ ናይታ እያኮ ኤሆሶና፥ ሽን እያ ታማረት ሄ አሳ ሀንቀትዶሶና። 14የሱሲ ሄሳ በእድ፥ ባ ታማረታ ሀንቀትድ፤ ኤንታኮ፥ “ጉ ናይት ታኮ የይሳ ድጎፍተ፤ ፆሳ ካዎተይ ሀይሳታ መላሳ። 15ታኒ ህንተዉ ቱማ ኦዳይስ፤ ፆሳ ካዎተ ጉ ናአዳ ኤኮና ኡራይ ኦንካ ሄ ካዎተ ኡባራካ ገለና” ያግስ።#ማቶ 18:3. 16ጉ ናይታ እድምድ፥ ባ ኩሽያ ኤንታ እሱዋ እሱዋ ቦላ ዎድ አንጅስ።
ዱረ ናአተ ኡራ
(ማቶ 19:16-30፤ ሉቃ 18:18-30)
17የሱሲ ባናዉ ከይዳ ዎደ፥ እስ ኡራይ ዎፅ ይድ፥ እያ ስንን ጉልባትድ፥ “ኬሀ አስታማርያዉ፥ ታኒ መርና ደኦ ላታናዉ አይ ኦ?” ያግድ ኦይችስ።
18የሱሲ፥ “አይስ ታና ኬሀዉ ጋዳ ፄጋይ? ፆሳ ፃላላፐ አትሽን፥ ሀር ኬህ ኦንካ ባዋ። 19ፆሳ ኪታ፥ ዎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ እንፃርሳን ጭሞፋ፤ ነ አዋነ ነ አይዉ ቦንቻ ያገይሳ ኤራሳ” ያግስ።#ከሳ 20:12-16፤ ዛረ 5:16-20.
20ኡራይ፥ “አስታማርያዉ፥ ታኒ ሄሳ ኡባ ናአተፈ ዶማዳ ሀእ ጋካናዉ ናጋይስ” ያግስ።
21የሱሲ ኡራ ትሽ ኦ ፄልድ ዶስስ፤ “ነዉ እስባይ ፓጬስ፤ ባዳ ነዉ ደእያባ ኡባ ባይዛዳ፥ ሄ ሚሽያ ማንቆታስ እማ፤ ኔኒ ሳሎን ዱረ ግዳና። ያታ ስማዳ ታና ካላ” ያግስ። 22ሽን ኡራይ ሄሳ ስእድ፥ እ ዳሮ ዱረ ግድያ ግሾ፥ ባ ሶምኡዋ ካሬስ፥ ኡፋይቶና አግድ ብስ።
23የሱሲ ባ ታማረታ ዩሽ አ ፄልድ፥ “ዱረ አስ ፆሳ ካዎተ ገላናይስ ዋንድ መታንዴሻ!” ያግስ።
24እያ ታማረት እያ ትምርትያ ስእድ ማላለትዶሶና። ሽን የሱሲ ቃስካ ኤንታኮ፥ “ናይቶ፥ ፆሳ ካዎተ ገላናይስ ዋንድ መታንዴሻ! 25ዱረ አስ ፆሳ ካዎተ ገላናይሳፈ፥ ግማለይ ናርፐ ሉሆራ አይስ ካዉዬስ” ያግስ።
26እያ ታማረት ማላለትድ፥ “ያትን፥ ኦን አታኔ?” ያግድ፥ እሶይ እሱዋ ኦይችዶሶና።
27የሱሲ ኤንታ ትሽ ኦ ፄልድ፥ “ሀይስ ፆሳስ ዳንዳኤተስፐ አትሽን፥ አሳስ ዳንዳኤተና፤ ፆሳስ ኡባባይ ዳንዳኤቴስ” ያግስ።
28ጰፅሮስ የሱሳኮ፥ “ሄኮ፤ ኑኒ ኑባ ኡባ አግድ፥ ነና ካልዳ” ያግስ።
29የሱሲ “ታኒ ህንተዉ ቱማ ኦዳይስ፤ ታ ግሾነ ዎንገላ ግሾ፥ ኬ ዎይኮ እሻታ ዎይኮ ምቸታ ዎይኮ አዋ ዎይኮ አዮ ዎይኮ ማችዉ ዎይኮ ናይታ ዎይኮ ጋደ አግዳ ኦንካ፥ 30ሀእ ሀ ዎድያን ፄቱ ኩሸ ኬ፥ እሻታ፥ ምቸታ፥ አየታ፥ ናይታ፥ ጋድያ፥ ጎደተራ እስፈ ኤካና። ስንፈ ያና ዎድያንካ መርና ደኡዋ ኤካና። 31ሽን ዳሮት ሀእ ደን ስን ግድዳይሳት ጉየ ግዳና፥ ቃስ ዳሮት ሀእ ጉየ ግድዳይሳት ስን ግዳና” ያግስ።#ማቶ 20:16፤ ሉቃ 13:30.
የሱሲ ባ ሀይቁዋባ ሄን ኦድስ
(ማቶ 20:17-19፤ ሉቃ 18:31-34)
32የሱሳራነ እያ ታማረታራ የሩሳላመ ብሽን፥ የሱሲ ባ ታማረታ ስንን ሄመቴስ። ኤንቲ ማላለትዶሶና። እያ ካለይሳትካ ያይዶሶና። ናምአን፥ ታማነ ናምኡ ታማረታ ጋፃ ከስድ፥ ባና ጋካናባ ዱማ ኤንታዉ ሀይሳዳ ያግድ ኦድስ። 33“ሄኮ፥ ኑኒ የሩሳላመ ሀእ ከዮስ። ያን አሳ ናአይ፥ ካህነ ሀላቃታስነ ህገ አስታማረታስ አድ እመታና። ኤንቲ እያ ቦላ ሀይቆ ፕርዳ ፕርዳና፤ ቃስ አይሁደ ግዶና ደርያስ እያ አድ እማና። 34አይሁደ ግዶና ደረይ እያ ቶቻና፥ እያ ቦላ ጩታና፥ ልሶን ጋራፋናነ ዎና። እ ሄ ጋላሳፐ ጉየ፥ ሀይቆፐ ደንዳና” ያግስ።
ያይቆባነ ዮሃንሳ ዎሳ
(ማቶ 20:20-28)
35ዛብድዮሳ ናይት ያይቆብነ ዮሃንስ የሱሳኮ ይድ፥ “አስታማርያዉ፥ ኑኒ ነና ዎስያ እስባ ኑስ ኦርክ” ያግዶሶና።
36የሱሲ ኤንታኮ፥ “ታኒ ህንተዉ አይ ኦ?” ያግስ።
37ኤንቲ፥ “ኔኒ ነ ቦንቾ ካዎተን ኡትያ ዎደ፥ ኑፐ እሱዋ ኡሻቻ ባጋራ ቃስ እሱዋ ሀድርሳ ባጋራ ኡትሳርክ” ያግዶሶና።
38ሽን የሱሲ ኤንታኮ፥ “ህንተ አይ ዎስያኮ ኤረከታ፥ ታ ኡያናዉ ደእያ ፁኣ ኡያናዉ ዳንዳኤቲ? ቃስ ታኒ ፃማቀታናዉ ደእያ ፅንቃትያ ፃማቀታናዉ ዳንዳኤቲ?” ያግስ።#ሉቃ 12:50.
39ኤንቲ ዛሪድ፥ “ኤ ዳንዳኦስ” ያግዶሶና።
የሱሲ ቃስ፥ “ቱማካ ታ ኡያናዉ ደእያ ፁኣ ህንተ ኡያና፥ ታኒ ፃማቀታናዉ ደእያ ፅንቃትያ ህንተ ፃማቀታና። 40ሽን ታፐ ኡሻቻ ባጋራነ ሀድርሳ ባጋራ ኡታናይሳታ ዶራናዉ ታዉ ማት ባዋ፥ ሽን ሄ በሳይ ፆሳይ እማናዉ ጊግስድ ዎዳይሳታሳ” ያግስ።
41ሀንኮ ታሙ ታማረት ሄሳ ስእዳ ዎደ፥ ያይቆባነ ዮሃንሳ ቦላ ሀንቀትዶሶና። 42የሱሲ ኤንታ ኡባ ባኮ ፄግድ፥ “አይሁደ ግዶና አሳ ሀላቃት ደርያ ሃረይሳታ ጌተትድ ፄገተይሳነ ሃረይሳታስ ደርያ ቦላ ማት ደኤይሳ ህንተ ኤሬታ።#ሉቃ 22:25-26፤ ማቶ 23:11፤ ማር 9:35፤ ሉቃ 22:26. 43ሽን ህንተ ግዶን ሄሳ መላ ግደና፤ ህንተ ግዶን ግታታናዉ ኮየይ ኦንካ ህንተዉ አይለ ግዳናዉ በሴስ። 44ቃስ ህንተ ግዶን ኡባፈ ቦላ ግዳናዉ ኮየይ ኦንካ ህንተ ኡባስ አይለ ግዳናዉ በሴስ። 45ሀር አቶሽን፥ አሳ ናአይካ፥ አሳስ ኦናዉነ ዳሮታ ዎዛናዉ ባ ሸምፑዋ አድ እማናዉ ይስፐ አትሽን፥ አስ እያዉ ኦና መላ ይቤና” ያግስ።
ቆቅያ ባርፅሞሳ
(ማቶ 20:29-34፤ ሉቃ 18:35-43)
46ኤንቲ እያርኮ ካታማ ብዶሶና። የሱሲ ባ ታማረታራነ ዳሮ አሳራ እያርኮፈ ከይሽን፥ ፅሞሳ ናአይ፥ ቆቀይ፥ ባርፅሞሳ ጌተተይስ፥ ኦገ ጋፃን ዎስሸ ኡትስ። 47ባርፅሞስ፥ ያራ አይ ናዝረተ የሱሳ ግድዳይሳ ስእዳ ዎደ፥ ባ ቃላ ቁ ኦድ፥ “ዳዊታ ናኣ የሱሳ፥ ታና ማራርክ!” ያግድ ዋሶ ዶምስ።
48ዳሮ አሳይ እያ፥ “ሀይዛ!” ግድ ሀንቀትዶሶና።
ሽን፥ እ ባ ቃላ ካሰይሳፈ ዳሮ ቁ ኦድ፥ “ዳዊታ ናአዉ፥ ታና ማራርክ!” ያግስ።
49የሱሲ ኤቅድ፥ “እያ ሃ ፄግተ” ያግስ።
ኤንቲ ቆቅያኮ፥ “አይኮይ ባዋ፥ ደንዳ ኤቃ፥ ነና ፄጌስ” ያግዶሶና። 50ቆቀይ ባ ማኡዋ ሆል የግድ፥ ጉፕ ደንድ ኤቅድ፥ የሱሳኮ ብስ።
51የሱሲ፥ “ታኒ ነዉ አይ ኦና መላ ኮያይ?” ያግስ።
ቆቀይ፥ “አስታማርያዉ፥ ታ ፄላናዉ ኮያይስ” ያግስ።
52የሱሲ፥ “ባ፥ ነ አማኖይ ነና ፓስ” ያግስ። ኢራካ እያ አይፈይ ፄልን፥ የሱሳ ካልስ።
Currently Selected:
ማርቆሳ 10: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
