ዮሃንሳ 14
14
የሱሲ አዋኮ ኤፍያ ኦገ
1የሱሲ ባ ታማረታኮ፥ “ህንተ ዎዛናይ ኡንኤቶፎ፥ ፆሳ አማንተ፥ ታናካ አማንተ። 2ታ አዋ ኬን ዳሮ በሲ ደኤስ። ታኒ ህንተዉ በሰ ጊግሳናዉ ባይስ። ሄሳ ግዶናኮ ታኒ ህንተዉ ኦድከሽን። 3ታኒ ባዳ በሰ ጊግስዳፐ ጉየ፥ ታኒ ደእያሱዋን ህንተ ዳና መላ ስማ ያዳ ህንተና ታኮ ኤፋና። 4ህንተ ታኒ ብያ በሳ ኤፍያ ኦግያ ኤሬታ” ያግስ።
5ያትን፥ ቶማስ፥ “ጎዳዉ፥ ኔኒ ብያ በሳ ኑኒ ኤሮኮ፤ ኦግያ ዋትድ ኤራናዉ ዳንዳአኔ?” ያግስ።
6የሱሲ ዛሪድ፥ “ኦገይ፥ ቱማይነ ደኦይ ታና። ታ ባጋራ ግዶና እፅኮ ኦንካ ታ አዋኮ ባናዉ ዳንዳኤና። 7ህንተ ታና ኤርያባ ግድያኮ፥ ታ አዋካ ኤራና። ሽን ህዛፐ ዶምድ ህንተ እያ ኤሬታነ እያ በእደታ” ያግስ።
8ፍልጶስ የሱሳኮ፥ “ጎዳዉ፥ አዋ ኑና በሳ፤ ሄስ ኑስ ግዳና” ያግስ።
9የሱሲ ዛሪድ፥ “ታኒ ሀይሳ መላ ዎደ ህንተራ ደእንካ ታና ኤርኪ? ታና በእዳ ኡራይ አዋካ በእስ። ያትን፥ ኔኒ ዎይጋዳ፥ ‘አዋ ኑና በሳ’ ጋይ? 10ታኒ አዋራ እስኖ ግደይሳነ አዋይካ ታራ እስኖ ግደይሳ ኔኒ አማንክዬ? ታኒ ህንተዉ ኦድያ ቃላ ታኒ ታፐ ኦድከ፥ ሽን ታናን ደእያ አዋይ ባ ኦሱዋ ኦስ። 11ታኒ አዋን ደኤይሳነ አዋይካ ታናን ደኤይሳ አማንተ። ሄሳ አማኖና እፅኮ ታ ኦያባታን ታና አማንተ።
12“ታኒ ህንተዉ ቱማ ኦዳይስ፤ ታና አማንያ ኡራይ ታኒ ኦያ ኦሱዋፐ አያ ኦሶ ኦና። ታኒ አዋኮ ብያ ግሾ ታና አማንያ ኦንካ ሀይሳፈ አያ ኦሶ ኦና። 13አዋይ ናኣ ባጋራ ቦንቸታና መላ ታ ሱንን ህንተ ዎስያ ኡባ ታ ህንተዉ ኦና። 14ታ ሱንን አይብባካ ህንተ ኦይችኮ ታ ህንተዉ ኦና።
የሱሲ ቃላ ገልዳ ጌሻ አያና
15“ህንተ ታና ዶስኮ ታ ኪታ ናጋና። 16ታኒ አዋ ዎሳና፤ ህንተራ መርናዉ ዳና መላ ምንይሳ ህንተዉ እማና። 17ሄ አያናይ ፆሳ ቱማ ቆንጭሴስ። ሀ አላምያ አሳይ እያ በኦና ግሾነ ኤሮና ግሾ እያ ኤካናዉ ዳንዳኦኮና። ሽን እ ህንተራ ደእያ ግሾነ ህንተ ግዶን ዳና ግሾ ህንተ እያ ኤሬታ።
18“ታኒ ህንተና አይያ አዉ ባይና ናአዳ ህንተ ፃላላ አግከ፤ ስማዳ ህንተኮ ያና። 19ጉ ዎደፐ ጉየ አላመይ ታና ዛር በኤና፥ ሽን ህንተ በአና። ታኒ ደኦን ደእያ ግሾ ህንተካ ደኦን ደአና። 20ታኒ ታ አዋን፥ ህንተ ታናን፥ ቃስ ታኒ ህንተናን ደኤይሳ ህንተ ሄ ጋላስ ኤራና።
21“ታ ኪታ ኤክድ ናገይ ታና ዶሴስ። ታና ዶሰይሳ ታ አዋይካ ዶሴስ፤ ታንካ እያ ዶሳይስ፤ ታኒ እያዉ ቆንጫና” ያግስ።
22አስቆሮታ ይሁዳ ግዶና ይሁድ የሱሳኮ፥ “ጎዳዉ፥ ኔኒ ዋታዳ አላምያስ ግዶናሽን ኑስ ነና ቆንጭሳኔ?” ያግስ።
23የሱሲ ዛሪድ፥ “ታና ዶስያ ኦንካ ታ ቃላስ ኪተታና። ታ አዋይ እያ ዶሳና። ቃስ ታ አዋይነ ታኒ እያኮ ይድ እያራ ዳና። 24ታና ዶሶና ኦንካ ታ ቃላስ ኪተተና። ህንተ ስእያ ቃላይ ታና ኪትዳ አዋባፐ አትሽን፥ ታባ ግደና።
25“ታኒ ህንተራ ሀእ ደአሸ ሄሳ ህንተዉ ኦዳስ። 26ሽን አዋይ ታ ሱንን ኪታና ምንያ ጌሻ አያናይ፥ ህንተና ኡባባ ታማርሳና። ታኒ ህንተዉ ኦድዳ ኡባ እ ህንተና ሀሳይሳና።
27“ሳሮተ ህንተዉ እማና። ታኒ ታ ሳሮተ ህንተዉ እማና። ታ እምያ ሳሮተይ አላመይ እምያ ሳሮተ መላ ግደና። ሄሳ ግሾ፥ ኡንኤቶፍተ፥ ያዮፍተ። 28‘ታኒ ባና፥ ሽን ስማዳ ህንተኮ ያና’ ግዳይሳ ስእደታ። ህንተ ታና ቱማ ዶስያባ ግድያኮ ታ አዋይ ታፐ አያ ግሾ ታኒ እያኮ በይሳን ህንተ ኡፋይታና። 29ሄስ ሀንያ ዎደ ህንተ አማናና መላ ሄስ ሀኖና ደእሽን ስንታዳ ታኒ ህንተዉ ኦዳስ።
30“ሀ አላምያ ሃረይስ ያ ግሾ ህዛፐ ጉየ ህንተራ ዳሮ ኦደትከ። ታና እ አይኮካ ኦናዉ ዳንዳኤና። 31ሽን ታኒ አዋ ዶሰይሳ አላመይ ኤራና መላ ታ አዋይ ታና ኪትዳይሳ ኡባ ኦይስ። ደንድተ፤ ሀይሳፈ ቦስ።
Currently Selected:
ዮሃንሳ 14: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
