መተ 34
34
ሴከማነ ዲና
1ልያ ያይቆባስ የልዳ ናእያ ዲና፥ ሄ ዎደ ካናነ ማጫሳታ በአናዉ ከያሱ። 2ሄ ቢታ ሃርያ ህወ አድያ ሀሞራ ናአ ሴከም እዮ በእድ፥ ዳፍድ ኢስስ። 3እያ ዎዛናይ ያይቆባ ናእዉ ዲናስ ቃትስ። እ እዉ ምሸትዳ ግሾ ሎኦ ቃላራ እዮ ኦድስስ። 4ሴከም ባ አዋ ሀሞራ፥ “ታዉ ሀ ናእዉ ማቾ ኦይቻርክ” ያግስ።
5ያይቆብ ባ ናእዉ፥ ዲና፥ አዝን ዳፍዳይሳ ስእዳ ዎደ እያ አደ ናይት መሄራ ባዞን ደኦሶና። ሄሳ ግሾ፥ ኤንቲ ያና ጋካናስ ስእ ግስ።
6ሄሳፈ ጉየ፥ ሴከማ አዋ ሀሞር ያይቆባ ኦድሳናዉ ይስ። 7ያይቆባ አደ ናይት ባዞፈ ይድ ሄሳ ስእዶሶና። ኤንቲ ሴከም ያይቆባ ናእዉ ዳፍድ፥ ኢስድ እስራኤለ ዬላይዳ ግሾ ዳሮ ይሎትዶሶና።
8ሽን ሀሞር ኤንታኮ፥ “ታ ናአይ ሴከም ህንተ ናኤስ ዳሮ ምሸቴስ፥ ሀያና እዮ እያዉ ማቾ እመርከት። 9ኑራ ኤከትተነ ገለትተ፥ ህንተ ማጫ ናይታ ኑስ እምተ፥ ኑ ማጫ ናይታካ ህንተዉ ኤክተ። 10ህንተ ኑ ግዶን ዳናዉ ዳንዳኤታ። ቢታይ ዳሮ ዳልጋ፥ እያ ኦድ ዛልእድ ህንተዉ አቆ ደማናዉ ዳንዳኤታ” ያግስ።
11ሄ ዎደ ሴከም ዲና አዋነ እ እሻታ፥ “ታኒ ህንተ ስንን ሳበትኮ፥ ህንተ ኮይያባ አይብባ ግድኮካ እማና። 12ህንተ ምሽራ ናኤስ እሞታነ ኮይታ ህንተ ኮይዳ መላ ታና ኦይችተ። ታኒ ህንተ ታና ኦይችዳባ ኡባ እማና። ሽን ታኒ ማቻናዉ ናእዉ ታዉ እመርከት” ያግስ።
13ባንታ ምችዉ ዲና ሴከም ቱንስዳ ግሾ፥ ያይቆባ አደ ናይት ሴከማስነ እያ አዋ ሀሞራስ ዎርዶትዶሶና። 14ኤንታኮ፥ “ኑኒ ሄሳ መላ ፓላባ ኦናዉ ዳንዳኦኮ፥ ኑኒ ኑ ምችዉ ቃፃረትቦና አሳስ እሞኮ፥ ሄስ ኑና ካዉሽያባ። 15ህንተ ኑስ እስባ ኤሮ ጊኮ ኑ ህንተዉ ኤሮ ጋና። ሄስካ፥ ህንተ ቢታ አደ አሳ ኡባይ ቃፃረትድ ኑዳ ሀንኮ፥ 16ኑኒ ኑ ማጫ ናይታ ህንተዉ እማናዉ ኤሮ ጋና። ህንተ ማጫ ናይታካ ኑስ ኤካና። ኑኒ ህንተ ግዶን ደእድ ህንተራ እስ አሰ ግዳና። 17ሽን ህንተ ቃፃረታናዉ ኤሮ ጎና እፅኮ፥ ኑኒ ኑ ምችዉ ኤክ ባና” ያግዶሶና።
18ያትን ሀ ኤንቲ ግዳባይ ሀሞራስነ እያ ናአ ሴከማስ ሎኦ ዳንስ። 19ሄ ፓንይ ባ አዋ ኬን ደእያ ኡባፈ አድ ቦንቸትዳ ግሾ ኮይዳባ ኦናዉ እያዉ ማት ደኤስ። ያይቆባ ናእዉ ዳሮ ዶስዳ ግሾ፥ ኤንቲ ግዳባ ኦናዉ ጉየ ግቤና። 20ሄ ዎደ ሀሞርነ እያ ናአይ ሴከም ባንታ ካታማ ዳባባ ብድ፥ ባንታ ካታማ አሳስ ሀይሳዳ ያግድ ኦድዶሶና። 21“ሀ አሳት ኑራ ስጋ ደኦሶና። ቢታይ ዳሮ ዳልጋ ግድያ ግሾ ኤንቲ ሀ ቢታን ጎዮ ዛልኦ። ኤንታ ማጫ ናይታካ ኑኒ ኤካና፥ ኤንትካ ኑ ማጫ ናይታ ኤኮና። 22ሽን ኑራ ኤንቲ እስ አሳዳ ደአናዉ ኑኒ እስባ ኤሮ ጋናዉ ኮሼስ። ሄስካ፥ ኤንቲ ቃፃረትዳይሳዳ ኑ አደ አሳ ኡባይ ቃፃረታናይሳ። 23ኑኒ ሄሳዳ ኦኮ፥ ኤንታ መሄይነ፥ ኤንታ አቆ ኡባይ ኑባ ግደኔ? ሄሳ ግሾ፥ አነ ኑኒ ኤንቲ ገይሳ ኤሮ ጎስ። ኤንትካ ኑ ግዶን ደአና” ያግዶሶና።
24ካታማ ዳባባ ሺቅዳ አሳት ኡባይ ሀሞራስነ እያ ናአ ሴከማስ፥ “ኤሮ” ግዶሶና። ያትን ሄ ካታማ አደ አሳት ኡባይ ቃፃረትዶሶና።
25ሄን ጋላስ፥ ኤንቲ ኡባይ ባንታ ቃፃራ ማዱን ሳከትሽን፥ ያይቆባ አደ ናይታፐ ናምአይ፥ ዲና እሻት፥ ስሞናራነ ሌወራ ባንታ ማሻ ኤክድ ኦንካ ኤሮና ካታማ ገልድ አደ አሳ ኡባ ዎዶሶና። 26ሀሞራነ እያ ናአ ሴከማ ማሻን ዎድ፥ ባንታ ምችዉ ዲና ሴከማ ኬፈ ኤክ ብዶሶና። 27ያይቆባ ሀራ አደ ናይት አሀታ ቦላ ገልድ ባንታ ምችዉ ዲና ቱንስዳ ካታማ ኡባ ቦንቅዶሶና። 28ኤንታ ዶርሳ ዉድያ፥ ሚዛ ዉድያ፥ ሀርያ፥ ካታማ ግዶን ደእያባነ ጋፃን ደእያባ ኡባ ኤክዶሶና። 29ኤንታ ኬን ደእያ አቁዋ ኡባ፥ ኤንታ ናይታ ኡባነ ማጫሳታ ኡባ ድእዶሶና።
30ያይቆብ ስሞናነ ሌወ፥ “ህንተ ታ ቦላ ግታ መቶ ኤህደታ። ሀ ቢታን ደእያ ካናነትነ ፓርዘት ታና እፃና። ኑኒ ታይቦን ጉ፥ ኤንቲ እስፈ ግድድ ታ ቦላ ደንድኮ፥ ታንነ ታ ሶ አሳይ ያና” ያግስ።
31ሽን ኤንቲ፥ “ያትን፥ እ ኑ ምችዉ ላይማ ማጫሳዳ ኦናዉ በሲ?” ያግዶሶና።
Currently Selected:
መተ 34: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
