መተ 27
27
ያይቆብ ይሳቃ አንጁዋ ኤክሽን
1ይሳቅ ጭምን እያ አይፈይ ፄሎ እፅዳ ዎደ ባ ባይራ ናአ ኤሳዌ ፄግድ፥ “ታ ናአዉ” ያግስ።
እካ፥ “ዬ” ግድ ኮይስ።
2ይሳቅ፥ “ሄኮ፥ ሀእ ታኒ ጭማስ፥ ታኒ አዉደ ሀይቃነኮ ኤርከ። 3ያንያ ግሾ፥ ሀእ ነ ሻንካ ዶንግያ ኤካዳ ባዞ ባዳ ዶአ ሻንካታዳ አሾ ኤካዳ ያ። 4ማልኦ ካ ታ ዶሰይሳ ኦ ካዳ ታዉ ኤሀ። ታኒ ሀይቃናፐ ስን ማ ስማዳ ነና አንጃና” ያግስ።
5ይሳቅ ባ ናአ ኤሳዌስ ኦድያ ዎደ እርብቃ ስአዉሱ። ኤሳዌይ ዶአ ሻንካትድ ኤሀናዉ ባዞ ብዳፐ ጉየ፥ 6እርብቃ ባ ናአ ያይቆባ፥ “ነ አዋይ ነ እሻ ኤሳዌ፥ 7‘ዶአ ሻንካታ ኤሀዳ ታዉ ማልኦ ካ ታ ማናዉ ካ። ታኒ ሀይቃናፐ ስን ማ ስማዳ ጎዳ ስንን ነና አንጃና’ ያግሽን ታኒ ስአስ። 8ታ ናአዉ፥ ሀእ ታኒ ነዉ ኦደይሳ ሎይ ስአ። 9ዉድያ ግዶ ባዳ ናምኡ ሞ ዴሻ ማራታ ታዉ ኤካዳ ያ። ታኒ ነ አዋስ ማልኦ ካ እ ዶሰይሳዳ ኦዳ ካና። 10ነ አዋይ ሀይቃናፐ ስን ምድ ነና አንጃና መላ እያዉ አ” ያጋሱ።
11ሽን ያይቆብ ባ አይዉ፥ “ታ እሻ ኤሳዌ ቦላ እክሰይ ደኤስ ሽን ታ ቦላይ ሊቆ። 12ታ አዋይ ታና ኦይክ በእድ ታኒ እያ ጭምዳባ ዳንኮ፥ ታኒ አንጁዋ ግሾ ባደ ታ ቦላ ኤሀናይሳ ኤርኪ?” ያግስ።
13እያ አይያ፥ “ታ ናአዉ፥ ሄ ባደይ ታና ጋኮ። ታኒ ነዉ ኦደይሳ ኦ፥ ባዳ ዴሻ ማራታ ታዉ ኤካዳ ያ” ያጋሱ።
14ኤህድ ባ አየስ እምን እያ አይያ ማልኦ ካ እያ አዋይ ዶሰይሳዳ ኦዳ ካሱ። 15ሄሳፈ ጉየ፥ እርብቃ ባይራ ናአ ኤሳዌ ማኦ ሎኡዋ ኤሀዳ ያይቆባ ማይዛሱ። 16ቃስ ሄ ዴሻታ እትያ እያ ኩሽያነ እያ ሊቆ ቆያ ማይዛሱ። 17ባ ካዳ ማልኦ ካነ ኡይ ባ ናአ ያይቆባስ እማሱ።
18ያትን፥ እ ባ አዋኮ ገልድ፥ “ታ አዋዉ” ያግስ።
እካ፥ “ዬ፥ ታ ናአዉ፥ ኔኒ ኦኔ?” ያግስ።
19ያይቆብ ባ አዋ፥ “ታኒ ነ ባይራ ናአ ኤሳዌ። ኔኒ ታና ኪትዳይሳዳ ታኒ ኦስ፤ ሀእ ደንዳ ኡታዳ፥ ታኒ ሻንካታ ኤህዳይሳፈ ማዳ፥ ታና አንጃ” ያግስ።
20ይሳቅ ባ ናአ፥ “ታ ናአዉ፥ ዋታ ኤለሳዳ ደማዲ?” ያግድ ኦይችስ።
ያይቆብ፥ “ጎዳይ፥ ነ ፆሳይ ታዉ ጊግስስ” ያግስ።
21ይሳቅ ያይቆባ፥ “ታ ናአዉ፥ ኔኒ ቱማ ታ ናአ ኤሳዌኮ ታ ነና ኦይካ በአና አነ ሀ ሺቃ” ያግስ። 22ያይቆብ ባ አዋኮ ሺቅን ኦይክ በእድ፥ “ነ ቃላይ ያይቆባ ቃላ ሽን ኩሸይ ኤሳዌ ኩሽያ ዳኔስ” ያግስ። 23እያ ኩሸይ እያ እሻ ኤሳዌ ኩሽያዳ እክሰራ ደእያ ግሾ፥ ሻክድ ኤርቦና እያ አንጅስ። 24እያ፥ “ቱማ ኔኒ ታ ናአ ኤሳዌ?” ያግድ ዛር ኦይችስ።
እካ፥ “ኤ፥ ታና” ያግስ።
25ያትን እ፥ “ታ ናአዉ፥ ታኒ ነ ሻንካታ ኤህዳባፐ ማዳ ነና አንጃና መላ አነ ሀ አ” ያግስ። ያይቆብ አን ምስ፥ ቃስ እያዉ ዎይነ ኤህን ኡይስ።
26ሄሳፈ ጉየ፥ እያ አዋ ይሳቅ፥ “ታ ናአዉ፥ ሀ ሺቃዳ ታና ዬራ” ያግስ።
27ያይቆብ ሺቅድ እያ ዬርስ። ይሳቅ እያ ማኡዋ ስንግ ስእድ፥
“ታ ናአ ፔኖይ
ጎዳይ አንጅዳ ጎሻዳ ሳዌስ።
28ፆሳይ ሳሎ አካነ ሳአ ሽጫ፥
ካነ ዎይነ ዳርስድ ነዉ እሞ።
29ካዎተት ነዉ ሃረቶ፥
አሳይ ነዉ ጉልባቶ።
ኔኒ ነ እሻታስ ጎዳ ግዳ፥
ነ አየ ሼሻት ነዉ ጉልባቶ።
ነና ባደይሳት ባደትዳባ ግዶ፥
ነና አንጀይሳት አንጀትዳባ ግዶ” ያግድ አንጅስ።
30ይሳቅ ያይቆባ አንጅድ ኦንግዳፐ ጉየ፥ ያይቆብ ባ አዋ ስንፈ ቡሮ ከይያ ዎደ ኤሳዌይ ሻንካፈ ፑቱ ግስ። 31እካ ቃስ ማልኦ ካ ካድ ባ አዋስ አድ፥ “ታ አዋዉ፥ ዳንዳ ኡታዳ ታ ሻንካትዳባፐ ማ፥ ያታዳ ታና አንጃ” ያግስ።
32ይሳቅ፥ “ነ ኦኔ?” ያግድ ኦይችስ።
እካ፥ “ታኒ ነ ባይራ ናአ ኤሳዌ” ያግስ።
33ይሳቅ ዳጋምድ ኮኮርሸ፥ “ያትን ዶአ ሻንካትዳይሳፈ ታዉ አዳይ ኦኔ? ታኒ ሀእ ኔኒ ያና ስንን ማዳ፥ እያ አንጃስ። እካ ቱማ አንጀትዳይሳ ግዳና” ያግስ።
34ኤሳዌይ ባ አዋ ቃላ ስእዳ ዎደ ባ ቃላ ቁ ኦድ፥ ዳሮ ኢታ ዬሆ ዬክሸ፥ “ታ አዋዉ፥ ታናካ አንጃ” ያግስ።
35ሽን እ፥ “ነ እሻይ ጭምድ ነ አንጁዋ ኤክ ድግስ” ያግስ።
36ኤሳዌይ፥ “እ ኤርድ ያይቆባ (ጭመይሳ) ግድ ሱንትስ። እ ታና ጭምሽን ሀይስ ናምአን፥ ካሰ ታ ባይራተ ኤክስ፥ ሀእ ቃስ ታ አንጁዋ ኤክስ” ያግስ። ያትን፥ “ኔኒ ታዉ አንጁዋፈ አይኮካ አሻብኪ?” ያግድ ኦይችስ።
37ይሳቅ ኤሳዌ፥ “ታኒ እያ ነዉ ጎዳ ኦስ። እያ እሻታ ኡባታካ እያዉ አይለ ኦስ። ቃስ ታኒ ካንነ ዎይነን እያ ምንስ። ያትን፥ ታ ናአዉ፥ ነዉ ታ አይ ኦ?” ያግስ።
38ኤሳዌይ ባ አዋ፥ “ታ አዋዉ፥ ነዉ እስ አንጆ ፃላል ደኢ? ታ አዋዉ፥ ታናካ ቃስ አንጃ” ያግስ። ሄሳፈ ጉየ፥ ኤሳዌይ ባ ቃላ ቁ ኦድ ዬክስ።
39እያ አዋ ይሳቅ ዛሪድ፥
“ነ ደእያ በሳይ ሀ ሳአ ዱረተፈ ሃሆ፥
ሳሎ አክካ ነዉ ዎና።
40ኔኒ ነ ማሻን አቃና፥
ነ እሻስ ሃረታና።
ሽን ኔኒ እያራ ኤቀትያ ዎደ
እያ ቃምባራ ነ ጋናፈ ሆላና” ያግስ።
ይሳቅ ያይቆባ ላባኮ የዱዋ
41ያይቆባ እያ አዋይ አንጅዳ ግሾ፥ ኤሳዌይ ባ ኡሎን እያ ሞርክስ። እ ባ ዎዛናን፥ “ታ አዋይ ሀይቃናዉ ማትስ። እ ሀይቅዳ መላ ታ እሻ ያይቆባ ዎና” ያግስ።
42ሽን እርብቃ ሄ ባ ባይራ ናአ ኤሳዌ ቃላ ስእዳ ግሾ፥ ባ ካሎ ናአ ያይቆባ ፄግሳ ኤሀዳ፥ “ነ እሻ ኤሳዌይ ነና ዎድ ሃሉዋ ከሳናዉ ሀልቼስ። 43ሀያና ታ ናአዉ፥ ታኒ ነዉ ኦደይሳ ኦ። ደንዳዳ ካራነን ደእያ ታ እሻ ላባኮ ባቃታ። 44ነ እሻ ሀንቆይ እርፃና ጋካናዉ ጉ ዎደ እያራ ደኣሻ። 45ነ እሻ ይሎይ ዎያ ዎደነ ኔኒ እያ ቦላ ኦዳባ እ ዶግያ ዎደ ታኒ ኪታዳ ነና ኤሀና። ታኒ እስ ጋላስ ህንተ ናምኣፈካ መላ አታናዉ ኮይከ” ያጋሱ።
46ሄሳፈ ጉየ፥ እርብቃ ይሳቃኮ፥ “ኤሳዌይ ኤክዳ ህተታ ማጫ ናይታ ጋሶን ታኒ ታ ደኡዋ ሻተታስ። ቃስ ያይቆብካ ሀይሳ ህተታ ማጫ ናይታፐ ማቾ ኤክኮ፥ ታዉ ሀይቆይ ሎኦ” ያጋሱ።
Currently Selected:
መተ 27: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
