ሀዋረታ 24
24
አይሁደት ጳዉሎሳ ሞትዶሶና
1እቻሹ ጋላሳፐ ጉየ ካህነ ሀላቃይ፥ ሀናን፥ ጭማታራነ ፀርፀሉሳ ጌተትያ እስ ፃባቃራ ቅሳረ ብስ። ኤንቲ ደርያ አይሰይሳ ቦላ ጳዉሎሳ ሞትዶሶና። 2ጳዉሎስ ፄገትድ ገልዳ ዎደ፥ ፀርፀሉስ እያ ሀይሳዳ ያግድ ሞትስ፦
“ቦንቾ ፍልክሳ፥ ኑኒ ነ ባጋራ ዳሮ ሳሮተ ደምዳ፥ ነ ሎኦ አይሱዋን ኑ ቢታይ ዳሮ ላመትስ። 3ቦንቾ ፍልክሳ፥ ኑኒ አዉንካ አዉደ ግድን ዳሮ ጋላታን ሄሳ ኤኮስ። 4ታኒ ነና ጋምእሶናሽን ኔኒ ነ ኬሀተን ኑባ ቃንን ስአና መላ ነና ዎሳይስ። 5ሀ ኡራይ በ ግድድ ቢታ ኡባን ደእያ አይሁደታ ግዶን ቡቀ መድ ናዝራወታ ባጋ አሳ ካለይሳ ግዶይሳ ኤርዳ። 6ሀር አቶሽን፥ ፆሳ ኬ ቱንሳና ሀንሽን ኑኒ እያ ኦይክዳ፤ ኑ ህግያዳ እያ ቦላ ፕርዳናዉ ቆፕዳ። 7ሽን ሻላቃ ሉስዮስ ይድ፥ ዎልቃን ኑ ኩሸፐ እያ ዎ ኤክስ። 8እያ ሞተይሳት ኔኮ ያና መላ ኪትስ። ኔኒ ነ ሁጰን ሀ ኡራ ፕልጋዳ ኑኒ እያ ሞትያ ሞቱዋ ኡባ ኤራናዉ ዳንዳኣሳ” ያግስ።
9አይሁደትካ፥ “ሀ ኦዳይ ቱማ” ግድ እያ ቆፋ ማእዶሶና።
10ደርያ አይሰይስ ጳዉሎሳ ኦዳ ግድ ማልስ። ጳዉሎስ ሀይሳዳ ግድ ዛርስ፦ “ኔኒ ዳሮ ዎደፐ ዶማዳ፥ ሀ አሳስ ፕርዳሸ ደኤይሳ ኤራዳ ታ ኦዳስ ኡፋይሳን ዛሮ እማይስ። 11ታኒ የሩሳላመ ጎይናናዉ ከይን ታማነ ናምኡ ጋላሳፐ አናይሳ ኔኒ ነ ሁጰን ኤራናዉ ዳንዳኣሳ። 12አይሁደት ታና ፆሳ ኬን ግድን አይሁደ ዎሳ ኬን ግድን ካታማን ግድን ኦደራካ ፓላምሽን ዎይኮ አሳ ሺሻዳ ማቅሽን እስ አስካ ደምቤና። 13ሀእካ ኤንቲ ታና ሞትያባስ ማርካ ደማናዉ ዳንዳኦኮና።
14“ሽን ታኒ ሀይሳ እስባ አማናይስ፤ ታኒ ህገን ደእያባነ ናበት ፃፍዳ ኡባባ አማናዳ፥ ኑ አዋታ ፆሳ፥ ኤንቲ ዎርዶ ግያ ኦግያን ጎይናይስ። 15ኤንቲ ባንታ ሁጰን አማነይሳ መላ ፅሎትነ ናጋራንቾት ሀይቆፐ ደንዳናይሳ ታካ አማናይስ። 16ሄሳ ግሾ፥ ታኒ ፆሳ ስንንነ አሳ ስንን ኡባ ዎደ ሎኦ ካህ ታዉ ዳና መላ ምናይስ።
17“ታኒ የሩሳላመፐ ከዮሳፐ ዳሮ ላይፈ ጉየ ታ ቢታ ማንቆታስ ማደ እማናዉነ ያርሾ ያርሻናዉ የሩሳላመ ባስ።#ሀዋ 21:17-28. 18ታኒ ፆሳ ኬን ሄሳ ኦዳ ጌሻ ዎጋ ፖላ ስምን ታና ደምዶሶና። ሄ ዎደ ታራ አስ ባዋ፥ ኦሽካ ከይቤና። 19ሽን ኢሰፐ ይዳ እስ እስ አይሁደት ሄሳን ደኦሶና፤ ኤንቲ ታ ቦላ ኦዳ ኮይኮ ይድ ታና ነ ቦላ ሞታናዉ ዳንዳኦሶና። 20ዎይኮ ታኒ ሻንጉዋ ስን ሺቅዳ ዎደ ኦዳ ባል ደእኮ ሀይሳቲ ነ ስንን ደኤይሳት ኦዶና። 21ታኒ ኤንታ ግዶን ኤቃዳ፥ ‘ሀይቅዳይሳት ደንዳና ጋዳ ዋሳዳ ኦድዳ ግሾ ሀች ህንተ ስንን ታ ቦላ ፕርዶሶና’ ጋስ፤ ሄሳፈ ሀራባ ኦብከ” ያግስ።#ሀዋ 23:6.
22ሽን ፍልክስ ፆሳ ኦግያባ ጌሽ ኤርዳ ግሾ፥ “ታኒ ህንተ ኦዳ ሻላቃ ሉስዮስ ያ ዎደ ፕርዳና” ያግድ ሞይዝስ። 23ፍልክስ ቃስ ጳዉሎሳ ቃቾና ናጋና መላነ እያ ዳቦታፐ ኦንካ እያ ኦይቻናዉ ይሽን ድጎና መላ ማቶ ሀላቃ ኪትስ።
24ጉ ጋላሳፐ ጉየ፥ ፍልክስ አይሁደ ባጋ ግድዳ ባ ማቸ ድሩስላራ ይድ ጳዉሎሳ ኪት ኤህስድ የሱስ ክርስቶሳን አማኖባ እያፐ ስእስ። 25ጳዉሎስ ፅሎተባ፥ ባ ሁጰ ሃሮባነ ያናዉ ደእያ ፕርዳባ ኦድሽን፥ ፍልክስ ያይድ፥ “ኔኒ ሀእስ ባ፤ ታዉ እንጀትዳ ዎደ ነና ፄግሳና” ያግስ። 26ሄ ዎደ ጳዉሎሳፐ ዎፈ ኤካናዉ ቆፕድ፥ እያ ዛር ዛር ፄግስድ እያራ ኦደቴስ።
27ናምኡ ላይፈ ጉየ፥ ፍልክሳ በሳ ጶርቅዮስ ፍስፆስ ኤክስ። ፍልክስ አይሁደታ ኡፋይሳናዉ ኮይድ ጳዉሎሳ ብሎና አጋግስ።
Currently Selected:
ሀዋረታ 24: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
