ሀዋረታ 21
21
ጳዉሎስ የሩሳላመ ቡሳ
1ኑኒ ኤፈሶና ጭማታፐ ሻከትዳ መላ ቆሳ ብዳ። ዎንተ ጋላስ ሮዳ ጋክድ ያፐ ጳፃራ ብዳ። 2ስሮፍንቀ ፕንያ ማርካበ ደምድ እያን ገልድ ባናዉ ደንድዳ። 3ኑኒ ቆጵሮሳ በአናዉ ዳንዳእያ ሶ ይድ፥ ቆጵሮሳ ሀድርሳ ባጋ አግድ ሶረ ብዳ። ማርካበይ ባ ጫና ያን ዎናዉ ኮይዳ ግሾ ፅሮሳ ብዳ። 4ያን አማንያ አሳታ ደምድ ኤንታራ ላፑን ጋላስ ኡትዳ። ጳዉሎስ የሩሳላመ ቦና መላ ኤንቲ እያዉ አያናን ኦድዶሶና። 5ኑኒ ኤንታራ ኡትያ ዎደይ ዉርን ከይድ ብዳ። ኤንቲ ኡባይ ባንታ ማጫሳታራነ ባንታ ናይታራ እስፈ ካታማፐ ካረ ከስድ ኑና ሞይዝዶሶና። ኑኒ አባ ዶናን ጉልባትድ ፆሳ ዎስዳ። 6ሄሳፈ ጉየ፥ ዎል ሳሮድ ኑ ማርካብያን ገልዳ፤ ኤንቲ ባንታ ሶ ስምዶሶና።
7ኑኒ አባ ኦግያ ኦንግድ፥ ፅሮሳፐ ጳፀለማሳ ጋክዳ። ያን አማንያ አሳታ ሳሮድ፥ ኤንታ ማታን እስ ጋላስ ፔእዳ። 8ዎንተ ጋላስ ከይድ፥ ቅሳረ ብዳ። ሳባክያ ፍልጶሳ ሶ ጋክድ እያ ማታን ኡትዳ። እ የሩሳላመን ካሰ ዶረትዳ ላፑናታፐ እሱዋ።#ሀዋ 6:5፤ 8:5. 9ፍልጶሳስ ናበ ግድዳ ኦይዱ ጌላኦ ናይት ደኦሶና።
10ኑኒ ኡንደና ጋላስ ያን ኡትድ ደእሽን ትንብተ ኦድያ እስ አጋቦሳ ጌተትያ አደይ ይሁዳፐ ቅሳረ ይስ።#ሀዋ 11:28. 11ኑኮ ይድ ጳዉሎሳ ሳቅያ ኤክድ ባ ኩሽያነ ባ ቶሁዋ ቃችድ፥ “ጌሻ አያናይ ሀ ሳቅያ ጎዳ፥ የሩሳላመን አይሁደት ሀይሳዳ ቃችድ፥ አይሁደ ግዶና አሳስ አድ እማና ያጌስ” ያግስ።
12ኑኒ ሄሳ ስእዳ ዎደ ኑነ ያን ደእያ አሳት ጳዉሎስ የሩሳላመ ቦና መላ ዎስዳ። 13ሽን ጳዉሎስ ዛሪድ፥ “ህንተ ሀይሳዳ ዬክሸ አይስ ታ ዎዛና ሹግሴቲ? ታኒ፥ ጎዳ የሱሳ ሱን ግሾ ቃሸተ ፃላላ ግዶናሽን የሩሳላመን ሀይቃናዉካ ጊገታስ” ያግስ።
14ኑ ዞርያ እ ኤኮና እፅን፥ “ጎዳ ሸነይ ሀኖ” ያግድ ስእ ግዳ።
15ያን ጉ ዎደ ጋምእዳፐ ጉየ ጊገትድ የሩሳላመ ባናዉ ከይዳ። 16ቅሳረን ደእያ አማንያ አሳታፐ ጉት ኑራ ብዶሶና። ኤንቲ ኑኒ ሸምፓና በሲ ምናሶና ጌተትያ ቆጵሮሳ አድያ ሶ ኤፍዶሶና። ምናሶን ኮይሮ አማንዳ አሳፐ እሱዋ።
ጳዉሎስ የሩሳላመ ጋክስ
17ኑኒ የሩሳላመ ጋክዳ ዎደ አማንያ አሳት ኑና ኡፋይሳን ሞክዶሶና። 18ዎንተ ጋላስ ጳዉሎስነ ኑኒ ያይቆባራ ጋሄታናዉ ብዳ። ዎሳ ኬ ጭማት ኡባትካ ያን ደኦሶና። 19ጳዉሎስ ኤንታ ሳሮዳፐ ጉየ አይሁደ ግዶና አሳ ግዶን ባ ባጋራ ፆሳይ ኦዳባ ኡባ ኤንታዉ ኦድስ።
20ኤንቲ ሄሳ ስእዳ ዎደ ፆሳ ጋላትድ ጳዉሎሳኮ ሀይሳዳ ያግዶሶና፦ “ኑ እሻዉ፥ አይሁደታ ግዶን አፑን ሙኩላት ፆሳ አማንዳኮ ነ በኣሳ፤ ኤንቲ ኡባይካ ህግያ ምን ናጎሶና። 21ኔኒ አይሁደ ግዶናይሳታ ቢታን ደእያ አይሁደ ኡባይ ባንታ ናይታ ቃፃሮና መላ፥ አይሁደታ ዎጋ ካሎና መላነ ሙሰ ህግያ እፃና መላ ኔኒ ታማርሰይሳ የሩሳላመን ደእያ አይሁደት ስእዶሶና። 22ያትን አይብ ሎኦ? ኔኒ ይዳይሳ ዳሮት ስአና።
23“ሄሳ ግሾ፥ ኑኒ ነዉ ኦደይሳ ስአ፤ ጋሶይ ደእያ ኦይዱ አሳት ኑ ማታን ደኦሶና።#ታይቦ 6:13-21. 24ኤንታ ኤካዳ ኤንታራ ጌያ፤ ቃስ ኤንቲ ባንታ ሁጵያ ሜደታና መላ ኤንታዉ ሚሸ እማ። ኤንቲ ካሰ ነባ ስእዳይስ ቱማ ግዶናይሳነ ኔኒ ነ ሁጰንካ ህገ ናግያ አስ ግደይሳ ኡባይ ኤራና።
25“ሽን አማንዳ አይሁደ ግዶና አሳታ ግድኮ፥ ኤንቲ ኤቃስ ያርሸትዳባ ሞና መላ፥ ሱ ኡዮና መላ፥ ባዉታ ሞና መላነ ላይማቶና መላ፥ ኑኒ ኦዳ ቃችድ፥ ኤንታዉ ዳብዳበ ፃፍዳ” ያግዶሶና።#ሀዋ 15:29.
26ሄሳፈ ጉየ፥ ጳዉሎስ ዎንተ ጋላስ አሳታ ኤክድ፥ ኤንታራ ጌይስ። እ ባንታ ጌይያ ጋላሳይ አዉደ ፖለትያኮ ኤርሳናዉነ ባንታ ያርሹዋ አዉደ ያርሻነኮ ኤርሳናዉ ፆሳ ኬ ገልስ።
ጳዉሎስ ኦይከትስ
27ላፑን ጋላሳይ ዉራና ሀንሽን፥ ኢሰፐ ይዳ አይሁደት ፆሳ ኬን ጳዉሎሳ በእድ፥ አሳ ኡባ ደንድ ጳዉሎሳ ኦይክዶሶና። 28“እስራኤለ አሳዉ፥ ኑና ማድተ፤ ሀ ኡራይ፥ ኑ ደርያ፥ ኑ ህግያነ ሀ ፆሳ ኬ እፃና መላ አሳ ኡባ ታማርሴስ። ሄስካ ግዶና እፅን አይሁደ ግዶናይሳታ ፆሳ ኬ ገልስድ፥ ሀ ጌሻ በሳ ቱንስስ” ያግድ ዋስዶሶና። 29ኤንቲ ሄሳ ግዳይ ካሰ ኤፈሶና ፅሮፍሞሳ ጳዉሎሳራ ካታማን በእዳ ግሾ ሀእ ጳዉሎስ ፆሳ ኬ እያ ኤክ ገልዳባ ኤንታዉ ዳንስ።#ሀዋ 20:4.
30ካታማ ኡባይ ቡቀትስ፤ አሳ ኡባይ ሺቅድ ጳዉሎሳ ኦይክድ ፆሳ ኬፈ ካረ ጎችዶሶና። ፆሳ ኬ ፐንገት ኤለስድ ጎርደትዶሶና። 31አሳይ ጳዉሎሳ ዎና ሀንሽን፥ “የሩሳላመ ካታማይ ኩመ ቡቀትስ” ግያ ኦዳይ ሮመ ሻላቃኮ ጋክስ። 32ሻላቃይ ዎታዳረታነ ማቶ ሀላቃታ ኤክድ ዎፅሸ ይስ። አሳይ ሻላቃነ ዎታዳረታ በእዳ ዎደ ጳዉሎሳ ዋይሳ አጋግዶሶና።
33ሄ ዎደ ሻላቃይ ሺቅድ፥ ጳዉሎሳ ኦይክድ፥ ናምኡ ሳንላታን ቃሸታና መላ ኪትስ። ያትድ፥ እ ኦነኮነ አይ ኦዳኮ አሳ ኦይችስ። 34አሳፐ ባጋይ እስባ ግድ ዋስያ ዎደ፥ ሀራት ሀራባ ግድ ዋሴስ። ዋሶይ ዳርዳ ግሾ፥ ሻላቃይ ቱማ ሻካናዉ ዳንዳኤቶና እፅን፥ ዎታዳረት ጳዉሎሳ ባንታ ደእያሶ ኤፋና መላ ኪትስ። 35ጳዉሎስ የ ከይያ ደ ጋክያ ዎደ አሳ ሱገ ግሾ ዎታዳረት እያ ቶክዶሶና። 36ዳሮ አሳይ፥ “እ ሀይቆ!” ያግድ ዋስሸ ካሎሶና።
ጳዉሎስ አሳስ ዛሮ እሚስ
37ዎታዳረት ጳዉሎሳ ባንታ ደእያሱዋ ገልሳና ሀንሽን፥ ጳዉሎስ ሻላቃኮ፥ “ታኒ ነዉ እስባ ኦዶ?” ያግስ።
እ ጳዉሎሳኮ፥ “ኔኒ ግርከ ዶና ኤራይ? 38ኔኒ ሀይሳፈ ስን ቡቀ መድ ሸምፖ ዎዳ ኦይዱ ሙኩሉ አሳታ ኤክድ ባዞ ገልዳ ግብፀ ኡራ ግድኪ?” ያግስ።
39ሽን ጳዉሎስ፥ “ታኒ፥ ክልቅያን ደእያ ኤረትዳ ተርሰሴ ካታማን የለትዳ አይሁደ አስ። ሀያና ታና ኦድሳርኪ?” ያግስ።
40ሻላቃይ እያኮ፥ “ኦዳ” ያግን ጳዉሎስ ደ ቦላ ኤቅድ፥ አሳይ ስእ ጋና መላ ባ ኩሽያን ማልስ። አሳይ ስእ ግን እብራወ ዶናን ሀይሳዳ ያግስ፦
Currently Selected:
ሀዋረታ 21: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
