ሀዋረታ 18

ጳዉሎስ ቆሮንቶሳን

1ሄሳፈ ጉየ፥ ጳዉሎስ አቴናፐ ከይድ፥ ቆሮንቶሳ ብስ። 2ያን ጳንፆሳን የለትዳ እስ አይሁደ አድያ አቅላ ደምስ። አይሁደ አሳ ኡባይ ሮመፐ ከያና መላ ካዎይ ቃላዉድዮስ ኪትዳ ግሾ ጉ ዎደፐ ካሰ እ ባ ማቸ ጵርስቅላራ ፃለፐ ይስ። ጳዉሎስ ኤንታራ ጋሄታናዉ ብስ። 3እያ ኦሶይ ኤንታይሳዳ ዱንካነ ስኮ ግድያ ግሾ፥ ኤንታራ ኡትድ እስፈ ኦስ። 4ጳዉሎስ ሳምባታ ኡባን አይሁደታነ ግርከታ አማንናዉ አይሁደ ዎሳ ኬን ፓላሜስ።

5ስላሰይነ ፅሞትዮስ ማቀዶነፐ ይዳ ዎደ ጳዉሎስ ባ ኩመ ዎድያ እምድ አይሁደታስ የሱሲ እ፥ ክርስቶሳ ግድ ቃላ ኦድስ። 6ሽን ኤንቲ ጳዉሎሳ እፅድ እያ ጫይን ጳዉሎስ ባ ማኡዋፐ ባና ቆቆፍሸ፥ “ህንተ ጎመይ ህንተና ኦይኮ፤ ታኒ ሄሳን ደእከ። ህዛፐ ጉየ፥ ታኒ አይሁደ ግዶና አሳኮ ባይስ” ያግስ።

7ያፐ ከይድ ፆሳ ጎይንያ ትቶስ ዮስፆሳ ጌተትያ ኡራ ሶ ብስ። ዮስፆሳ ኬይ አይሁደ ዎሳ ኬ ማታን ደኤስ። 8አይሁደ ዎሳ ኬ ሀላቃይ ቃርስጶስ ባ ሶ አሳ ኡባራ ጎዳ አማንስ። ቆሮንቶሳ አሳታፐካ ዳሮት ፆሳ ቃላ ስእዳ ዎደ አማንድ ፃማቀትዶሶና።

9ጎዳይ እስ ቃማ ጳዉሎሳስ ቆንጭድ፥ “ያዮፋ፤ ኦዳ፥ ስእ ጎፓ። 10ታኒ ኔራ ደአይስ። ታዉ ሀ ካታማን ዳሮ አስ ደእያ ግሾ ነና ቆህድ ኢታባን የጋና አስ ኦንካ ባዋ” ያግስ። 11ሄሳ ግሾ፥ ጳዉሎስ ፆሳ ቃላ አሳ ታማርስሸ እስ ላይነ ኡሱፑን አጌና ኤንታራ ኡትስ።

12ጋልዮስ አካያ ቢታ አይስያ ዎደ አይሁደት እስፈ ጳዉሎሳ ቦላ ደንድድ ፕርዳ ኬ እያ ኤፍድ፥ 13“ሀ አደይ ህግያ እፅድ፥ አሳይ ፆሳ ጎይናና መላ ኦስ” ያግዶሶና።

14ጳዉሎስ ኦደታና ሀንሽን፥ ጋልዮስ አይሁደታኮ፥ “አይሁደቶ፥ ሄስ ኢታ ኦሶ ዎይኮ ናቆ ግድያኮ ታኒ ህንተባ ዳንዳአዳ ስአናዉ በሴስ። 15ሽን ቃላስ፥ ሱንስነ ህንተ ህግያስ ህንተ ፓላምያባ ግድኮ ህንተ፥ ህንተዉ ብልተ፤ ሄሳ ታኒ ፕርድከ” ያግስ። 16ያትድ፥ ኤንታ ፕርዳ ኬፈ ካረ ከስስ። 17ሄሳፈ ጉየ፥ ግርከ አሳ ኡባይ አይሁደ ዎሳ ኬ ሀላቃ ሶስተኔሳ ኦይክድ ፕርዳ ኬ ስንን ዋዶሶና። ሽን ጋልዮስ ሄሳ ፓፃባ ግቤና።

ጵርስቅላ፥ አቅላነ አጵሎሳ

18ጳዉሎስ ዳሮ ጋላስ ቆሮንቶሳን ኡትዳፐ ጉየ አማንያ አሳ ሳሮድ፥ ጵርስቅልራነ አቅላራ ማርካበን ሶረ ብስ። ሽን እ ባናፐ ስን ባዉ ጋሶይ ደእያ ግሾ ክንክራ ካታማን ባ ሁጵያ ቡሉሰትስ።#ታይቦ 6:18. 19ኤንቲ ኤፈሶና ጋክዳ ዎደ ጳዉሎስ ጵርስቅሎነ አቅላ ያን አግስ። ሽን ባዉ አይሁደ ዎሳ ኬ ገልድ አይሁደታራ ኦደትስ። 20ኤንቲ ባንታራ ዳሮ ዎደ ኡታና መላ ጳዉሎሳ ዎስዶሶና ሽን እ እፅስ። 21ኤንታፈ ሻከትሸ፥ “ታኒ ያ ባልያ የሩሳላመን ቦንቻናዉ በሴስ። ሽን ፆሲ ጊኮ ህንተኮ ስማ ያና” ያግድ ኤፈሶናፐ ማርካብያን ብስ። 22ቅሳረ ጋክዳ ዎደ የሩሳላመ ብድ ዎሳ ኬ አሳ ሳሮዳፐ ጉየ አንፆከ ብስ።

23ያን ጉ ዎደ ጋምእዳፐ ጉየ አማንያ አሳታ ኡባ ምንሸ ጋላትያራነ ፕርገራ አስ።

24እስክንድረን የለትዳ እስ አጵሎሳ ጌተትያ አይሁደ አስ ኤፈሶና ብስ። እ ኦዳ ኤርያ አስነ ፆሳ ቃላ ዳሮ ኤርያ አስ። 25ጎዳ ኦግያካ ታማርስ፥ አያናን ፁገትድ የሱሳባ ሱረ ታማርሴስ። ግዶሽን፥ ዮሃንሳ ፅንቃትያ ፃላላ ኤሬስ። 26እ አይሁደ ዎሳ ኬን ያዮና ታማርሴስ። ጵርስቅላነ አቅል እ ኦደይሳ ስእዳ ዎደ ባንታራ ሶ እያ ኤፍድ ፆሳ ኦግያ ካሰይሳፈ ጌሽድ እያዉ ኦድዶሶና።

27አጵሎስ አካያ ባናዉ ኮይን ኤፈሶናን ደእያ አማንያ አሳይ እያ ቆፋ ኤክድ አካያን ደእያ አማነይሳት እያ ሞካና መላ ኤንታዉ ዳብዳበ ፃፍዶሶና። እ ያ ጋክዳ ዎደ ፆሳ አ ኬሀተ ባጋራ የሱስ ክርስቶሳ አማንዳይሳታ ዳሮ ማድስ። 28አይስ ጊኮ፥ የሱሲ፥ እ፥ ክርስቶሳ ግደይሳ አይሁደታስ ፆሳ ቃላፐ ቆንጭስድ ደርያ ስንን ምን ኦድድ ኤንታ ላስ።

Currently Selected:

ሀዋረታ 18: GFBEVF

Highlight

Copy