Лука 23

Исус Пилат водзын

(Мт. 27:1-2,11-14; Мк. 15:1-5; Ин. 18:28-38)

1Сэки чукӧртчӧмаяс чеччисны да нуӧдісны Исусӧс Пилат дінӧ. 2Найӧ мыжалӧмӧн висьталісны: «Ми аддзылім, мый тайӧ Мортыс шызьӧдӧ миянлысь войтырӧс, ӧлӧдӧ кесарлы вот мынтӧмысь, асьсӧ ыдждӧдлӧ ӧксыӧн да Кристосӧн». 3Пилат юаліс Исуслысь: «Тэ-ӧ иудейяслӧн Ӧксыыс?» Исус вочавидзис: «Тэ шуан». 4Пилат шуис аркирейяслы да став йӧзыслы: «Ог аддзы помкасӧ, мед мыждыны тайӧ Мортсӧ». 5Но найӧ ӧтарӧ мыжалісны: «Велӧдӧмнас Сійӧ шызьӧдӧ йӧзсӧ став Иудея му пасьтала. Пондіс шызьӧдны Галилеяын, ӧні татчӧдз воис».

Исус Ирӧд водзын

6Галилея йылысь кылӧм бӧрын Пилат юаліс: «Сійӧ ӧмӧй Галилеяысь?» 7Кор тӧдмаліс, мый Исус Ирӧд веськӧдлан муысь, мӧдӧдіс Сійӧс сы дінӧ. Буретш сійӧ лунъясӧ Ирӧд вӧлі Ерусалимын.

8Исусӧс аддзӧмысь Ирӧдлы нимкодь лои, ӧд сійӧ важӧн нин кӧсйис аддзывны Исусӧс. Ирӧд уна кывліс Сы йылысь да виччысис аддзывны шензьӧданатор. 9Ирӧд ёна юасис Исусӧс, но Сійӧ вочакыв эз шу. 10Сэні сулалысь аркирейяс да Индӧдӧ велӧдысьяс ӧтарӧ мыжалісны Исусӧс. 11Ирӧд аслас шыпуртаяскӧд сераліс-лёкӧдіс Исусӧс, пасьтӧдіс Сійӧс озыр паськӧмӧ да бӧр мӧдӧдіс Пилат дінӧ. 12Водзынсӧ Ирӧд да Пилат лӧгалісны ӧта-мӧд вылас, но тайӧ лунсяньыс найӧ кутісны ёртасьны.

Исусӧс мыждӧм

(Мт. 27:15-26; Мк. 15:6-15; Ин. 18:39–19:16)

13Пилат чукӧртіс аркирейясӧс, юралысьясӧс да войтырсӧ, 14сэсся шуис налы: «Ті вайӧдінныд тайӧ Мортсӧ ме водзӧ да мыжаланныд Сійӧс йӧзсӧ шызьӧдӧмысь. Ме тіян дырйи юаси Сійӧс да эг аддзы мыжсӧ. Сійӧ абу мыжа, мыйысь ті Сійӧс мыжаланныд. 15Ме мӧдӧді Сійӧс Ирӧд дінӧ, но Ирӧд тшӧтш абу аддзӧма Сылысь мыжсӧ. Сійӧ эз вӧч сэтшӧм мыжсӧ, мыйысь эськӧ колӧ вины Сійӧс. 16Тшӧкта нӧйтны, сэсся лэдза».

17Быд во Ыджыд лунӧ йӧз корӧм серти Пилатлы колӧ вӧлі лэдзны дзескыдінысь ӧти мортӧс. 18Став йӧзыс горӧдісны: «Вины Сійӧс! Лэдз миянлы Варавваӧс!» 19Варавва пукаліс дзескыдінын карас зык лэптӧмысь да мортӧс виӧмысь. 20Пилат бара шыасис йӧз дінӧ, ӧд кӧсйис лэдзны Исусӧс. 21Но найӧ горӧдісны: «Тувъяв! Тувъяв Сійӧс!» 22Пилат коймӧдысь шыасис на дінӧ: «Мый лёксӧ Сійӧ вӧчис? Ме ог аддзы сэтшӧм мыжсӧ, мыйысь эськӧ колӧ вины Сійӧс. Тшӧкта нӧйтны, сэсся лэдза». 23Йӧзыс лёкысь горзісны, тшӧктісны тувъявны Исусӧс.

Йӧзлӧн да аркирейяслӧн горзӧмыс веніс. 24Пилат шуис вӧчны на ног. 25Налӧн корӧм серти сійӧ лэдзис дзескыдінысь зык лэптысьӧс, коді виис тшӧтш мортӧс. А Исусӧс сетіс налӧн кипод улӧ.

Исусӧс тувъялӧм

(Мт. 27:32-44; Мк. 15:21-32; Ин. 19:17-27)

26Исусӧс нуӧдігӧн паныдасис киринеяса Симон, сійӧ локтӧ вӧлі видз-му вылысь. Сы вылӧ пуктісны крестсӧ да тшӧктісны мунны Исус бӧрся.

27Уна йӧз муніс Исус бӧрся. Аньяс сыркъялӧмӧн бӧрдісны Сы вӧсна. 28На дінӧ бергӧдчӧмӧн Исус шуис: «Ерусалимса аньяс, энӧ бӧрдӧй Ме вӧсна. Бӧрдӧй ас вӧснаныд да ныв-пиныд вӧсна! 29Воасны лунъяс, кор шуасны: ”Шудаӧсь нӧбасьлытӧмъяс, кага вайлытӧмъяс да морӧснас нёньӧдлытӧмъяс”. 30Сэки шуасны керӧсъяслы: ”Усьӧй миян вылӧ!” Мылькъяслы шуасны: ”Вевттьӧй миянӧс!” 31Тадзи кӧ вӧчӧны веж пуыскӧд, косыскӧд мый лоас!»

32Исускӧд тшӧтш вины нуӧдісны кык лёк вӧчысьӧс. 33Воисны Юр лы нима керӧсӧ. Сэні тувъялісны Исусӧс да Сыкӧд орччӧн лёк вӧчысьясӧс: ӧтисӧ веськыдладорас, мӧдсӧ шуйгаладорас.

34Исус кевмис: «Батьӧй, прӧстит тайӧ йӧзсӧ, ӧд найӧ оз тӧдны, мый вӧчӧны».

Шыпуртаяс пудъясьӧмӧн юкисны Исуслысь паськӧмсӧ. 35Йӧзыс сулалісны да видзӧдісны. Юралысьяс накӧд сералӧмӧн шуалісны: «Мукӧдӧс мездіс – мед Асьсӧ ӧні мездас, Сійӧ кӧ Кристос, Енлӧн бӧрйӧмаыс». 36Сералісны-лёкӧдісны Исусӧс тшӧтш шыпуртаяс. Найӧ матыстчӧмӧн мыччывлісны Сылы вина уксус 37да шуалісны: «Тэ кӧ иудейяслӧн Ӧксы, мезды Асьтӧ». 38Исус юр весьтын грек, латин да еврей кывъясӧн вӧлі гижӧма: «Тайӧ – иудейяслӧн Ӧксы».

39Крестӧ тувъялӧм лёк вӧчысьясысь ӧтиыс Исусӧс омӧльтӧмӧн шуаліс: «Тэ кӧ Кристос, мезды Асьтӧ да миянӧс!» 40Мӧдыс ӧлӧдіс сійӧс: «Тэ ӧмӧй Енсьыс он пов? Тэнӧ ӧд Сы моз жӧ тувъялӧма. 41Миянӧс веськыда мыждӧма, асланым лёк вӧчӧмъясысь, а тайӧ Мортыс лёксӧ эз вӧчлы». 42Сэсся шуис Исуслы: «Господьӧй, казьтышт менӧ, кор воан Аслад Юраланінӧ!» 43Исус шуис: «Веськыда висьтала тэныд: талун лоан Мекӧд райын».

Исуслӧн кулӧм

(Мт. 27:45-56; Мк. 15:33-41; Ин. 19:28-30)

44Луншӧр кадӧ пемдіс став му пасьталаыс, пемыдыс сулаліс куим часӧдз. 45Шонді югыдыс быри, крамын ӧшалысь дӧраыс шӧрипельӧ косяссис. 46Исус ыджыд шыӧн горӧдіс: «Батьӧй, Тэнад киӧ сета Ассьым лолӧс!» Тайӧс шуӧм бӧрын лолыс петіс.

47Лоӧмторсӧ аддзӧм бӧрын сё тышкамортӧн веськӧдлысь Енмӧс ошкигтырйи шуис: «Тайӧ Мортыс збыльысь веськыда олысь вӧлӧма». 48Уна йӧз вӧлі чукӧртчӧмаӧсь видзӧдны, мый водзӧ лоӧ. Лоӧмторсӧ аддзывлӧм бӧрын найӧ морӧсаныс кучкалігтыр пондісны мунавны. 49Исуслӧн тӧдсаясыс ылісянь видзӧдісны ставсӧ тайӧс. Сэні вӧліны тшӧтш Галилеяысь Сыкӧд ветлысь аньяс.

Исусӧс дзебӧм

(Мт. 27:57-61; Мк. 15:42-47; Ин. 19:38-42)

50-51Сэні вӧлі Иудеяысь, Аримафея карысь, Ӧсип нима морт. Тайӧ бур да веськыда олысь мортыс виччысис Енлысь Юралӧмсӧ. Ӧсип вӧлі веськӧдлан котырысь, но паныд сулаліс Исусӧс виӧмлы. 52Сійӧ муніс Пилат дінӧ да корис Исуслысь шойсӧ. 53Ӧсип босьтіс крест вылысь шойсӧ, гартыштіс дӧраӧ да пуктіс изкыртаӧ кералӧм дзебанінӧ, кытчӧ некодӧс на эз дзеблыны. 54Вӧлі рыт, шойччан лунлы паныд.

55Ӧсипкӧд тшӧтш вӧліны Галилеяысь Исускӧд локтӧм аньяс. Найӧ аддзылісны, кыдзи пуктісны Исуслысь шойсӧ дзебанінӧ. 56Дзебанінысь воӧм бӧрын аньяс дасьтісны чӧскыд дука мавтасъяс, а шойччан лунӧ Индӧд серти найӧ шойччисны.

Currently Selected:

Лука 23: КБ

Highlight

Copy