Лука 22

Иуда вузалӧ Исусӧс

(Мт. 26:1-5,14-16; Мк. 14:1-2,10-11; Ин. 11:45-53)

1Матыстчисны Шомтӧм нянь сёян лунъяс, мӧд ногӧн кӧ, Ыджыд лун. 2Аркирейяс да Индӧдӧ велӧдысьяс корсисны, кыдзи эськӧ вины Исусӧс, сӧмын полісны йӧзсьыс.

3Сӧтана пырис Искариот Иуда пытшкӧ, сійӧ вӧлі дас кык велӧдчысьысь ӧти. 4Иуда муніс аркирейяс да крам видзысьяслӧн веськӧдлысьяс дінӧ да сёрнитчис накӧд Исусӧс вузалӧм йылысь. 5Найӧ нимкодьпырысь кӧсйысисны сетны сылы сьӧм. 6Иуда налы кыв сетіс, сэсся пондіс корсьны лӧсялан кад, медым вузавны Исусӧс йӧз тӧдлытӧг.

Ыджыдлунся баляӧс сёйӧм

(Мт. 26:17-30; Мк. 14:12-26; Ин. 13:21-30; 1Кор. 11:23-25)

7Воис Шомтӧм нянь сёян лун, кодыр колӧ вӧлі начкыны ыджыдлунся баляӧс. 8Петырӧс Иоанкӧд мӧдӧдіг Исус шуис налы: «Мунӧй, лӧсьӧдӧй миянлы ыджыдлунся сёян». 9Найӧ юалісны: «Кытчӧ шуан лӧсьӧднысӧ?» 10Исус шуис: «Карас пыриганыд тіянлы паныдасяс гырничын ва нуысь морт. Мунӧй да пырӧй сы бӧрся керкаас. 11Керка кутысьыслы висьталӧй: ”Велӧдысь юасьӧ, кутшӧм вежӧсын Аслас велӧдчысьяскӧд вермас сёйны ыджыдлунся баляӧс”. 12Сійӧ петкӧдлас тіянлы вылыс судтасьыс вольсалӧм ыджыд вежӧс. Сэні и лӧсьӧдӧй». 13Найӧ мунісны да аддзисны: ставыс лои Исуслӧн висьталӧм серти. Найӧ дасьтісны ыджыдлунся сёян.

14Кор воис кадыс, Исус пуксис дас кыкнан апостолыскӧд сёйны. 15Сійӧ шуис налы: «Сьӧкыдсӧ нутӧдз Ме ёна кӧсйи сёйны тіянкӧд тайӧ ыджыдлунся балясӧ. 16Висьтала тіянлы: ог нин понды сёйны тайӧ сёянсӧ сійӧ лунӧдз, кор лоӧ ыджыдлунся гаж Енлӧн Юраланінын». 17Исус босьтіс чаша да Енмӧс аттьӧалӧмӧн шуис: «Босьтӧй да юӧй татысь быдӧн. 18Висьтала тіянлы: Енлӧн Юралӧмыс вотӧдз ог понды юны виноград юансӧ».

19Сэсся Исус босьтіс нянь, Енмӧс аттьӧалӧмӧн чегъяліс няньсӧ да велӧдчысьяслы сетігас шуис: «Тайӧ Менам яй, сійӧс лоӧ сетӧма тіян вӧсна. Вӧчӧй тайӧс Менӧ казьтывлӧм могысь». 20Сёйӧм бӧрас босьтіс чаша да сійӧс сетігас шуис: «Тайӧ чашаыс – Выль Йитӧд, кӧрталӧма Менам вирӧн, сійӧ киссьӧ тіян вӧсна. 21Со, Менӧ вузалысьлӧн киыс Мекӧд ӧти пызанысь судзӧдӧ. 22Дерт, Морт Пи мунӧ водзвыв лӧсьӧдӧм туйӧд. Но курыд шог Сійӧс вузалысьлы!» 23Сэки велӧдчысьяс пондісны юасьны ӧта-мӧдныслысь, коді тайӧ на пиысь.

Кесъялысь ыджыдджык

24Велӧдчысьяс вензисны ас костаныс, коді на пиысь ыджыдджыкыс.

25Исус висьталіс налы: «Ӧксыяс ыджыдалӧны войтыръяс вылын, юралысьяс бур вӧчысь ним шедӧдӧны. 26Но ті тадзи энӧ вӧчӧй. Тіян пиысь ыджыдыс мед лоас ичӧт. Юралысь кӧ, мед лоас кесъялысьӧн. 27Пызан сайын пукалысьыс али кесъялысьыс ыджыдджык? Абу-ӧ пызан сайын пукалысьыс? Но Ме тіян пӧвстын кесъялысь.

28Ті энӧ эновтӧй Менӧ сьӧкыдлунъяс дырйи. 29Та вӧсна Ме сета тіянлы Юралӧм, кыдзи Батьӧй сетіс Меным. 30Менам Юраланінын ті понданныд сёйны-юны Мекӧд ӧти пызан сайын да пуксянныд юралан пуклӧсӧ мыждыны израильса дас кык чужанкотырӧс».

Петырлӧн кӧсйысьӧм

(Мт. 26:31-35; Мк. 14:27-31; Ин. 13:36-38)

31Господь шуис: «Кылан, Симон! Сӧтана корис шердйыны тіянӧс шобдіӧс моз. 32Но Ме кевмыси тэ вӧсна, медым эскӧмыд эз быр. Кор тэ бергӧдчан бӧр, ёнмӧд вокъястӧ». 33Петыр шуис Исуслы: «Господьӧй, Тэкӧд ме дась пуксьыны дзескыдінӧ, весиг кувны». 34Исус вочавидзис: «Петыр, тэныд шуа: талун петук чукӧсттӧдз на тэ куимысь соссян, мый тӧдан Менӧ».

Ньӧб шыпурт

35Исус юаліс велӧдчысьяслысь: «Кор Ме мӧдӧдлі тіянӧс сьӧмтӧг, ноптӧг да кӧмтӧг, тіянлы ӧмӧй эз тырмывлы мыйкӧ?» Найӧ шуисны: «Ставыс вӧлі». 36Исус шуис налы: «Ӧні мӧдарӧ. Сьӧмыд кӧ эм, босьт сійӧс сьӧрсьыд, тшӧтш ноптӧ босьт. Абу кӧ, вузав вылыс паськӧмтӧ да ньӧб шыпурт. 37Висьтала тіянлы: Ме йылысь гижӧма: ”Сійӧс пуктісны Индӧдтӧг олысьяс лыдӧ”. Тайӧ гижӧмыслы колӧ инны. Ме йылысь став шуӧмыс ӧні инӧ». 38Найӧ шуисны: «Господьӧй, тані кык шыпурт». Исус шуис: «Тырмас».

Исус кевмысьӧ Гефсиманын

(Мт. 26:36-46; Мк. 14:32-42)

39Карысь петӧм бӧрын Исус, кыдзи пыр вӧчліс, мӧдӧдчис Олив керӧсӧ. Велӧдчысьяс мунісны Сы бӧрся. 40Сэтчӧ воӧм бӧрын Исус шуис налы: «Кевмысьӧй, мед ыштӧдӧмыс эз вермы тіянӧс». 41Ачыс ылыстчис наысь из шыбитӧм ылнаӧ да пидзӧс вылас сувтӧмӧн кевмысис: 42«Батьӧй, кӧсъян кӧ, вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам». 43Сэки андел лэччис енэжсянь да ёнмӧдіс Сійӧс. 44Шогыскӧд вермасигӧн Исус ёнджыка на кевмысис. Сылӧн пӧсьыс вирӧн войталіс муӧ.

45Кевмысьӧм бӧрас Исус чеччис да локтіс велӧдчысьяс дінас. Сійӧ аддзис, мый найӧ шогысла унмовсьӧмаӧсь. 46Сэки шуис налы: «Мый ті узянныд? Чеччӧй, кевмысьӧй, мед ыштӧдӧмыс эз вермы тіянӧс».

Исусӧс локтӧны босьтны

(Мт. 26:47-56; Мк. 14:43-50; Ин. 18:3-11)

47Исуслӧн сёрнитігкості сэтчӧ локтісны йӧз. Найӧс вайӧдіс Иуда, дас кык велӧдчысьысь ӧти. Иуда матыстчис Исус дінӧ, медым окыштӧмӧн чолӧмавны Сійӧс. Ӧд Иуда шуӧма локтӧмаяслы, кодӧс пӧ окышта, Сійӧ – Исус. 48Исус шуис сылы: «Иуда, окыштӧмнад тай вузалан Морт Пиӧс». 49Исускӧд вӧлысьяс гӧгӧрвоисны, мый водзӧ лоӧ, сэки шуисны Сылы: «Господьӧй, перйыны-ӧ шыпуртнымӧс?» 50На пиысь ӧти керыштіс аркирей кесйӧглысь веськыд пельсӧ. 51Исус шуис: «Тырмас! Дугдӧй!» Кесйӧглы пеляс инмӧдчылӧмӧн Исус бурдӧдіс сійӧс. 52Сэсся аркирейяслы, юрнуӧдысьяслы да крам видзысьяслӧн веськӧдлысьяслы, кодъяс локтісны кутны Сійӧс, шуис: «Лёк вӧчысьӧс моз зорйӧн-шыпуртӧн локтінныд босьтны Менӧ. 53Ме быд лун вӧлі тіянкӧд крамын, но ті энӧ лэптылӧй кинытӧ Ме вылӧ. Ӧні тіян кадыс да пемыдыслӧн ыджыдалӧмыс».

Петырлӧн соссьӧм

(Мт. 26:57-58,69-75; Мк. 14:53-54,66-72; Ин. 18:12-18,25-27)

54Исусӧс кутысьяс вайӧдісны Сійӧс аркирей керкаӧ. Петыр бӧрӧ кольччӧмӧн вӧтчис на бӧрся. 55Йӧр пытшкас ӧзтісны бипур, йӧзыс пуксялісны сы гӧгӧр. Петыр тшӧтш пуксис. 56Ӧти кесйӧг ань аддзис Петырӧс бипур дорысь да сы вылӧ сюся видзӧдлӧмӧн шуис: «Тайӧ мортыс тшӧтш Сыкӧд вӧлі». 57Петыр соссис: «Ог тӧд Сійӧс, дона аньӧй». 58Недыр мысти мӧд морт аддзис сійӧс да шуис: «Тэ дзик на пиысь». Петыр шуис сылы: «Абу». 59Час мысти нӧшта ӧти морт эскӧдӧмӧн шуис: «Тайӧ мортыс збыльысь вӧлі Сыкӧд. Сійӧ тшӧтш Галилеяысь». 60Петыр шуис: «Бур мортӧй, ог гӧгӧрво, мый висьталан». Тайӧс шуигӧн кыліс петуклӧн чукӧстӧм. 61Бергӧдчылӧмӧн Господь видзӧдліс Петыр вылӧ. Сэки Петырлы тӧд вылас уси Господьлӧн шуӧмыс: «Петук чукӧсттӧдз на тэ куимысь соссян Меысь». 62Петыр петіс да курыда бӧрддзис.

Исусӧс лёкӧдӧм

(Мт. 26:67-68; Мк. 14:65)

63Исусӧс видзысьяс сералісны-лёкӧдісны да нӧйтісны Сійӧс. 64Сылысь чужӧмсӧ вевттьӧмӧн найӧ кучкалісны Сылы чужӧмас да шуалісны: «Висьтав, Пророк, коді кучкис Тэнӧ?» 65Сэсся ёна на омӧльтісны Сійӧс.

Исус веськӧдлан котыр водзын

(Мт. 26:59-66; Мк. 14:55-64; Ин. 18:19-24)

66Асывнас чукӧртчисны юрнуӧдысьяс, аркирейяс да Индӧдӧ велӧдысьяс. Исусӧс вайӧдісны веськӧдлан котыр водзӧ. 67Найӧ шуисны: «Висьтав миянлы, Тэ-ӧ Кристос?» Исус воча шуис: «Висьтала кӧ тіянлы, ті онӧ эскӧй. 68Юала кӧ, онӧ вочавидзӧй да онӧ лэдзӧй Менӧ. 69Ӧнісянь Морт Пи пондас пукавны Ставсӧвермысь Ен веськыдладорын». 70Ставӧн шуисны: «Сідзкӧ, Тэ – Ен Пи?» Исус вочавидзис: «Ті асьныд тайӧс шуанныд». 71Сэки найӧ шуисны: «Висьталысьяс миянлы оз нин ковны, ми асьным кылім тайӧс Сы вомсянь».

Currently Selected:

Лука 22: КБ

Highlight

Copy