Лука 6
6
1Ыджыт лун бӧрын шоччисян лунӧ Исусыс велӧтчиссескӧт муніс сюа ыббез вылӧт. Велӧтчиссес нетшкисӧ шеппесӧ, зыртісӧ киэз коласаныс да сёйисӧ туссесӧ. 2Фарисейес коласісь мукӧдыс висьталісӧ нылӧ: «Мыля тійӧ сідз кератӧ? Оз туй этӧ керны шоччисян лунӧ!» 3Исусыс нылӧ висьталіс: «Эдӧ я тійӧ лыддьӧтлӧ Давидыс йылісь, мый сія керӧм аслас отиркӧт кынӧмныс сималӧм коста? 4Сія пырӧм Енлӧн Вежа Керкуӧ, босьтӧм Енлӧ вайӧм няньсӧ. Сійӧ няньсӧ туйис сёйны дзир вежауджаліссезлӧ. Давидыс ачыс сёйӧм да сетӧм аслас отирлӧ». 5Исусыс фарисейеслӧ висьталіс: «Морт Зон и шоччисян лун вылын кӧзяин!»
Косьмӧм киа мортӧс веськӧтӧм
(Мт. 12:9-14; Мк. 3:1-6)
6Лӧсяліс и мӧд шоччисян лунас Исуслӧ пырны синагогаӧ да велӧтны. Сэтчин вӧлі морт, кӧдалӧн веськыт киыс вӧлі косьмӧм. 7Туйдӧтӧ велӧтіссес фарисейескӧт видзӧтісӧ Исусыс сьӧрын, оз я Сія веськӧт косьмӧм киа мортсӧ шоччисян лунӧ. Нія мӧдісӧ Исуссӧ мыйынкӧ кутны. 8Нылісь юраныс видзӧмсӧ тӧдӧмӧн Сія висьталіс кӧс киа мортлӧ: «Чеччы, пет шӧрас». Сія чеччис да петіс шӧрас. 9Исусыс сэк юаліс: «Висьталӧ меным, мый позьӧ керны шоччисян лунӧ: бурсӧ али умӧльсӧ? Мездыны мортсӧ али вийны?» Нія шы эзӧ сетӧ. 10Быдӧнныс вылӧ видзӧтӧм бӧрын Исусыс висьталіс сія мортлӧ: «Нюжӧт китӧ». Кӧс киаыс сідз и керис. Сылӧн киыс веськаліс, лоис мӧдыс кодь. 11Туйдӧтӧ велӧтіссес фарисейескӧт лёксялісӧ, баитісӧ ӧтамӧдныскӧт, мый бы керны Исускӧт.
Даскык велӧтчисьӧс бӧрйӧм
(Мт. 10:1-4; Мк. 3:13-19)
12Сія луннэзӧ Исусыс кайис керӧс вылӧ кеймыны. Еныслӧ Сія кеймис ойбыт. 13Луннас Сія дынас корис Ассис велӧтчиссесӧ. Ны коласісь бӧрйис даскык мортӧс, кӧднӧ пондіс шуны апостоллэзӧн#6:13 апостол ─ кылыс аркмӧм грек кылісь «апостолос», сія лоӧ «ыстӧм морт». 14Нія вӧлісӧ: Симон, кӧдалӧ Исусыс сетіс Петра ним, сылӧн Ӧндрей воныс, Яков, Иоан, Филип, Варфоломей, 15Матвей, Фома, Алфейлӧн Яков, Симон, кӧдалӧн нимкодьыс вӧлі Зилот#6:15 Зилот ─ «дорйись», морт, кӧда ёна мӧдӧ дорйыны ассис отирсӧ, 16Яковлӧн Иуда да Искариот Иуда, кӧда сэсся вузаліс Исуссӧ.
Исус веськӧтӧ шогаліссесӧ
(Мт. 4:23-25)
17Исусыс ныкӧт керӧссис лэдзчис да сувтіс волькытінын. Сэтӧн ӧксьӧмась Сылӧн уна велӧтчись да ӧддьӧн уна отир. Нія локтӧмась Иудеяись быдласянь, Ерусалимись, Тир да Сидон саридз#6:17 саридз ─ море дор муэзісь. 18Нія локтісӧ кывзыны Исуссӧ да веськӧтчыны асланыс шогӧттэзісь. Веськалісӧ и сэрпӧсь ловвезсянь пессись-мырсиссес#6:18 пессьыны-мырсьыны ─ страдать. 19Ӧксьӧммес быдӧнныс мӧдісӧ павкӧтчыны Исусыс бердӧ. Сыись петан выныс эд веськӧтліс быдӧннысӧ.
Кин шуда
(Мт. 5:1-12)
20Исусыс видзӧтіс Аслас велӧтчиссез вылӧ да пондіс баитны:
«Шудаӧсь ловныслӧ кориссез:
Енӧжись Юралӧм тіян.
21Шудаӧсь ӧні тшыгьяліссез,
тійӧ пӧтатӧ.
Шудаӧсь тійӧ, ӧні горзіссез,
тійӧ пондат серавны.
22Шудаӧсь тійӧ, кӧр Морт Зон понда син вылӧ одӧ пондӧ ковны, кӧр тіянӧс вашӧтасӧ, пондасӧ видны, тіянлісь нимнытӧ нятьнас тыртасӧ. 23Нылӧн айезныс сідз керлӧмась Енсянь юӧртіссеслӧ. Гажмӧ-гажӧтчӧ сія лунӧ, тіянлӧ эд енӧжас ыджыт козин лӧсьӧтӧм.
24Но ӧддьӧн умӧль лоас тіянлӧ, бура оліссез!
Тійӧ эд сьӧлӧмнытӧ бурмӧтіт#6:24 сьӧлӧм бурмӧтны ─ удолетвориться, успокоить сердце ни.
25Ӧддьӧн умӧль лоас тіянлӧ, ӧні быдӧсӧн пӧттэз!
Тійӧ тшыгьявны пондат.
Ӧддьӧн умӧль лоас тіянлӧ, ӧні сераліссез!
Тійӧ бӧрдны-горзыны пондат.
26Ӧддьӧн умӧль лоас тіянлӧ, быдыс кӧ тіян йылісь бура баитӧ! Сідз эд керлӧмась нылӧн айезныс бӧбӧтчиссеслӧ, асьнысӧ Енсянь юӧртіссезӧ пуктіссеслӧ».
Радейтны велӧтӧм
(Мт. 5:43-48; 7:12)
27«Тіянлӧ баита, Менӧ кывзіссеслӧ: радейтӧ тіян вылӧ лэбтісиссесӧ. Бурсӧ керӧ нылӧ, кӧдна тіян вылӧ синӧн озӧ вермӧ видзӧтны. 28Тіянӧс ёрдіссесӧ бласлӧвитӧ. Кеймӧ тіянӧс умӧльтіссез понда. 29Пельбокат сӧтісьыслӧ бергӧт мӧдтӧ. Вылісь паськӧмтӧ мырддисьсӧ лэдз босьтны и йӧрнӧстӧ. 30Тэнчит быд корисьлӧ сет. Тэнчит босьтісьыслісь сетӧмтӧ бӧр эн кор.
31Мый тійӧ видзчисят отирсянь, сійӧ и асьныт керӧ нылӧ. 32Радейтат кӧ тіянӧс радейтіссесӧ, мый сэк тіянӧс сы понда буркывтны? И умӧльсӧ кериссес эд радейтӧны нійӧ радейтіссесӧ. 33Тіянлӧ бурсӧ керисьлӧ бурсӧ кӧ керат, мый сэк тіянӧс сы понда буркывтны? И умӧльсӧ кериссес эд сідз жӧ керӧны. 34Тійӧ одзӧсӧн сетат кӧ нылӧ, кинсянь видзчисят бӧр босьтны, мый сэк тіянӧс сы понда буркывтны? И умӧльсӧ кериссес эд сетӧны одзӧсӧн ӧтамӧдныслӧ, медбы бӧр босьтны сымда жӧ. 35А тійӧ радейтӧ тіян вылӧ лэбтісиссесӧ, отсалӧ, одзӧсӧн сеталӧ, нем эд видзчисьӧ нысянь. Сэк лоас тіянлӧ ыджыт козин. Тійӧ Медвылісьыслӧ лоатӧ челядьӧн. Сія эд небыт сьӧлӧма и честь тӧдтӧммескӧт да лӧггескӧт. 36Айныт моз лоӧ небыт сьӧлӧмаӧсь».
Судитӧм йылісь
(Мт. 7:1-5)
37«Некинӧс эд судитӧ, и тіянӧс озӧ судитӧ. Некинӧс эд осудитӧ, и тіянӧс озӧ осудитӧ. Проститӧ, и тіянӧс проститасӧ. 38Сеталӧ, сэк и тіянлӧ сетасӧ. Сетасӧ меряйтан дозас дзобӧтӧмӧн#6:38 дзобӧтны ─ утрясти, чукӧр тэчӧмӧн. Тіянлӧ меряйтасӧ асланыт меряйтӧм сьӧрті».
39Исусыс висьталіс нылӧ велӧтан висьт:
«Вермас я синтӧм новйӧтны синтӧмсӧ? Озӧ разь кыкнанныс усьӧ гӧпӧ? 40Оз овлы, медбы велӧтчисьыс вӧлі пуктӧм велӧтісься вылынжыка. Быдыс лоас аслас велӧтісь кодь дзир велӧтчӧм бӧрын.
41Мый тэ видзӧтан воныт синын ёгок вылӧ, аслат синісь кӧ керсӧ он кыв? 42Кыдз тэ верман висьтавны аслат вонлӧ: "Вай кыска синсит ёгсӧ"? Ачыт тай аслат синісь керсӧ он адззы. Ылӧтчись морт! Одзжык кыскы аслат синісь керсӧ. Сэк казялан, кыдз кыскыны ёгоксӧ воныт синісь».
Бур да умӧль воӧм
(Мт. 7:16-20; 12:33)
43«Умӧль пу вылас оз вермы лоны бур воӧмыс. Бур пу вылас оз вермы лоны умӧль воӧмыс. 44Быд пусӧ тӧдӧны сы вылын воӧм сьӧрті. Оз ӧктӧ инжир жельнӧг вылісь, виноград ─ понуль вылісь. 45Бур сьӧлӧмись бур мортыс петкӧтӧ бурсӧ. Лӧг мортыс аслас лӧг сьӧлӧмись петкӧтӧ лӧгсӧ. Мый мортлӧн сьӧлӧмас, сія и кыв вылас».
Кык керку лэбтӧм йылісь
(Мт. 7:24-27)
46«Мый тійӧ Менӧ коратӧ: "Дӧсвидзись, Дӧсвидзись", а Менам баитӧм сьӧрті одӧ керӧ? 47Висьтала тіянлӧ, кин кодь сія мортыс, кӧда локтӧ Ме дынӧ, кывзӧ Менчим кыввезӧс да ны сьӧрті олӧ. 48Сія керку лэбтісь морт кодь, кӧда керку лэбтанінсӧ гарйис-пыдынсьӧтіс изӧдз. Из вылас тэчис керку увтсӧ, лэбтіс керкусӧ. Ваыс паськаліс, локтіс сія керку вылӧ, эз вермы сійӧ вӧрзьӧтны. Керкуыс эд вӧлі лэбтӧм из вылӧ. 49А Менчим кыввезӧс кылісьыс оз кӧ ов висьталӧмыс сьӧрті, сэк сія керкусӧ увттӧг лэбтісь морт кодь. Сія ассис керкусӧ эз лэбты из вылӧ, сувтӧтіс му вылӧ. Локтіс сы вылӧ ыджыт ва, керкуыс быдсӧн разьсис».
Сё воинӧн веськӧтлісьлӧн#7:0 сё воинӧн веськӧтлісь ─ сотник веритӧм
(Мт. 8:5-13)
Currently Selected:
Лука 6: БЮ19
Highlight
Share
Copy
Want to have your highlights saved across all your devices? Sign up or sign in
