Лука 15

1Вот ӧктіссес да мӧдік умӧльсӧ керись отир сибӧтчывлісӧ кывзыны Исуссӧ. 2Фарисейес Туйдӧтӧ велӧтіссескӧт лӧгӧн баитісӧ: «Сія сибӧтӧ дынас умӧльсӧ кериссесӧ да сёйӧ ныкӧт». 3Сэк Исусыс нылӧ висьталіс сэтшӧм велӧтан висьт:

4«Шуам, кинлӧнкӧ тіян коласісь эм сё баля чукӧр. Сэтісь ӧтік ӧшас. Оз разь мортыс коль ӧкмысдас ӧкмыс балясӧ овтӧминас, медбы кошшыны ӧшӧмсӧ? Сія пондас кошшыны балясӧ адззытӧдз. 5Адззас сійӧ, гажмас, пуктас пельпон вылас. 6Гортас локтӧм бӧрын корас ёрттэсӧ матын оліссескӧт да висьталас: "Гажӧтчӧ мекӧт! Ме адззи ассим ӧшӧм баляӧс". 7Висьтала тіянлӧ: енӧжас ӧддьӧн ыджыт гаж овлӧ, бергӧтчас кӧ Енлань ӧтік умӧльсӧ керись морт. Сэтшӧм гажыс оз овлы ӧкмысдас ӧкмыс#15:7 ӧкмысдас ӧкмыс ─ 99 Ен сьӧрті веськыта олісь понда. Нылӧ эд оз ков бергӧтчыны умӧль керӧммезныс дынісь».

Ӧшӧм сьӧм йылісь велӧтан висьт

8«Кытшӧм инька дас эзысь сьӧмись#15:8 дас эзысь сьӧм ─ 10 серебряных монет ӧтікӧ ӧштас кӧ, оз ӧзты би, оз понды чышкыны джоджсӧ да бура кошшыны сійӧ адззытӧдз? 9Адззас сьӧмсӧ, корас модзанкаэсӧ#15:9 модзанка ─ подруга матын олісь инькаэскӧт да висьталас: "Гажӧтчӧ мекӧт, ме адззи ӧшӧм сьӧмӧс". 10Тіянлӧ висьтала: ӧтік морт понда овлӧ сэтшӧм жӧ гажыс Енлӧн ангеллэзлӧн, бергӧтчас кӧ мортыс умӧль керӧммес дынісь Енлань».

Ылалӧм зон йылісь велӧтан висьт

11Исусыс эшӧ висьталіс:

«Ӧтік мортлӧн вӧлӧмась кык зон. 12Ны коласісь учӧтжык зоныс айыслӧ висьталас: "Айӧ, пажытьсис вай менчим пайӧс". Айыс пажытьсӧ кыкнан зоныслӧ янсӧтас. 13Кынымкӧ лун бӧрті учӧтжык зоныс аслас пайӧн мунас ылісь муэзӧ. Сэтчин лэдзчисьӧмӧн овтӧнняс быдӧс, мый сылӧн вӧлі, видзыштас. 14Сэк сія муын отирыс ёна пондасӧ тшыгьявны. Зонкалӧ овны лоас ӧддьӧн сьӧкыт. 15Сія локтас сэтчин олісь дынӧ медасьны. Мӧдыс ыстас зонкасӧ ыб вылӧ видзӧтны порссез сьӧрын. 16Зонкаыс ӧддьӧн мӧдӧм порсь сёяннас тыртны кынӧмсӧ. Сылӧ и сійӧ некин оз сет.

17Зонкаыс вежӧрсялас да шуас: "Айӧлӧн уджаліссес пӧттӧдз сёйӧны, да няньыс эшӧ кольччӧ, а ме тшыгйӧн кула! 18Чечча, муна айӧ дынӧ. Сылӧ висьтала: Айӧ! Ме кери умӧльсӧ енӧж одзын и тэ одзын. 19Менӧ оз ни позь шуны тэнат зонӧн. Босьт менӧ медалӧм уджалісьӧн". 20Зонка чеччас да мунас айыс дынӧ.

Айыс ылісянь казялас зонсӧ. Сылӧ жаль лоас сія. Сія котӧртас паныт, кутчисяс голя бердас, окалас зонсӧ. 21Зоныс висьталас сылӧ: "Айӧ! Ме кери умӧльсӧ енӧж одзын и тэ одзын. Менӧ оз ни позь шуны тэнат зонӧн". 22Айыс висьталас раббеслӧ: "Вайӧ буржык паськӧм, пасьтӧтӧ сійӧ. Киас кышалӧ чунькытш. Коккезас ─ кӧмкӧт. 23Вайӧтӧ ёнжык кукань да начкылӧ. Пондам сёйны да гажӧтчыны! 24Эта зонӧ менам вӧлі кулӧм да ловзис, ӧшліс да адззисис". Быдӧнныс пондасӧ гажӧтчыны.

25Сылӧн пӧрисьжык зоныс вӧлӧм ыб вылын. Сія бертікас, горт дынас локтікӧ ни, кылас сьылӧм да гажӧтчӧм. 26Дынас корас ӧтік рабӧс да юалас: "Мый сэтшӧмыс?" 27Рабыс сылӧ висьталас: "Тэнат воныт локтіс. Айыт начкыліс ён куканьӧс, зоныс эд сы дынӧ локтіс ловья". 28Пӧрисьжык зоныс лӧгасяс, нельки керкуас оз пыр. Айыс петас да сійӧ корас. 29Мӧдыс айыслӧ висьталас: "Кыным во ме тэныт уджала, пыр кера тэнат тшӧктӧм сьӧрті, но тэ меным ёрттэзӧкӧт гажӧтчыны и кӧзапиянӧс эн сет. 30Зоныт локтіс куш киӧн, лэдзчисьӧм инькаэзкӧт быдӧс видзыштӧм бӧрсянь. Тэ тай сы понда начкылін ён куканьӧс". 31Айыс сылӧ висьталас: "Зонӧ! Тэ пыр мекӧт. Быдӧс, мый менам эм, сія тэнат. 32Воныт понда эд колӧ гажмыны да гажӧтчыны. Сія вӧлі кулӧм да ловзис, ӧшліс да адззисис"».

Умӧль веськӧтлісь йылісь велӧтан висьт

Currently Selected:

Лука 15: БЮ19

Highlight

Copy