Ап. керӧммез 17

1Амфиполь да Аполония каррезӧт мунӧм бӧрын нія локтісӧ Фессалоникаӧ. Сэтӧн иудейезлӧн вӧлі синагога. 2Павел одззамоз пырис синагогаас. Куим шоччисян лун сьӧрна сія отирыслӧ баитіс Вежа Гижӧттэз сьӧрті. 3Сэтісь осьтіс-вежӧртӧтіс: «Кристосыслӧ коліс пессьӧмӧн-мырсьӧмӧн кувны да ловзьыны. Сія Исусыс и эм Кристос-Мездӧтісьыс, кӧда йылісь ме тіянлӧ висьтася». 4Отирыс коласісь мукӧдыс пондісӧ веритны да ӧтлаасисӧ Павелкӧт да Силакӧт. Ны коласын унаӧн вӧлісӧ грек кыв вылын баитіссез. Унакодь вӧлісӧ и вылына пуктӧм инькаэз.

5Но мукӧд иудейес эзӧ веритӧ да ӧддьӧн лӧгасисӧ. Нія босьтісӧ ӧксянінсис умӧль морттэзӧс да карсис отирсӧ ызйӧтісӧ лэбтісьны апостоллэс вылӧ. Чукӧртчӧммес локтісӧ Ясон керку дынӧ. Нія мӧдісӧ Павелсӧ да Силасӧ петкӧтны отирыс дынӧ, 6но нійӧ эзӧ адззӧ. Сэк Ясонсӧ кынымкӧ веритіськӧт нуӧтісӧ карын юраліссез дынӧ. Отирыс горӧтлісӧ: «Этна быдлаын зык#17:6 зык ─ шум, мятеж лэбтіссес и татчӧдз локтісӧ! 7А Ясоныс нійӧ гортас лэдзис. Рим ӧксулӧн тшӧктӧммезлӧ нія паныт сувтӧны. Ӧксунас пуктӧны мӧдікӧс, Исусӧс». 8Сідз баитӧмнаныс нійӧ кывзісь отирсӧ да карсис юраліссесӧ тӧждісьӧмӧдз вайӧтісӧ. 9Ясонсӧ да мӧдіккесӧ лэдзисӧ, кӧр нія вештісӧ, мымда коліс.

Павел да Сила Верияын

10Воннэз тэрмасьӧмӧн ойнас Павелсӧ да Силасӧ ыстісӧ Верияӧ. Сэтчин нія локтісӧ да пырисӧ иудейезлӧн синагогаӧ. 11Сэтӧн олісь иудейес вӧлісӧ мывкыдажыкӧсь Фессалоникаын оліссезся. Нія бура кывзісӧ Кывсӧ. Быд лун висьталӧмсӧ видзӧтісӧ Вежа Гижӧттэз сьӧрті, былись я сідз гижӧм. 12Вериясис иудейес унаӧн пондісӧ веритны. Уна веритіссез вӧлісӧ и грек кыв вылын баитіссез коласісь: вылына пуктӧм инькаэз да ай отир. 13Фессалоникаас иудейеслӧ кывсьӧм: Павелыс пӧ Верия карас юӧртӧ Ен Кывсӧ. Нія локтісӧ сэтчӧ да ызйӧтісӧ отирсӧ лэбтісьны Павелыс вылӧ. 14Сэк веритіссес иньдісӧ Павелсӧ саридз дорӧ. Верияас кольччисӧ Сила да Тимофей. 15Кольлаліссес Павелсӧ вайӧтісӧ Афинӧдз да бертісӧ. Силалӧ да Тимофейлӧ нія вайисӧ юӧр: нылӧ пӧ падмӧтчытӧг колӧ локны Павел дынӧ.

Павел Афинын

16Афинас Павелыс видзчисис Силасӧ да Тимофейсӧ. Сія карын вӧлісӧ унася-уна киӧн керӧм еннэз. Сысянь Павелыс пондіс тӧждыны, сьӧлӧм вылас лоис сьӧкыт. 17Сія быдлаын сёрнитіс отиркӧт. Иудейескӧт да мӧдік отир коласісь Енсӧ тӧдіссезкӧт пантасьліс синагогаын. Пантасьліс и ӧтӧрын ӧксьӧм отиркӧт. 18Мукӧдыс Павелыскӧт кутчисьлісӧ етшасьны. Нія вӧлісӧ философфез, «Эпикур» да «Стоик» велӧтӧммез сьӧрті оліссез. Ӧтіккез баитісӧ: «Мый мӧдӧ висьтавны эта абутӧмсӧ баитісьыс?» Мӧдіккез шуисӧ: «Тыдалӧ, сія висьтасьӧ йӧз еннэз йылісь». Павелыс эд нылӧ висьтасис Исусыс йылісь да ловзьӧм йылісь. 19Сійӧ вайӧтісӧ Ареопагӧ. Нія юалісӧ: «Позьӧ я миянлӧ тӧдны, кытшӧм виль велӧтӧм тэ висьтасян? 20Мыйкӧ тэ вӧвлытӧмӧ баитан миянлӧ. Висьтав миянлӧ, мый сія сэтшӧмыс?» 21Афинын оліссес да ны дынӧ мӧдік муэзісь локтӧм отир каднысӧ унажык чулӧтлісӧ ӧтлаӧ ӧксьӧмӧн. Нія ёна радейтісӧ кывзыны мыйкӧ вильӧ.

22Павелыс сувтіс Ареопаг шӧрӧ да висьталіс: «Афинын оліссез! Быдӧсын ме адзза, тійӧ ӧддьӧн юрбитісь йӧз. 23Ме ветлӧтікам видзӧті копрасяніннэзнытӧ да адззи езъяланін#17:23 езъяланін ─ жертвенник , кӧда вылын гижӧм: "Тӧдтӧм Енлӧ". Тійӧ Сійӧ тӧдтӧг пуктат Енӧ. Ме Сы йылісь тіянлӧ и висьтася.

24Миян гӧгӧрисьсӧ быдӧс аркмӧтіс Еныс. Сія енӧжыслӧн да муыслӧн Дӧсвидзись, Кӧда оз ов киӧн керӧм копрасяніннэзын. 25Сылӧ оз ков морт киэзӧн отсасьӧмыс, Сылӧн эд быдӧс эм. Сія Ачыс сетӧ быдӧнлӧ олан, лолалӧм да быдӧс коланасӧ. 26Ӧтік мортсянь Сія аркмӧтіс быдӧс морт увтырсӧ му пасьта олӧм понда. Ачыс сетіс нылӧ, мымда овны да кытӧн овны. 27Сія быдӧс керис, медбы отирыс кошшисӧ Енсӧ. Поди, кималасӧн моз кошшӧмӧн адззасӧ Сійӧ. Сія эд абу ылын быдӧнным дынсянь. 28Мийӧ Сыкӧт ӧтлаасьӧмӧн олам, ветлӧтам да лолалам. Тіян коласісь мукӧд кывбур гижиссес висьталісӧ: "Мийӧ быдӧнным Сы увтырись". 29Сідзкӧ, мийӧ ─ Ен увтырись. Оз ков видзны юрын: Енсӧ пӧ позьӧ керны кужана киэзӧн да морт мывкыдӧн мыйкӧ вылӧ вачкисянаӧ зарниись, эзысись, изісь я.

30Еныс дыр терпитіс отирыслісь Енсӧ тӧдтӧм олӧмнысӧ. Ӧні Еныс быдлаын да быд мортлӧ тшӧктӧ бергӧтчыны умӧль керӧммезныс дынісь Сыланьӧ. 31Сія сувтӧтіс Судитан Лун, кӧр пондас веськыта бӧрйисьны быдӧс му вылісь отиркӧт. Судитісьӧн лоас Сылӧн сувтӧтӧм Мортыс. Сійӧ Мортсӧ быдӧнныслӧ мыччаліс, кӧр Сійӧ ловзьӧтіс».

32Кулӧммезісь ловзьӧм йылісь кылікӧ, ӧтіккез пондісӧ серавны. Мӧдіккез висьталісӧ: «Эта йылісь тэнӧ кывзам мӧдпырись». 33Сэк Павелыс ны дынісь петіс. 34Но мукӧдыс локтісӧ Павелыс дынӧ да пондісӧ веритны. Ны коласын вӧлісӧ Ареопагын уджалісь Дионисий да Дамар нима инька.

Коринфын

Currently Selected:

Ап. керӧммез 17: БЮ19

Highlight

Copy