Marqoosa Mishiraachcho 8

Yesusi Oyddu Shii As Mizides

(Mato 15:32-39)

1He wode qasse daro asi shiiqides. Shiiqida asaas miza kaththi baynda gishshas Yesusi bana kaallizayta xeygidi, 2«Hayti asati tanara heedzdzu gallas gakkanaas gam7ida gishshassinne qasseka isttas miza kaththi baynda gishshas tana miichcheettes. 3Isttafe issi issi asati haahoppe yida gishshas hayssa gafara ta istta soo yeddiko daaburdi oge bolla kundana» gides.

4Iza kaallizaytikka zaaridi, «Hayssa bazzon hayssa mala dere mizana quma awappe demmanee?» gida.

5Izikka istta, «Inttekon aappun ukeththi dizee?» gi oychchides. Isttika, «Laappun ukeththi dees» gida.

6Izikka asay gaden uttana mala azazides; laappun ukeththaa ba kushen oykki galatidinne menththidi asaas gishechchana mala bana kaallizaytas immiin isttika derezas gishida. 7Qasseka heen diza qeeri guuththa moleta gishshas Xoossaa galatidi guuththa moleta asaas gishechchana mala bana kaallizayta azazides. 8Dereykka miidi kallides. Hessafekka iza kaallizayti maaddaafe palahida kath laappun leemate kumeth denththida. 9-10Hessa mida asay oyddu shii gidana. He asaa moyzidi bana kaallizaytara wogolon gelidi gede Dalmanuuta geetettizaso bides.

11Farsaaweti yiidi Yesusara palameteth oykkida; iza paaccanaas koyidi banttana saloppe malaata bessana mala oychchida.#Mato 12:38; Luqa 11:16 12Izikka tookki shempidi, «Hayssi yeletazi aazas malaata koyzee? Ta inttes tuma gays; hayssa yeletaas issi malataykka imettenna» gides.#Mato 12:39; Luqa 11:29 13Istta heen aggidinne wogolon gelidi he pinth pinnides.

Farsaaweta Irshonne Herdoosa Irsho

(Mato 16:5-12)

14Iza kaallizayti kath oykkontta balettida gishshas issi ukeththi attiin wogolo giddon hara ay kaththika deenna. 15Yesusi istta, «Farsaaweta irshofenne Herdoosa irshofe naagettite» giidi azazides.#Luqa 12:1

16Istti qasse ba giddon issoy issaara, «Izi nuna hayssa gizay nuus kaththi baynda gishshassa» gi haasayettida.

17Qasse Yesusi istta qofaa eridi, «Nuus kaththi baynda gishshas gaasa giidi intte giddon aazas haasayetteetii? Ha7ikka yuushshi qoppeketii? Wozinankka woththekeetii? Woykko intte wozinay shuchchatidee? 18Inttes ayfey dees shin xeelleketii? Hayththi dees shin siyekketii? Akeekekketii?#Er 5:21; Hizi 12:2; Mar 4:12 19Ichchashu ukeththaa ichchashu shii asaas ta menththa immiin aappun leemate kumeththa kath denththidetii?» gides.

Isttika zaaridi, «Tammanne nam7u» gida. 20Izikka, «Laappun ukeththaa oyddu shii asaas ta menththa immiin aappun leemate kumeththa kath denththidetii?» gi oychchiin isttika, «Laappun» gida.

21Izikka isttas, «Histtiin ha7i gakkanaas yuushshi qoppibeekketakkaa!» gides.

Yesusi Betesaydan Paththida Qooqe Addeza

22Hessafe gede Betesayda geetettizaso bida; guuththa asatikka ayfe qooqe as Yesusaakko ehidi Yesusi iza bochchana mala woossida. 23Izikka he qooqeza kushe oykki goochchidi asi dizasoppe gede kare kessidi addeza ayfen cuttidinne ba kushe iza bolla woththidi, «Ha7i nees aazi beettizee?» gi oychchides.

24Izikka dhoqqu gi xeellidi, «Asay mith misatidi qaaxettishe beettes» gides.

25Qasseka Yesusi ba kusheta iza ayfeta bolla woththides; heerakka iza ayfeti xeellida; poo7oykka izas simmiin wursika geeshshi xeellides. 26Qasse, «Ha gutata giddo geloppanne oonaska yootoppa» giidi iza gede izaso yeddides.#8:26 Gi7ize Caaqo Ooraththa Maxaafazi 1,947 maaroteththa layththan xaafettida Amaraththo Geeshsha maxaafazinne issi issi beni Girike qaalan xaafettida Geeshsha Maxaafati hayssafe kaalliza qofaa gujjeettes; histtiko hayssa oonaska yootoppa.

Yesusi Xoossafe Kiitettidaade Gididayssas Phexroosa Markkateth

(Mato 16:13-20; Luqa 9:18-21)

27Yesusi bana kaallizaytara Qisaariya Piliphisiyoose geetettiza dere achchan diza gutata bides; istti oge bolla dishin bana kaallizayta, «Tana asay oona gizee?» giidi oychchides.

28Isttika zaaridi nena, «Xammaqiza Yohannisa gizaytikka deettes, baggayti qasse Eelaasa geettes; harati qasse nabetappe issaade geettes» giidi yootida.#Mar 6:14-15; Luqa 9:7-8

29Kaaleththidikka, «Inttech tana oona geetii?» giidi oychchides. Phexroosi, «Neni Kirstoosa» gides.

30Yesusikka ba gishshas oonaska istti yootontta mala minththi yootides.

Yesusi Ba Hayqqanayssa Kasetidi Yootides

(Mato 16:21-28; Luqa 9:22-27)

31Hessafe Yesusi bana kaallizayta, «Asa Nay daro waaye beyanayssanne dere cimatan, qeeseta halaqaninne xaafetan kadhettana; asa kushen hayqqana, hayqoppe heedzdzanththo gallas dendana bessees» giidi tamaarso oykkides. 32Izikka hessa isttas qonccisi yootides, Phexroosikka iza dumma shaakki efidi, «Hessaththo gooppa!» giidi hanqides.

33Yesusi qasse bana kaallizayta yuushshi xeellishe Phexroosa, «Haysso Xala7e ne taappe gede guye ba! Neni asazaappe attiin Xoossaaz qoppaka!» giidi hanqides.

34Hessafe guye asaa bana kaallizaytara issife baakko xeygidi, «Tana kaallanaas dosizaadey diikko bana kaddo; ba masqale tookkidi tana kaallo.#Mato 10:38; Luqa 14:27 35Ba shempo ashshana dosizaadey dhayssana shin ta gishshassinne ta Mishiraachcho qaalaa gishshas ba shempo dhayssizaadey wurikka ashshana.#Mato 10:39; Luqa 17:33; Yoha 12:25 36Asi alame kumeth haarikkonne ba shemppo dhayssiko iza ay go7anee? 37Woykko asi ba shempo gishshas laame ekkanay aazi dizee?

38«Hayssa laymanne nagaranchcha yeleta giddon dishe tananinne ta qaalan yeellatiza asi wuri ta Asa Nay ta Aawaa bonchchoranne Geeshsha Kiitanchchatara yiza wode izan yeellatana» gides.

Currently Selected:

Marqoosa Mishiraachcho 8: GM

Highlight

Copy