Marqoosa Mishiraachcho 6

Naazirete Asay Yesusa Ekkibeenna

(Mato 13:53-58; Luqa 4:16-30)

1Hessafe guye Yesusi heeppe dendidi gede ba dere bides. Iza kaallizaytikka izara bida. 2Ayhudata Sambatay gakkiin Ayhudata Woosa Keeththe gelidi tamaarsishin siyida asay, «Hayssi addezi hayssa wursi awappe ekkidee? Hayssi izas imettida erateththay aazee? Qasse hayti izi ooththiza malaatati waani iza kushen hanizoo?» gishe malalettida. 3«Hayssi anaaxeza gidennee? Maarami naa Yaaqoobentta Yoosantta, Yuhudanttanne Simoonantta isha gidennee? Iza michcheti nunara haan nu matan dizayta dettenee?» giidi hessafe dendidayssan izan ufayettibeettenna.

4Yesusikka isttas, «Nabey bonchchettonttay ba deren ba dabbota giddoninne baso asaa achchan xalla» gides.#Yoha 4:44

5Heen guuththa harganchchata bolla kushe woththi paththoriippe attiin hara aykko malaatakka ooththanaas dandaybeenna. 6Isttas ammanoy bayndayssa be7idi malalettides. Hessafekka Yesusi gutan gutan yuuyi yuuyi tamaarsides.

Yesusi Kiitti Yeddida Tammanne Nam7ata

(Mato 10:5-15; Luqa 9:1-6)

7Tammanne nam7ata baakko xeygidi nam7u nam7u histti kiittishe tuna ayanata bolla isttas godateth immides. 8Izi, «Oges gidiza guufe attiin oge shinqe woykko korojo woykko miishshe oykkofte.#Luqa 10:4-11 9Caamma aaththite gido attiin laammana may7o oykkofte. 10Issi keeththe intte gelikko he katamaappe intte kezana gakkanaas he keeththaan diite. 11Awanka oonikka inttena mokki ekkontta ixxiko heeppe kezishe he dereta bolla markka gidana mala intte toho bolla diza gudulla qoqofte» giidi azazides.#6:11 Gi7ize Ooraththa Caaqo Maxaafaynne 1,947 maaroteththa layththan xaafettida Amaraththo Geeshsha Maxaafay hayssafe kaallidi diza qofa gujjeettes; «Inttes tuma gays; he katamayppe Sodoomessinne Gamooras pirda gallas lo7ana.» Hayssa ha qofay Girike qaalan birshettida maxaafatan deenna.#Hawa 13:51

12Isttika heeppe kezidi derey maaroteththan gelana mala sabbakida. 13Daro daydanththata kessida; daro harganchchata zayte tiyi tiydi paththida.#Yaaqo 5:14

Xammaqiza Yohannisa Hayqo

(Mato 14:1-12; Luqa 9:7-9)

14Yesusa sunththi kaseppe eretti eretti bishin kawo Herdoosi hessa siyides. Issi issi asati, «Hayssa mala malaatata ooththizay Xammaqiza Yohannisi hayqoppe dendiina» gida.

15Baggayti, «Eelaasa» geettes; bagga asay qasse, «Kase nabetappe issaa misatees» geettes.

16Herdoosi yo7oza siyidi, «Ta iza qoodhe qanxxisida Yohannisi hayqoppe paxi dendides» gides. 17Herdoosi ba isha Piliphoosa machcho Herodiyaado ekkida gaason oykettidi qashettana mala azazidi Yohannisa qasho keeththe gelththides. 18Yohannisi Herdoosa, «Ne isha machcho ne ekkontta mala wogay nena diggees» gida gishshas qachchides.#Luqa 3:19-20

19Herodiyaada hessa gishshas hoollottada iza wodhisanaas koyadus shin dandayabeekku. 20Gaasoykka Yohannisi xillonne geeshsha as gididayssa Herdoosi eriza gishshas Yohannisas babbeessinne iza naagees. Yohannisi yootizayssa Herdoosi siyidi hirgizaa gidikkoka izi yootizayssa wozinappe siyees.

21Herdoosa yeleta gallas bonchchanaas dhoqqa shuumetas, ola wottadarata azaziza waannatassinne Galila biittan keehi erettiza gita asatas gibira kessides; hessika Herodiyaadis giiga gallas gidides. 22Herodiyaadi macca naya gelada asaa sinththan mazamure yexxiin Herdoosanne izi xeygida asaa izi yeththay ufayssides. Kawozikka nayo, «Ne koyza miish ubbaa tana oychcha; ta nees immana» gides. 23Qasseka ta kawoteththa baggaa gididaakkoka ne oychchiko ubbaa ta nees immana giidi izis caaqqides.

24Naya elela kezada ba aayeyo, «Kawoza ay oychchoo?» gadus. Aayiyakka, «Xammaqiza Yohannisa hu7e qanxxada imma ga» gadus.

25Nayakka elela kezada kawozaakko gelada, «Xammaqiza Yohannisa hu7e keren woththada ne taas immana mala koyays» ga oychchadus.

26Kawoy he yo7ozan daro modhettides; gido attiin xeygettida imaththaa gishshassinne caaqqida qaalaa gishshas izis akkay gaanaas koyibeenna. 27Hessa gishshas wottadaratappe issaa eeson kiittidi Yohannisa qoodhe qanxxidi iza hu7e ekki yaana mala azazides; izikka biidi qasho keeththaa giddon Yohannisa qoodhe qanxxides. 28Hu7eza kerera ehidi nays immides; nayakka ba aayeys immadus. 29Yohannisa kaallizaytikka hessa siyida mala yiidi Yohannisa aha ekki efidi moogida.

Yesusi Mizida Ichchashu Shii Asaa

(Mato 14:13-21; Luqa 9:10-17; Yoha 6:1-14)

30Hessafe guye Hawaareti simmidi Yesusa achchan yuuyi aadhdhi ba ooththidayssanne ba tamaarsidayssa ubbaa izas yootida. 31Daro asay yishenne bishe giza gishshas quma miza wodeykka beettibeenna; «Ane intte xalla tanara asi bayndaso biidi guuth shempi ekkite» gides. 32Hessa gishshas istti barkka wogolon gelidi issi asikka bayndaso bida.

33Istti bishin daroti be7idi tohora woththan isttafe sinththe aadhdhida. 34Yesusi wogolozappe wodhdhiza wode daro derey shiiqi uttidayssa be7ides. Heemmizaadey baynda mehe mala gidida gishshas asaas qadhettides; daro yo7okka tamaarso oykkides.#Tay 27:17; 1Kawo 22:17; 2Taari 18:16; Hizi 34:5; Mato 9:36

35He wode gadey qammi qammi biza gishshas iza kaallizayti izakko shiiqidi, «Hayssi nu dizasoy bazzoko; gadeykka qammides. 36Hayssa heeran asi dizaso biidi asay baas miza kath shammi maana mala asaa yedda» gida.

37Izi isttas zaaridi, «Asaas miza miish intte immite» gides. Isttika malalettidi, «Nuni biidi nam7u xeetu dinaarera kath shammidi hayssa asaas immizaakko gidandee?» gida.#6:37 He wode 200 dinaare demmanaas issi asi 200 gallas ooththanaas koshshees.

38Izikka isttas, «Inttes ay keena ukeththi dizaakko ane biidi xeellite» giin istti bi xeellidi, «Ichchashu ukeththinne nam7u moley dees» gida.

39Hessafe kaallidi asaa cilila maata bolla butten butten utisana mala azazides. 40Asaykka xeetu xeetunne ichchashu tammu ichchashu tammu gididi butten uttides. 41Izikka ichchashu ukeththatanne nam7u moleta ba kushen oykkidi pude salo xeellidi anjjidinne ukeththaa menththi menththi asaas gishana mala bana kaallizaytas immides; nam7u moletakka ubba asaas shaakereththides. 42Asay wurikka miidi kallides. 43Yesusa kaallizayti asay kalli miin attidayssa tammanne nam7u leemate kumeth shiishshides. 44Kaththaa mida asaappe attumasay xalla ichchashu shii.

Abba Bollara Yesusa Hemeta

(Mato 14:22-33; Yoha 6:15-21)

45Heerakka izi asaa moyzishe iza kaallizayti sinththatidi gede pinth Betesayda geetettizaso pinnana mala azazides. 46Heeppeka istta aggaagidi woossanaas pude zuma bolla kezides.

47Gadey qammiin wogoloy abbaa giddon dishin izi barkka biitta bolla dees. 48Abbaa bolla carkoy keehi metida gishshas iza kaallizayti abbaa shiri shiri wogolo laaggiza miishshaara baaxetishin Yesusi be7ides. Wontta bolla isttako yides; yiidinne istta achchara aadhdhi baanaaththo hanides. 49Gido attiin aadhdhi baana hanishin iza be7ida mala moytille be7ida misatiin wurikka waassida. 50Wurikka iza be7idi dagammida; izikka heerakka istta yoochchidi, «Aykkoy baa; tanakko dagammofte!» gides. 51Izikka wogolon isttako geliin carkoy co7u gides, isttika daro malalettida. 52Kase izi ukeththan ooththida malaata birsheth istti erontta gishshas istta wozinay doccides.

53Abbaa pinnidi Gensereexe geetettizaso gakkida; wogolaappe wodhdhidi wogoloza heen qachchidi aggi bida. 54Istti wogoloppe wodhdhida mala asay Yesusa erides. 55Wurikka ba dizaso dizaso woxerettidi harganchchata halan tookki tookki ekkidi Yesusi dizaso ehida. 56Izi gakkida gutan woykko katama giddon woykko dere giddon gidiin harganchchati izi aadhdhishin iza woossidinne iza may7o bochchidi paxana mala shiishshi shiishshi dubbushay dizason woththida. Izi aadhdhi bishin iza may7o bochchidayti wuri paxida.

Currently Selected:

Marqoosa Mishiraachcho 6: GM

Highlight

Copy