Marqoosa Mishiraachcho 4
4
Zereth Zerizaade Leemiso
(Mato 13:1-9; Luqa 8:4-8)
1Qasse Yesusi hara wode abbaa achchan tamaarso oykkides. Izakko keehi daro derey shiiqida gishshas abbaa giddon diza wogolo dizaarin gelidi uttides; asaykka wuri abbaa achchan shiiqides.#Luqa 5:1-3 2Izikka daro yo7ota leemison hizgi tamaarsides. 3«Siyite! Issaadey zereth zeranaas kezides. 4Izi zerishin issi issi zereththi oge bolla wodhdhides. Oge bolla wodhdhida zereththaa kafoti maxi mida. 5Baggay mela biittan wodhdhides. He biittay mela gidida gishshas heerakka caarides. 6Gido attiin arshey kezida mala shullidi xapho yeddontta gishshas melides. 7Qasse issi zereththi agunththa giddon wodhdhides; agunththayka diccidi cuullida gishshas ayfibeenna. 8Hara zereththi qasse lo7o orde biitta bolla wodhdhida gishshas caaridi diccides; ayfekka ayfides; Issoy heedzdzu tammu, issoy qasse usuppun tammu, issoy qasse xeetu ayfides.»
9Yesusi qasseka, «Siyiza hayththi dizaadey siyo!» gides.
Yesusi Leemisora Yootiza Gaaso
(Mato 13:10-17; Luqa 8:9-10)
10Yesusi barkka dishin tammanne nam7atinne kase izara diza asay izi yootida leemisoza gishshas iza zaari oychchida. 11Izikka isttas, «Inttes Xoossa Kawoteththa xuura eroy gelides shin karen dizaytas gidikko yo7oy wuri leemisora yootettees. 12Hessika kase, ‹Istti be7idi be7idayssa akeekontta malanne simmontta mala, qasseka istta nagaray maarettontta malakko› » gides.
13Qasseka Yesusi, «Hayssi leemisoy inttes gelibeennee? Histtiin hara leemiso intte wostti eranee? 14Zerizaadey qaala zerees. 15Issi issi asati oge bolla wodhdhida zereththaa misateettes; istti qaala siyiza wode Xala7ey yiidi heerakka istti siyida qaalaa istta wozinappe ekkichchees. 16Hessaththoka harati mela biitta bolla wodhdhida zereththaa misateettes. Istti qaala siyidi ufayssan ekkeettes. 17Gido attiin istti xapho yeddontta gishshas guuththa wode gam7ishin qaalaa gaason metoy woykko goodetay asata bolla yiza wode heerakka dhuphetteettes. 18Harati qasse agunththa giddon wodhdhida zereththaa misateettes; istti qaalaa sis siyeettes. 19Gido attiin ha biitta metoy, miishsha siiqoynne hara amoy istti siyida qaala cuullidi ayfe ayfontta mala diggees. 20Hankkoyti lo7o biittan zerettida zereththaa misateettes; heytikka qaalaa siyidi ekkizaadenne heedzdzu tammu ayfe, usuppun tammu ayfenne xeetu ayfe ayfizayta» gides.
Geeman Diza Xomppe
(Luqa 8:16-18)
21Qasseka Yesusi, «Xomppe oyththidi geemason woykko arsa garsan woththi ereetii? Poo7ana mala qoncceson woththeeta gidennee?#Mato 5:15; Luqa 11:33 22Hessa gishshas qotettidi qoncce kezonttay, poo7on kezontta geeman attanay baa.#Mato 10:26; Luqa 12:2 23Hessa gishshas siyiza hayththi dizaadey siyo!» gides.
24Gujjidikka, «Intte siyizayssa wozinan woththite; intte makkiza miishshara inttes makettana; hessafekka daroy gujettana.#Mato 7:2; Luqa 6:38 25Dizaades gujettana shin bayndaadefe izas dizaarakka ekketaychchana» gides.#Mato 13:12; 25:29; Luqa 19:26
Dicciza Zereththa Leemiso
26Qasseka Yesusi, «Xoossa kawoteththiya zereth zeriza issi as misatawus. 27Zeridaadey omars dhiskees. Wontishin dendees; gido attiin izi erontta dishin zerettida kaththay mokkidi diccees. 28Gadeyakka koyro caarech, kaaleththada pudhe, qasseka pudheza bolla lo7o ayfe immawus. 29Kaththay kaxxidaappe guye boney gakkiin keeththa aaway heerakka maxa oykkees» gides.
Sanafice Miththa Ayfe Leemiso
30Yesusi, «Xoossa Kawoteth nu aazara ginisanee? Aazara leemisanee? 31Biitta bolla ubbaafe laafa gidida sanafice ayfe misatawus. 32Zerettada diccidaappe guye qasse atakilteta ubbaafe aadhdhiza gishshas kafoti yiidi he atakiltey haggata kuwa giddon shempeettes» gides.
33Yesusikka asay ekkanaas dandayzayssa keena hayta misatiza hara daro leemisora isttas yootides. 34Ay miish gidikkoka asaas leemisoy baynda yooti erenna. Izinne iza kaallizayti xalla diza wode gidikko wursi birshi yootees.
35He gallas gadey qammishin bana kaallizayta, «Ane gede he pinth pinnoos» gides. 36Istti asaa heen aggaagidi izi utti diza wogolozara Yesusa ekki bida. Hara wogolotikka isttara issife deettes. 37He wode wolqqama dambalay abbaa bolla dendidi wogoloza haaththi kumana gakkanaas shocechchides. 38Gido attiin Yesusi borkoth borkotidi wogolozas guye baggan ichchides. Isttika iza denththidi, «Astamaaree! Nuni dhayshin nena meettennee?» gida.
39Izikka dendidi carkoza, «Co7u ga!» abbaaka, «Woppu ga!» gides; carkoyka co7u gides; mulekka co7u gides. 40Bana kaallizaytakka, «Hayssaththo aazas babbidetii? Hayssa gakkanaas inttes ammanoy baawee?» gides.
41Isttika keehi babbidi ba giddon issoy issaara, «Carkoynne abbay izas azazettizay hayssi oonee?» geetettida.
Currently Selected:
Marqoosa Mishiraachcho 4: GM
Highlight
Share
Copy
Want to have your highlights saved across all your devices? Sign up or sign in
The Word for the World International
