Marqoosa Mishiraachcho 16

Hayqoppe Yesusa Denth

(Mato 28:1-8; Luqa 24:1-12; Yoha 20:1-10)

1Sambatay aadhdhidaappe guye Magdale Maarama, Yaaqoobe aayo Maaramiranne Saloomira issife biidi Yesusa aha tiyanaas shitto shammida. 2Saaminttafe koyro gallas maalado wonttara buro arshey kezida mala Yesusa duufokko buro bishin, 3«Duufoza doonappe shuchchaa nuus ooni genderisanee?» giidi ba giddon haasayettida.

4Istti dhoqqu gi xeellishin daro gita shuchchay duufoza doonappe genderidayssa be7ida. 5Duufoza giddo gelida mala issi booththa may7o may7ida panththi ushachcha baggara uttidayssa be7idi dagammida.

6Izi qasse isttas, «Dagammofte! Intte kaqettida Naazirete Yesusa koyeeta; izi dendides; haan deenna; istti iza woththidaso hayssa be7ite. 7Gido attiin intte biidi iza kaallizaytassinne Phexroosas kase inttes yootida mala inttefe kasetidi izi Galila baana. Intte iza heen demmana giidi isttas yootite» gides.#Mato 26:32; Mar 14:28

8Maccassatikka malalettishenne kokkorishe duufaappe kezi baqatida. Babbida gishshas oonaska aykkoka qaattibeettenna.#16:8 Issi issi beni Geeshsha Maxaafatan taybo osppunappe guye diza qofay hayssafe kaallidi xaafettides. Maccassati Phexroosakkonne ba laggetakko biidi kiitanchchazi isttas yootidayssa ubba isttas yootida. Hessafe guye Yesusi ashshiza laamettontta Geeshsha Mishiraachcho qaala arshey mokkizasoppe wullizaso gakkanaas bana kaalliza tamaareta baggara kiittides.

9Saaminttafe koyro gallas Wogga wontta maaladora izi hayqoppe dendidaappe guye Yesusi izippe laappun daydanth kessida Magdale Maaramis koyro beettides.#16:9 Issi issi birsheththataninne issi issi haratappe duuqettida Geeshsha Maxaafatan taybo 9-20 gakkanaas diza qofay xaafettibeenna. 10Izakka baada kase izara dizayti kayottishenne yeekkishe dishin demmada yootadus. 11Istti Yesusi paxa dizayssanne iza ta Yesusa beyadis gidayssa siyidi ammanibeettenna.

Yesusi Bana Kaalliza Nam7atas Beettides

(Luqa 24:13-35)

12Hessafe guye iza kaallizaytappe nam7ati gede dere gars bishin Yesusi isttas hara as misati beettides. 13Isttika simmidi hessa iza kaallizaytappe attidaytas yootida; gido attiin iza kaallizayti siyidi ammanibeettenna.

Yesusi Bana Kaalliza Tammanne Issinetas Beettides

(Mato 28:16-20; Luqa 24:36-49; Yoha 20:19-23; Hawa 1:6-8)

14Hessafe guye tammanne issineti maadda bolla dishin Yesusi isttas qonccides. Izi hayqoppe dendiin iza be7ida asati isttas yootiin siyidi ammanontta aggida gishshas isttas ammanoy bayndayssanne istta wozina muumeteththa gishshas istta borides. 15Isttaskka, «Alame ubbaso biite, Mishiraachcho qaala medheteth ubbaas sabbakite.#Hawa 1:8 16Ammanidaynne xammaqettiday attana. Ammanonttay gidikko pirdettana. 17Tana ammanizayta hayti malatati kaallana. Istti ta sunththan daydanththata kessana; ooraththa qaalankka haasayana. 18Istti shooshshata ba kushera oykkana; wodhiza marze uyikkoka istta qohenna. Ba kushe harganchchata bolla woththi woossiko harganchchati paxana» gides.

Pude Salo Yesusa Buus

(Luqa 24:50-53; Hawa 1:9-11)

19Godaa Yesusi hessa yootidaappe guye pude salo dendi biidi Xoossa ushachchan uttides. 20Iza kaallizayti hessafe kezidi ubbason aadhdhi aadhdhi sabbakida. Godaykka isttara ooththides. Istta timirteza ekkidi ooththizaytas ba yootida qaalakka malaata ooththi ooththi minththides.

Currently Selected:

Marqoosa Mishiraachcho 16: GM

Highlight

Copy