Luqaasa Mishiraachcho 3

Xammaqiza Yohannisa Timirte

(Mato 3:1-12; Mar 1:1-8; Yoha 1:19-28)

1Xibiraadoose geetettiza Qeesaarey kawotida tammanne ichchashanththo layththan Phanxoosa Philaxoosa geeteizayssi Yuhuda biittaa haariza wode Herdoosi Galila biittaa haariza wode, iza ishay Piliphoosi, Ixuriyaasanne Xirakondoose biittaa haariza wode Lisanoosikka Abloone biitta haariza wode,

2Haannaynne Qayafay qeeseta halaqa gidida wode Xoossa qaalay bazzo biittan diza Zakaraasa naa Yohannisakko yides.

3Yohannisi Yordaanoose shaafa achchan diza dereta, «Intte nagara atto gaanaas nagarappe simmidi xammaqettite» giidi yootides; 4Hessika qasse nabe Isayaasi,

«Bazzon hizgidi waassiza

asa kooshinchchi,

‹Godaas oge giigsite;

baasidikka lo7eththite.

5Shoobba biittay wuri kumana;

zumatinne zumbullati wuri

ziqqi gaana;

geella ogey sitti gaana;

moorettida ogey lo7o gidana.

6Asa zereth ubbaa ashshiza

Xoossa wolqqa beyana›

giidi bazzon waassiza

asa qaala giiris»

giidi ba maxaafan xaafida mala.

7Yohannisikka iza kushen xammaqettana yiza asaas, «Intteno ha shooshsha naytoo! Yaana diza Xoossa hanqofe haakkana mala ooni inttena zoridee?#Mato 12:34; 23:33 8Intte nagara oosoppe simmidayssa erisiza ooso ooththite; ‹Nu aaway Abrahaamey nuus dees› guus aggite gides. ‹Xoossi baas giikko ha shuchchatappe Abrahaames naa ooththi denththanaas dandayzayssa erite›#Yoha 8:33 9Kalttay mith qanxxanaas miththa xaphon dees. Lo7o ayfe ayfontta iita miththi wuri qanxxettidi taman yegettana» gides.#Mato 7:19

10Asaykka, «Histtiin ay ooththinoo?» giidi oychchides.

11Yohannisikka asaas, «Nam7u may7oy dizay issi may7oy baynda asas immo; qasseka qumay dizaykka bayndaades shaakki immo» gides.

12Qaraxa shiishshizaytikka xammaqettanaas yiidi, «Astamaaree! Nu ay ooththinoo?» gida.#Luqa 7:29

13«Izikka, ‹Intte azazettidayssafe bollara qaraxa shiishshofte› gides.

14«Wottadaratikka, ‹Nuni qasse ay ooththinoo?› giidi oychchida. Izikka, ‹Oona miishsheka wolqqan ekkofte; qasseka oonakka wordon mootopite; intte damozay inttes gidana› » gides.

15Asay Yohannisa be7idi, «Hayssi Kirstoosaa?» giidi ba wozinan sidhides. 16Yohannisikka ubbaas, «Tani inttena haaththan xammaqays; gido attiin ta iza caamma birshanaas bessonttay taappe aadhdhizaadey yaana. Izi inttena Xillo Ayananinne taman xammaqana. 17Balezan diza kaththaa gafezappe geeshshanaas kath suraggiza layday iza kushen dees. Baleza kumeth geeshshana; gistteza qasse di7en qolana; gafezakka to7ontta taman xuuggana» gides.

18Yohannisi asaa hara dumma dumma zore qaalara minththi zorishe Mishiraachcho qaala yootides. 19Gido attiin Galila biitta haariza Herdoosi ba isha machcho Herodiyaado ekkida gishshassinne hara daro iita ooththida gishshas Yohannisi iza hanqida gishshas, 20kase mooroza bolla hara gujjidi Herdoosi Yohannisa qasho keeththan yeggides.

Yesusi Xammaqettides

(Mato 3:13-17; Mar 1:9-11)

21Asay xammaqettidaappe guye Yesusikka xammaqettides; izi woossishin saloy doyettides. 22Xillo Ayanaykka haraphphe misatidi iza bolla wodhdhides. «Saloppe, ‹Ta dosiza nay nena; Nenan tani ufayettays› » giza qaalay yides.#Medhe 22:2; Maza 2:7; Isa 42:1; Mato 3:17; Mar 1:11; Luqa 9:35

Yesusa Zereththa Zarkke

(Mato 1:1-17)

23Yesusi Xoossa ooso oykkishin izas layththay gede heedzdzu tammu gidana. Asaykka izi Yooseefe naa, Eele naa, 24Maate naa, Lewe naa, Milka naa, Yuhuda naa, Yooseefe naa, 25Matotiyo naa, Amoxe naa, Nahome naa, Isilime naa, Naage naa, 26Maate naa, Matotiyo naa, Semeye naa, Yooseefe naa, Yuhuda naa, 27Yoonane naa, Ereese naa, Zerubaabele naa, Salatiyaale naa, Neere naa, 28Milka naa, Hade naa, Yoosa naa, Qoosaame naa, Elimodaame naa, Eera naa, 29Iyaaso naa, El7ezeere naa, Iyoraame naa, Maate naa, Eele naa, 30Simoona naa, Yuhuda naa, Yooseefe naa, Yoona naa, Elyaaqeeme naa, 31Meeliya naa, Maynaane naa, Maxaate naa, Naataane naa, Dawite naa, 32Isseye naa, Iyoobeede naa, Boo7eeze naa, Solomoone naa, Naasoone naa, 33Aminadaabe naa, Aaraame naa, Aaroone naa, Esroome naa, Faareese naa, Yuhuda naa, 34Yaaqoobe naa, Yisaaqa naa, Abrahaame naa, Taara naa, Naakoore naa, 35Seerohe naa, Eraaguwe naa, Faaleqe naa, Abeere naa, Saala naa, 36Qayiname naa, Arfaakiside naa, Seeme naa, Nohe naa, Laamehe naa, 37Maatusaala naa, Heenooke naa, Yaareede naa, Malal7eele naa, Qayiname naa, 38Heenoose naa, Seete naa Addaame naa, Xoossa naa geettes.

Currently Selected:

Luqaasa Mishiraachcho 3: GM

Highlight

Copy