Yohannisa Mishiraachcho 7

Daase Ba7aales Yerusalaame Yesusa Buus

1Hessafe guye Yesusi Galila giddon yuuyettides; gido attiin Yuhudan yuuyanaas koyibeenna. Gaasoykka Ayhudati iza wodhdhana koyza gishshassa. 2He wode Ayhudata daase ba7aaley mati uttides. 3Hessa gishshas Yesusa ishati izakko shiiqidi, «Nena kaallizayti ne ooththiza oosoza beyana mala ne hayssafe dendada Yuhuda dere ba. 4Gaasoykka qonccen erettana koyzaadey ba ooso geeman ooththenna. Nekka haytantta wursa ooththashe nena alamen qonccisana koshshees» gida. 5Istti hessa gida gaasoykka iza ishatakka gidiin izan ammanonttayta gidida gishshassa.

6Yesusikka isttas, «Ta wodey buro gakkibeenna; intte wodey gidikko ubba wode inttes giigakko. 7Derey inttena ixxana dandayenna; tana gidikko ixxees; gaasoykka tani alame oosoy iita gididayssa izas markkattiza gishshassa. 8Ha7i intte ba7aalezaso biite; taas wodey gakkontta gishshas hayssa ha ba7aalezaso ta biikke» gides. 9Hessa giidi Yesusi Galilan attides.

Daase Ba7aaleson Yesusa Beeto

10Gido attiin iza ishati ba7aalezaso bidaappe guye Yesusi qonccera gidontta qotara ba7aalezaso bides. 11Ayhudati, «Izi awan dizee?» gishe ba7aalezason koyida. 12Dereykka iza gishshas garsara saasuki haasayettides. Issi issi asati, «Izi lo7o asa» gishin baggay qasse, «Lo7o gidenna; izi dere baleththees» gida. 13Gido attiin Ayhudata daannatas babbiza gishshas oonikka iza gishshas qonccen haasaybeenna.

14Ba7aalezi wurana bagga gakkishin Yesusi Xoossa Keeththe biidi tamaarso oykkides. 15Ayhudati, «Hayssi addezi tamaarontta dishe hayssa wursi wostti eridee?» giidi malalettida.

16Hessa gishshas Yesusi, «Ta tamaarsiza timirtey tana kiittida ta Aawappe taas imettides attiin taappe gidenna. 17Tana kiittidayssa shene ooththana koyzaadey diikko hayssi ha timirtey Xoossafe beettidayssa woykko ta taappe haasaydayssa gidikkoka erana. 18Baappe haasayzaadey ba bonchcho koyees. Kiittidaade bonchcho koyzaadey gidikko izi tumanchcha; wordoy iza bolla deenna. 19Musey inttes woga immides gidennee? Gidikkoka intte giddon woga naagi polidaadey oonikka deenna. Intte aazas tana wodhana koyeetii?» gides.

20Dereykka iza, «Ne bolla daydanththi#7:20 Daydanth: Daydanth guussi Xala7e oosanchchata guussa. dees! Nena wodhana koyzay oonee?» gides.

21Yesusikka isttas, «Ta issi ooso ooththadis; intte wurikka hanno ha oosoyn malaletteeta. 22Musey inttes qaxxara woga immides; he wogaykka imettiday kase aawatappe beettides attiin Museppe gidenna. Histtiin hekko intteka Sambata gallassika as qaxxareeta.#Lewe 12:3; Medhe 17:10 23Histtiko Muse wogay shaarettontta mala asi Sambata gallas qaxxarettizaaz gidikko histtiin ta Sambata gallas asaas kumeththa asateth paththiin aazas ta bolla hanqetteetii?#Yoha 5:9 24Suure pirda pirdite attiin asa ayfeso xeellidi maado pirda pirdofte» gi zaarides.

Kirstoosa Gishshas Dendida Palama

25Yerusalaame asaappe issi issi asati, «Istti wodhana koyza addezi hayssa gidennee? 26Hekko izi qonccen haasayees shin istti iza aykkoka gibeettenna. Hayssi Xoossi kiittidaade gididayssa daannati tumu erizoshaa? 27Histtiin hayssi addezi awa asakko nu eroos. Xoossi kiittidaadey yishin qasse izi awappeko erizaadey oonikka deenna» gida. 28Hessa gishshas Yesusi Xoossa Keeththan tamaarsishe ba qaala dhoqqu histtidi, «Intte tana tumu ereeta; ta awappe yidaakko intte ereeta. Qasse tani ta shenen yabeekke; tana kiittidayssi izi tumanchcha; gido attiin intte qasse iza erekketa. 29Ta gidikko iza achchafe yida gishshassinne izi tana kiittida gishshas ta iza erays» gides. 30He wode iza oykkanaas koyida; gido attiin buro wodey gakkibeenna gishshas oonikka iza oykkibeenna. 31Gidikkoka derezappe daroy izan ammanides; asay, «Xoossi kiittidaadey yiza wode hayssi addezi ooththoo malaatappe bollara hara ooththanee?» gides.

Yesusa Oykkana Wottadarata Kiiteteth

32Asay Yesusa gishshas garsara saasuketti haasayettishin Farsaaweti siyida. Hessa gishshas qeeseta halaqatinne Farsaaweti Yesusa oykkanaas Xoossa Keeththa penge naagizayta yeddida. 33He wode Yesusi, «Ta inttenara guuththa wode daashshana; hessafe guye tana kiittidayssako ta simma baana. 34Intte tana koyana shin demmeketa; intte ta dizaso yaanaas dandayekketa» gides.

35Hessa gishshas Ayhudata daannati ba giddon issoy issaara, «Hayssi addezi nu demmontta mala awa baaneesha? Oonee erizay Giriketa giddon laaletti diza Ayhudatakko biidi Giriketa tamaarsaneeshaa? 36Izi, ‹Intte tana koyana shin demmeketa; ta dizaso intte yaanaas dandayekketa› gishin hessi ay guussee?» gida.

De7o Haath

37Gita ba7aaleza wurseththa gallas Yesusi dendi eqqidi ba qaala dhoqqu histtidi, «Haath saamettidaadey diikko haa taakko yiidi uyo.#Lewe 23:36 38Geeshsha Maxaafay gida mala tana ammanizaadefe de7o haaththa pulttoy pulttana» gides.#Hizi 47:1; Zaka 14:8 39Izi hessa giday izan ammanizayti buroppe ekkana Xillo Ayana gishshassa; gaasoykka Yesusi bonchchettiza wodey buro gakkontta gishshas Xillo Ayanay imettibeenna.

Dereza Giddon Medhettida Shaaketeth

40Hessa gishshas derezappe issi issi asati he qaalaa siyidi, «Yaana giza nabey tumappe hayssa» gida. 41Harati, «Hayssi Xoossi kiittidaade» gida; baggayti qasse, «Xoossi kiittidaadey Galilappe waani yaanee? 42Xoossi kiittidaadey Dawite zereththafe yelettanayssanne Dawite katama Beeteliheemeppe yaanayssi kase Geeshsha Maxaafan xaafettibeennee?» gida.#2Same 7:12; Miki 5:2 43Hessa gishshas iza gaason derey ba giddon shaaketti wodhdhides. 44Isttafe issi issi asati iza oykkana koyida; gido attiin oonikka iza oykkibeenna.

Ayhudata Daannati Ammanibeettenna

45Hessafe guye Xoossa Keeththe naagizayti qeeseta halaqataakkonne Farsaawetakko simmi bida. Isttika, «Aazas iza ekkontta yidetii?» gida. 46Wottadaratikka zaaridi, «Ha addezi haasayzayssa mala ay asikka haasayi erenna» gida.

47Farsaaweti istta, «Intteka balettidetii? 48Daannatappe woykko Farsaawetappe iza ammanidayti dizooshaa? 49Hayssi Muse wogaa erontta derey tumappe qanggettidayssa» gida.

50Hayssafe kase Yesusaakko bida Farsaawetappe issaa gidida Niqodimoosi isttas,#Yoha 3:1-2 51«Nu wogan issi mootettizaadey ba mootos zaaro immiin siyonttanne izi ay ooththidaakko erettontta dishin pirday pirdetti erizee?» gides.

52Isttika, «Nekka Galila asee? Galilappe nabey dendonttayssa pilggada gakka era» gida. 53Hessafe guye issoy issoy baso bides.#7:53 Hessafe guye issoy issoy baso bides gizayssa issi issi Geeshsha Maxaafatan xaafettibeenna.

Currently Selected:

Yohannisa Mishiraachcho 7: GM

Highlight

Copy