Medheteththa Maxaafa 32

Eesawera Gaagganaas Yaaqoobe Giigeteth

1Yaaqoobey dendidi sinththe bishin Xoossa kiitanchchati izara gaaggida. 2Yaaqoobey istta be7idi, «Hayssi Xoossi aqizaso» gishe he sohoza Mahanayme gi sunththides.#32:2 Maahinayme: Maahinayme guussi Ibraaweta qaalara, «Nam7u cugay aqizaso woykko gutata» guussa.

3Yaaqoobey Seyre geetettizason Eedoome biittan diza ba isha Eesawekko baappe sinththe kiita yeddides. 4Izi istta bolla kiita, «Intte ta godaa Eesawes gaana miishshi hayssa; ‹Ne aylle Yaaqoobey, tani Laaba achchan hanno gakkanaas gam7adis. 5Taas miizi, harey, dorsi, deyshi, adde aylletinne macca aylleti deettes; ha7i tani ha kiitaa ta godaas kiittizay taas lo7o qoppana mala ga kiittadis› gides» gi kiittides.

6Kiitettidayti Yaaqoobekko simmidi izas, «Nuni ne isha Eesawekko bidos; ha7i izi qasse nenara gaagganaas yees; izarakka 400 asi dees» gida.

7Yaaqoobey babbidi shoobbides; banara diza asaa 2 cugan cugan shaakkidi ba dorsaa, deyshaa, miizaanne gaamellaa 2 cugan cugan shaakkides. 8Izi, «Eesawey yiidi issi cuga oli ekkizaa gidikko attida cugay kessi ekkanaakko» gi qoppides.

9He wode Yaaqoobey, «Abeet Xoossawu! Ta aawa Abrahaame Xoossawu, ta aawa Yisaaqa Xoossawu, tana, ‹Ne dabbotakko ne dere simma; tani nees lo7o ooththana› gidaso, 10neni ne ayllezas ooththida kiyateththaassinne ammaneteththaas ubbaas tani bessontta asa. Tani haa Yordaanoose shaafa pinniza wode taas issi guufeyppe attiin kushen haray deenna; gido attiin ha7i tani nam7u cuga dere gidadis. 11Ta nena woossays; ta ishaa Eesawe kusheppe tana ashsha; gaasoykka izi yiidi tananne ta nayta aayeta istta naytara dhayssanaakko gaada babbadis. 12Gido attiin neni tana, ‹Tani nees tumu lo7o ooththana; tani ne zereththay taybettanaas dandayettontta abba shaamintta mala ooththana› gidayssa qoppa» gi woossides.#Medhe 12:17

13He gallassa omars izi heen aqiday baas diza ubbaafe ba isha Eesawes immanaassa. 14-15Izikka 200 macca deyshatanne nam7u tammu deysha orgeta, 200 macca dorsatanne 200 dharshota, 300 dhanththiza gaamellatanne istta maratara, 40 miizata, 10 korma boorata, 20 macca haretanne 10 wodalla hareta qori kessides. 16Heyta istti wuden wuden shaakki shaakki ba aylleta kushen woththidi aylletas, «Taappe sinththati biite; wudeza issaa issaafe haassi haassi laaggite» gides.

17Ubbaafe sinththan bizayssa, «Ta isha Eesawey nenara gaaggidi nena, ‹Ne oonee? Awa bay? Ne sinththan diza mehey wuri oonassee?› gi oychchizaa gidikko, 18‹Neni izas hayti ne aylle Yaaqoobessa; izi hayta yeddidaykka ta godaa Eesawes immanaassa; qasse izikka nuuppe guyera yees› ga» gi azazides.

19Qasseka nam7anththonne heedzdzanththo cugatassinne wudeza kaalliza hara ubbatas hayssaththo, «Intte Eesawera gaaggiza wode hayssaththoka geeta; 20‹Ne aylle Yaaqoobey nuuppe guyera yees› gontta aggofte» gides; izi hessaththo giday, «Tani taappe sinththe immanaas kiittidayssan iza hanqo doshisana; hessafe guye tani izara gaaggiza wode izi tana mokki ekkanaakko oonee erizay» gi qoppides. 21Hessa gishshas ba immizayssa baappe sinththasi yeddides; gido attiin izi ba hu7es he gallassa omars heen ba dizason aqides.

Xoossara Yaaqoobe Baaxeteth

22-23He gallassa omars Yaaqoobey dendidi, ba nam7u machcheta, ba nam7u aylleta ba nayta tammanne issineta ekkidi Yaabooqe geetettiza shaafa gakkides; izi isttanne baas dizayta ubbaa pinththi yeddides; 24Gido attiin Yaaqoobey barkka heen attides.

He wode issi asi gadey wonttana gakkanaas izara baaxetides. 25He addezi iza xoonanaas dandayettonttayssa be7idi Yaaqoobes wodira bochchiin iza wodiray doccides. 26Histtiin he addezi iza, «Gadey wonttana gees tana yedda» gides.#Hose 12:3-4

Gido attiin Yaaqoobey iza, «Ne tana anjjontta yeddike» gides.

27Addezikka iza, «Ne sunththi oonee?» gi oychchiin izi,

«Yaaqoobe» gi zaarides.

28Addezikka iza, «Hayssafe sinththan ne sunththi Isra7eele#32:28 Isra7eele: Isra7eele guussi Ibraaweta qaalara, «Baaxetees» guussa. geetetto attiin Yaaqoobe geetettofo; ays giikko neni Xoossaranne asara baaxetada xoonadasa» gides.

29Yaaqoobey iza, «Ne sunththi oonee?» gi oychchides.

Addezikka, «Neni ta sunththu ays oychchay?» gi simmidi iza heen anjjides.#Daanna 13:7-18

30Hessa gishshas Yaaqoobey he sohoza Phin7eele#32:30 Phin7eele: Phin7eele guussi Ibraaweta qaalara, «Xoossa ayfeso» guussa. gi sunththides; ays giikko izi, «Tani Xoossaa ta ayfera be7ada hayqqontta attadis» gides. 31Izi Panu7eeleppe dendiza wode iza bolla xalqqey kezides; izi ba wodiraa gishshas wobbides. 32Yaaqoobe wodiray deshettida gishshas Isra7eele asay hach gakkanaaska geda giddon diza paashsha asho mi erettenna.

Currently Selected:

Medheteththa Maxaafa 32: GM

Highlight

Copy