Hawaareta Ooso 2

Ammaniza Asaa Bolla Xillo Ayana Wodheth

1Phenxeqoste geetettiza ba7aale gallassi gakkida wode asay wurikka issi soon shiiqi dishin, 2qofay baynda daro mino gote carko mala giirissi yides; asay diza keeththaaka kumides. 3Tama laco misatiza qaalay asaas beettidi shaaketti shaaketti issaa issaa bolla uttides. 4Ammanizayti wuri Xillo Ayanan kumidi Ayanay isttas haasayanaas immidayssa keena hara qaalara haasaya oykkida.

5He wode salo gufanththon diza dereppe yida Xoossas babbiza Ayhudati Yerusalaamen deettes. 6He giirissaa siyidi derey shiiqides; issoy issoy ba qaalara haasayzayssa siyidi malalettida. 7Malalettidi gaanaazi dhayiin, «Hayti haasayzayti wurikka Galila as deettennee? 8Histtiin nuni nu yelettida nu dere qaalara istti haasayshin wostti siyizonii? 9Nuni Phartaane asay, Meede asay, Eelaame asay, Mesphexoomiyan, Yuhudan, Qophodooqiyan, Phanxoosan, Iisiyan, 10Pirgiyan, Phinfiliyan, Gibxen, Qareena achchan diza Liibiyappenne Oroomeppe yidayti 11Ayhudatinne gede Ayhudateththan gelida Qarxeese asaanne Arabe asata gidishin wolqqama ooso Xoossayssa hayti nu qaalara haasayshin nu siyoos» gida.

12Wurikka keehi malalettidinne gaanaazi dhayiin ba giddon, «Hayssi aazeeshaa?» geetettida. 13Bagga asay, «Hayti daro woyne cajje uyida» giidi istta qidhida.

14He wode Phexroosi tammanne issinetara eqqidi ba qaala dhoqqu histtidi deraas, «Intteno Yuhuda asatoo! Yerusalaamen dizaytoo! Intte wurikka hayssa issi miish eritenne ta gizayssa siyite. 15Ha7i gadey wontiin buro heedzdzu saate gidida gishshas intte qoppiza mala hayti asati maththottibeettenna. 16Gido attiin hayssi kase nabe Iyu7eelen hizgi yootettida qaalay polettanaassa,

17« ‹Xoossi Wurseththa gallas

ta Ayana

asho may7ida ubbaa bolla

tani gussana;

intte macca naytinne

intte attuma nayti

tinbite haasayana;

yelaga nayti ajjuuta beyana;

cimati agumo agumettana.#Iyu 2:28-32

18He wode ta macca

ashkarata bollanne

ta attuma ashkarata bolla

ta Ayanappe ta gussana.

Isttika tinbite haasayana.

19Bolla Salon malalisiza hanota

ta bessana,

garsa sa7an malaatata ta bessana;

suuththi, tamaynne

tulalay hanana.

20Gitanne bonchcho gidida

Godaa gallassi

yaanaappe kasetidi

arshey dhumana;

aginaykka suuth misatana.

21Godaa sunth xeygizay

wuri attana› gides.

22«Isra7eele naytoo! Hayssa qaala siyite; intte intte baggara erizayssa mala intte giddon malatanne asi siyi erontta miishshata iza kushen ooththidi Xoossi Naazirete Yesusas markkattides. 23Xoossi kase ba qachchidayssa izas beni erateththaa mala hayssaade intte kushen aaththi immides. Intteka iita asata kushen kaqetti hayqqana mala ooththideta.#Mato 27:35; Mar 15:24; Luqa 23:33; Yoha 19:18 24Gido attiin Xoossi iza bollafe hayqo wolqqa diggidi hayqoppe denththides; hayqoykka iza oykki ashshanaas dandaybeenna.#Mato 28:5-6; Mar 16:6; Luqa 24:5 25Dawitikka iza gishshas,

« ‹Tani Godaa ubba wode

ta sinththan beyays;

izi ta ushachchan dees;

mulekka hirgike.

26Hessa gishshas ta wozinay ufayettees;

ta doonaykka galatees;

ta ashoy ufayssan daana.

27Ne ta shemppoyo duufon aggaka;

ne naa geeshshaza

wooqqana mala aggaagakka.

28Ne de7o oge

ta erana mala ooththadasa.

Ne tanara diza gishshas

ta ufayssay kumeththa.›

29«Ta ishatoo! Beni aawatappe Dawiti hayqqi moogettidayssanne iza duufoy hach gakkanaas nu achchan dizayssa babbontta ta inttes yootana dandayays. 30Izi nabe gidida gishshas Xoossi iza zereththafe issaade iza kawoteththa alga bolla woththanayssa kase caaqo qaalaan yootidayssa erides.#Maza 132:11; 2Same 7:12-13 31Hessa kasetidi erida gishshassinne iza ashoy wooqqi duufon attontta doorettida Kirstoosa denththa gishshas haasaydes. 32He Yesusa Xoossi hayqoppe denththides; nunikka wuri hayssas markkatta. 33Hessa gishshas izi Xoossa ushachchan dhoqqu dhoqqu gidaappe guye Xillo Ayana ufayssaa ba aawappe ekkidi ha7i intte be7izayssanne siyizayssa duge gussides. 34-35Dawiti pude salo kezibeenna; izi ba doonan,

«Goday ta Godaas,

‹Ta ne morkketa ne toho garsan

yedhisana gakkanaas

ta ushachchan utta› gides.#Maza 110:1

36«Hessa gishshas Xoossi intte kaqqida Yesusa Godaanne Kirstoosa histtidayssa Isra7eele asay wuri lo7eththi ero» gides.

37Derey hessa siyida mala wozinay boshettides; Phexroosanne hankko Yesusi kiittidayta, «Histtiin nu ishatoo! Nu ay ooththinoo?» gida.

38Phexroosikka, «Maaroteththan gelite; intte nagaray maarettana mala inttefe issi issi asi Yesus Kirstoosa sunththan xammaqettite; izi immiza Xillo Ayana intte ekkana. 39Ufayssa qaalay inttessinne intte naytassa; qasseka Godaa Xoossi baakko xeygiza haahon dizaytassara ubbaassa» gides.

40Hara daro qaalara isttas markkattishe, «Hayssa geella yeletaappe inttena ashshite» giidi istta qofsides. 41He gallas qaalaa ekkidaytinne xammaqettidayti heedzdzu shii mala asay kaseyta bolla gujettides. 42Isttika Hawaareta timirten, issife quma muussaninne woosan minnida.

43Hawaareta kushen daro malaatati oosettida gishshas asi ubbay isttas babbides. 44Ammanidayti wurikka issife de7ida; baas dizaazikka ubbaa issi bolla go7ettida.#Hawa 4:32-35 45Baas diza miishshenne mehe bayzi bayzi ba giddon koshshida mala gishechchida. 46Gallas gallas Xoossa Keeththan issife shiiqeettes; ba keeththankka quma issife ufayssaninne suure wozinan issifeteththan meettes. 47Istti Xoossaa galatishe dere sinththan bonchchettida. Godaykka istta bolla gallas gallas oorath ammanizayta gujjides.

Currently Selected:

Hawaareta Ooso 2: GM

Highlight

Copy